Psalm 34;1-22
Eke David, ke ini emi enye akanamde nte idi idat+ ke iso Abimelech, tutu enye ebịn enye efep, ndien enye ọnyọn̄.
א [ʼAleph]
34 Ami nyotoro Jehovah kpukpru ini;+Itoro esie oyodu mi ke inua kpukpru ini.+
ב [Behth]
2 Ukpọn̄ mi oyobụre mbụre ke Jehovah;+Mbon nsụkidem ẹyekop ẹnyụn̄ ẹdara.+
ג [Gimel]
3 O mbufo ẹtiene mi ẹnọ Jehovah ubọn̄,+Ẹyak nnyịn inyụn̄ itoro enyịn̄ esie ọtọkiet.+
ד [Daleth]
4 Ami n̄kobụp Jehovah, ndien enye ọbọrọ mi,+Enye onyụn̄ anyan̄a mi osio ke kpukpru n̄kpọ emi ẹsịnde mi ndịk.+
ה [Heʼ]
5 Mmọ ẹse enye ẹnyụn̄ ẹkop idatesịt,+Ndien iso mmọ ikwe bụt.+
ז [Zayin]
6 Owo ukụt emi okot, ndien Jehovah okop.+Enye onyụn̄ anyan̄a enye osio ke kpukpru nnanenyịn esie.+
ח [Chehth]
7 Angel Jehovah adada akanade kpukpru mmọ eke ẹbakde enye,+Enye onyụn̄ anyan̄a mmọ.+
ט [Tehth]
8 Mbufo ẹtabi ẹnyụn̄ ẹse nte Jehovah ọfọnde;+Owo emi enyenede enye nte ebiet ubọhọ okop inemesịt.+
י [Yohdh]
9 Ẹbak Jehovah, mbufo ndisana ikọt esie,+Koro mmọ eke ẹbakde enye inanake baba n̄kpọ kiet.+
כ [Kaph]
10 Abak nyara ekpe ẹsan̄a biọn̄ sia ẹnyenede esisịt udia;+Edi amaedi mmọ eke ẹyomde Jehovah, mmọ idinanake baba eti n̄kpọ kiet.+
ל [Lamedh]
11 Ẹdi, mbufo nditọ, ẹkpan̄ utọn̄ ẹnọ mi;+Ami nyekpep mbufo ndibak Jehovah.+
מ [Mem]
12 Anie edi owo emi amade uwem,+Emi amade ediwak usen man okụt se ifọnde?+
נ [Nun]
13 Kpeme edeme fo ke idiọk,+Kûnyụn̄ uyak n̄kpọkinua fo abian̄a abian̄a.+
ס [Samekh]
14 Wọn̄ọde kpọn̄ idiọk, nyụn̄ nam se ifọnde;+Yom emem, nyụn̄ bịne enye.+
ע [ʽAyin]
15 Enyịn Jehovah ke ese ndinen owo,+Enye onyụn̄ ọbiọn̄ utọn̄ ke eseme emi mmọ ẹsemede ẹyom un̄wam.+
פ [Peʼ]
16 Jehovah inenke iso ye mbon emi ẹnamde idiọk,+Eyesịbe enyịn̄ mmọ efep ke isọn̄.+
צ [Tsadheh]
17 Ndinen owo ẹseme, ndien Jehovah okop,+Enye onyụn̄ anyan̄a mmọ osio ke kpukpru nnanenyịn mmọ.+
ק [Qohph]
18 Jehovah emekpere mmọ eke esịt obụn̄ọde;+Enye onyụn̄ anyan̄a mmọ eke spirit mmọ anuahade.+
ר [Rehsh]
19 Edinen owo okụt ediwak afanikọn̄,+Edi Jehovah anyan̄a enye osio ke kpukpru mmọ.+
ש [Shin]
20 Enye ekpeme kpukpru mme ọkpọ esie;Baba kiet ke otu mmọ ibụn̄ọke.+
ת [Taw]
21 Afanikọn̄ oyowot idiọkowo;+Ndien ikpe oyobiom mmọ eke ẹsuade edinen owo.+
22 Jehovah afak ukpọn̄ mme asan̄autom esie;+Ndien ikpe idibiomke baba owo kiet eke enyenede enye ke ebiet ubọhọ.+
