Numbers 10;1-36
10 Ndien Jehovah ọdọhọ Moses ete:
2 “Da silver nam obukpon̄+ iba. Dodom mmọ, ndien ẹyefri mmọ ke ini ẹyomde ndikot+ ofụri esop mbon ọtọkiet ye ke ini ẹyomde ndidaha isan̄.
3 Ke ini ẹfride mmọ mbiba, ofụri esop ẹyewọrọ ẹdisobo ye afo ke enyịnusụn̄ tent usopidem.+
4 Ndien edieke mmọ ẹfride kiet kpọt, mbọn̄ emi ẹdide mme etubom mme tọsịn ke Israel ẹdiwọrọ ẹdisobo ye afo.+
5 “Ke ini mbufo ẹfride obukpon̄ uyo ọdọdọk ososụhọde, mbon oro ẹnamde nna ke n̄kan̄ edem usiahautịn+ ẹyedaha isan̄.
6 Ndien ke ini mbufo ẹtọn̄ọde ntak ẹfri obukpon̄ uyo ọdọdọk ososụhọde, mbon oro ẹnamde nna ke n̄kan̄ edem usụk+ ẹyedaha isan̄. Mmọ ẹnyene ndifri obukpon̄ uyo ọdọdọk ososụhọde kpukpru ini emi otu ekededi edidahade isan̄.
7 “Ke ini mbufo ẹyomde ndikot ofụri esop mbon ọtọkiet, ẹfri+ obukpon̄, edi ẹkûfri obukpon̄ oro uyo ọdọdọk ososụhọde.
8 Ndien nditọiren Aaron, mme oku, ẹnyene ndifri mme obukpon̄+ emi, ndien ufri obukpon̄ emi edidi nsinsi ewụhọ ọnọ mbufo ke ofụri emana mbufo.
9 “Ndien edieke mbufo ẹn̄wanade ekọn̄ ke isọn̄ mbufo ye mme asua emi ẹfịkde mbufo,+ mbufo ẹnyene ndifri obukpon̄+ man mme owo ẹben̄e idem ẹnọ ekọn̄, ndien Jehovah Abasi mbufo eyeti mbufo onyụn̄ anyan̄a mbufo osio ke ubọk mme asua mbufo.+
10 “Ndien ke usen idara+ mbufo ye ke ini usọrọ+ mbufo ye ke ntọn̄ọ ọfiọn̄+ mbufo, mbufo ẹnyene ndifri obukpon̄ mban̄a edifọp uwa+ mbufo ye mme uwa+ ebuana mbufo; ndien ufri obukpon̄ edidi n̄kpọ editi ọnọ mbufo ke iso Abasi mbufo. Ami ndi Jehovah Abasi mbufo.”+
11 Edikem ke ọyọhọ usen edịp,+ ke ọyọhọ ọfiọn̄ iba, ke ọyọhọ isua iba, obubịt enyọn̄ adaha ọkpọn̄ enyọn̄ tent utuakibuot+ emi Ntiense odude.
12 Ndien nditọ Israel ẹdaha ke wilderness Sinai nte udịm isan̄ mmọ ẹdide,+ ndien obubịt enyọn̄ adaha akada ke wilderness Paran.+
13 Ndien mmọ ẹtọn̄ọ isan̄ ke akpa ini, kpa nte Jehovah akadade Moses eteme.+
14 Ntre otu nna nditọ Judah emi esịnede esien ita ẹbem iso ẹdaha isan̄ nte udịmekọn̄ mmọ edide,+ ndien Nahshon+ eyen Amminadab ekedi etubom udịmekọn̄ emi.
15 Ndien Nethanel+ eyen Zuar ekedi etubom udịmekọn̄ esien nditọ Issachar.
16 Ndien Eliab eyen Helon+ ekedi etubom udịmekọn̄ esien nditọ Zebulun.
17 Ndien ẹwụhọde+ tent utuakibuot, ndien nditọ Gershon+ ye nditọ Merari+ emi ẹbiomde tent utuakibuot ẹdaha isan̄.
18 Ndien otu nna Reuben+ emi esịnede esien ita ẹdaha isan̄ nte udịmekọn̄ mmọ ẹdide, ndien Elizur+ eyen Shedeur ekedi etubom udịmekọn̄ emi.
