Micah 5;1-15
5 “Ke emi afo emekpi idem fo,+ O obio emi ẹdade en̄wan ẹdụk; enye amakan nnyịn okụk.+ Mmọ ẹyeda eto ẹyịbi ebiereikpe Israel mfụk.+
2 “Ndien afo, O Bethlehem Ephrathah,+ emi ekpride akaha ndidu ke otu ediwak tọsịn obio Judah,+ owo oyoto fi+ ke esịt ọwọrọ ọnọ mi, emi edidide andikara ke Israel,+ emi ntọn̄ọ esie edide toto ke eset, ko ke ata anyan ini.+
3 “Mmọdo enye ayayak mmọ ọnọ+ tutu esịm ini emi n̄wan oro oyomde ndiman eyen amande.+ Ndien nditọete esie emi ẹsụhọde ẹyefiak ẹtiene nditọ Israel.
4 “Ndien enye ọyọsọn̄ọ ada ọbọk ufene ke odudu Jehovah,+ ke uku enyịn̄ Jehovah Abasi esie.+ Ndien mmọ ẹyedụn̄ ke ifụre,+ enye oyonyụn̄ okpon ke emi tutu esịm utịt isọn̄.+
5 Ndien enye emi ayakabade edi emem.+ Amaedi owo Assyria, ke ini enye odụkde edi isọn̄ nnyịn ye ke ini enye edịghide mme tọwa ufọkidụn̄ nnyịn,+ nnyịn n̄ko iyanam mme ekpemerọn̄ itiaba, ih, mbọn̄ itiaita ke otu ubonowo, ẹdaha ẹda ẹn̄wana ye enye.
6 Ndien mmọ ẹyeda akan̄kan̄ ẹbọk idụt Assyria,+ ye idụt Nimrod+ ke mme inuaotop esie. Ndien enye ayanyan̄a nnyịn osio owo Assyria ke ubọk,+ ke ini enye odụkde edi idụt nnyịn ye ke ini enye edịghide obio nnyịn.
7 “Ndien nsụhọ Jacob+ ẹyekabade ẹtie nte mbara eke otode Jehovah,+ ke otu ediwak owo, nte ikpọ ukot edịm eke ẹduọhọde ke ikọn̄,+ oro mîdorike enyịn ke owo, m̀mê oro mîtiehe ibet nditọ owo.+
8 Ndien nsụhọ Jacob ẹyedu ke otu mme idụt, ke otu ediwak owo, nte ekpe ke otu mme unam akai, ye nte abak ayara ekpe ke otu mme erọn̄, emi edịghide onyụn̄ awaide mbai mbai ke ini enye asan̄ade ebe;+ ndien owo eke anyan̄ade idụhe.
9 Ubọk fo oyokon̄ akan eke mme asua fo,+ ẹyenyụn̄ ẹsịbe kpukpru mme asua fo ẹfep.”+
10 Jehovah ọdọhọ ete, “Ama ekem ke usen oro, nyesịbe mme enan̄-mbakara fo mfep ke otu fo nnyụn̄ nsobo mme chariot fo mfep.+
11 Ndien nyesịbe mme obio ke idụt fo mfep nnyụn̄ n̄wụri kpukpru mme ebiet ukpeme fo.+
12 Ndien nyesịbe mme idiọn̄ mfep ke ubọk fo, afo udunyụn̄ unyeneke aba mme ebre mfọni.+
13 Nyonyụn̄ nsịbe ndisọi mbiet fo ye mme adaha fo mfep ke otu fo, afo udunyụn̄ unụhọke aba unọ utom ubọk fo.+
14 Nyonyụn̄ n̄wụbede eto utuakibuot+ fo mfep ke otu fo nnyụn̄ nsobo mme obio fo mfep.
15 Ndien nyada iyatesịt ye ifụtesịt nsio mme idụt oro mîkopke uyo mi usiene.”+
