Ruth 4;1-22
4 Ekem Boaz ọdọk aka inuaotop+ eketie do. Ndien, sese! andifak, emi Boaz eketịn̄de aban̄a,+ asan̄a ebe. Ekem enye ọdọhọ ete: “Da, waha di tetie mi.” Ndien enye awaha edisụhọde etetie.
2 Ekem Boaz osio owo duop ke otu mbiowo+ obio onyụn̄ ọdọhọ mmọ ete: “Ẹsụhọde ẹtetie mi.” Ndien mmọ ẹsụhọde ẹtetie.
3 Ndien enye ọdọhọ andifak+ oro ete: “Naomi, emi okotode obio Moab+ ọnyọn̄ edi, oyom ndinyam in̄wan̄ Elimelech+ eyenete nnyịn.
4 N̄kọdọhọ ntịn̄ nnọ fi nte, ‘Dep enye+ ke iso mbio obio ye ke iso mbiowo obio.+ Edieke afo enyịmede ndifak enye, fak; edi edieke afo mûdufakke, sian mi, man mfiọk, koro owo efen mîdụhe ndifak+ enye ke mîbọhọke afo, ndien ami ntiene fi ke edem.’” Ndien enye ọdọhọ ete: “Ami mmọn̄ mfak.”+
5 Ndien Boaz ọdọhọ ete: “Ke usen eke afo edepde in̄wan̄ emi ke ubọk Naomi, afo emedep enye n̄ko ke ubọk Ruth, owo Moab, n̄wan akpan̄kpa, man anam enyịn̄ akpan̄kpa oro osụk odu ke udeme esie.”+
6 Ntem andifak oro ọdọhọ ete: “Ndikemeke ndifak mbak ndibiat udeme mi. Afo kam da unen oro nnyenede ndifak fak, koro mmen̄kemeke ndifak.”
7 Ido ini oro ke Israel kaban̄a unen edifak ye unen edikpụhọ itie, man ẹsọn̄ọ kpukpru n̄kpọ ekedi ntem: Owo ekenyene ndisio ikpaukot+ esie ke ukot nnọ eyenete esie, ndien emi ekedi n̄kpọ ntiense ke Israel.
8 Ntem, ke ini andifak oro ọdọhọde Boaz ete: “Afo kam dep enye,” enye osio ikpaukot+ ke ukot.
9 Ndien Boaz ọdọhọ mbiowo ye kpukpru owo ete: “Mbufo ẹmedi ntiense+ mfịn emi ẹte ke mmedep kpukpru se inyenede Elimelech ye kpukpru se inyenede Chilion ye Mahlon ke ubọk Naomi.
10 Ndien n̄ko mmedep Ruth owo Moab, n̄wan Mahlon man nnam enyịn̄ akpan̄kpa+ osụk odu ke udeme esie, mbak ẹdisịbe enyịn̄ akpan̄kpa ẹfep ke otu nditọete esie ye ke inuaotop ebiet esie. Mbufo ẹdi ntiense+ mfịn emi.”
11 Ndien kpukpru owo oro ẹdude ke inuaotop ye mbiowo obio ẹdọhọ ẹte: “Nnyịn idi ntiense! Jehovah akpakam anam n̄wan emi odụkde edi ufọk fo etie nte Rachel+ ye Leah,+ emi ẹkebọpde ufọk Israel;+ afo nyụn̄ nam ẹkụt eti ido fo ke Ephrathah+ nyụn̄ wọrọ etop ke Bethlehem.+
12 Ufọk fo akpakam akabade etie nte ufọk Perez, emi Tamar akamande ọnọ Judah,+ oto ke eyen emi Jehovah edinamde eyenan̄wan emi aman ọnọ fi.”+
13 Ekem Boaz emen Ruth ọdọ onyụn̄ enyene ebuana ye enye. Ntre Jehovah anam enye oyomo+ ndien enye aman eyeneren.
14 Ndien iban ẹdọhọ+ Naomi ẹte: “Itoro enyene Jehovah,+ emi mîyakke afo anana owo eke afakde fi mfịn emi; man ẹtan̄a enyịn̄ esie ke Israel.
15 Ndien enye amakabade edi andidemede fi ukpọn̄ ye andibọk fi ke ini usọn̄,+ koro n̄wan eyen fo emi amade fi,+ onyụn̄ ọfọnde ye afo akan nditọiren itiaba,+ aman eyen emi.”
16 Ndien Naomi emen eyen oro odori ke ikpanesịt, onyụn̄ akabade edi edep esie.
17 Ndien iban mbọhọidụn̄+ ẹsio eyen oro enyịn̄, ẹdọhọ ẹte: “Eyeneren amana ọnọ Naomi.” Ndien mmọ ẹsio enye enyịn̄ Obed.+ Enye edi ete Jesse,+ ete David.
18 Mmọ emi ẹdi ubon Perez.+ Perez okobon Hezron;+
19 ndien Hezron obon Ram; Ram+ onyụn̄ obon Amminadab;
20 ndien Amminadab+ obon Nahshon;+ Nahshon onyụn̄ obon Salmon;
21 ndien Salmon+ obon Boaz; Boaz+ onyụn̄ obon Obed;
22 ndien Obed obon Jesse;+ Jesse onyụn̄ obon David.+