19 Ndien Shelumiel+ eyen Zurishaddai ekedi etubom udịmekọn̄ esien nditọ Simeon.+
20 Ndien Eliasaph+ eyen Deuel ekedi etubom udịmekọn̄ esien nditọ Gad.
21 Ndien nditọ Kohath emi ẹbiomde ndisana+ n̄kpọ ẹdaha isan̄, sia edide ẹyewụk tent utuakibuot mbemiso mmọ ẹsịmde do.
22 Ndien otu nna nditọ Ephraim+ emi esịnede esien ita ẹdaha isan̄ nte udịmekọn̄ mmọ ẹdide, ndien Elishama+ eyen Ammihud ekedi etubom udịmekọn̄ emi.
23 Ndien Gamaliel+ eyen Pedahzur ekedi etubom udịmekọn̄ esien nditọ Manasseh.+
24 Ndien Abidan+ eyen Gideoni ekedi etubom udịmekọn̄ esien nditọ Benjamin.+
25 Ndien otu nna nditọ Dan+ emi esịnede esien ita ẹdaha isan̄ nte mbon emi ẹkpemede edem+ ẹnọ ofụri nna nte udịmekọn̄ mmọ ẹdide, ndien Ahiezer+ eyen Ammishaddai ekedi etubom udịmekọn̄ emi.
26 Ndien Pagiel+ eyen Ochran ekedi etubom udịmekọn̄ esien nditọ Asher.+
27 Ndien Ahira+ eyen Enan ekedi etubom udịmekọn̄ esien nditọ Naphtali.+
28 Emi ekedi ndutịm isan̄ oro ẹkenamde ẹnọ nditọ Israel nte udịmekọn̄ mmọ ẹdide ke ini mmọ ẹdidahade isan̄.+
29 Ekem Moses ọdọhọ Hobab eyen Reuel+ owo Midian, ete an̄wan Moses, ete: “Nnyịn imọn̄ idaha ika ebiet emi Jehovah ọkọdọhọde ete, ‘Nyada enye nnọ mbufo.’+ Tiene nnyịn, ndien nnyịn iyọfọn fi mfọn,+ koro Jehovah emetịn̄ se ifọnde aban̄a Israel.”+
30 Edi enye ọdọhọ enye ete: “Ndidịghe, edi nyọnyọn̄ obio+ emana mi ntiene iman mi.”
31 Ntre enye ọdọhọ ete: “Mbọk, kûkpọn̄ nnyịn, koro afo emetịm ọfiọk ebiet emi nnyịn idinamde nna ke wilderness, afo oyonyụn̄ edi enyịn ọnọ nnyịn.
32 Ndien edieke afo editienede nnyịn,+ se ededi oro Jehovah edidade ọfọn nnyịn mfọn, nnyịn iyonyụn̄ ida oro ifọn fi mfọn.”
33 Ntre ke mmọ ẹdaha ke obot Jehovah+ ẹka isan̄ usen ita, ndien ekebe ediomi+ Jehovah ebem mmọ iso ke isan̄ usen ita ndiyom ebiet nduọkodudu nnọ mmọ.+
34 Ndien obubịt enyọn̄+ Jehovah asan̄a ye mmọ ke uwemeyo ke ini mmọ ẹdahade ke itienna.
35 Edikem ke ini Ekebe adahade, Moses ọdọhọ ete: “Daha ke enyọn̄, O Jehovah, nyụn̄ yak mme asua fo ẹsuana;+ yak mmọ eke ẹnen̄erede ẹsua fi ẹnyụn̄ ẹfen̄e ke iso fo.”+
36 Ndien ke ini enye atuakde ada, enye ọyọdọhọ ete: “O Jehovah, fiak tiene ediwak tọsịn mbon Israel.”+
