Utom 27;1-44
27 Ekem sia ẹma ẹkebiere ẹte nnyịn isio ika Italy,+ mmọ ẹyak Paul ye ndusụk mbon n̄kpọkọbi en̄wen ẹnọ akwa owoekọn̄ emi ekerede Julius ke otu udịmekọn̄ Augustus.
2 Ndien nnyịn idiere ke ubom emi otode Adramyttium emi okoyomde ndisio n̄ka mme ebiet emi ẹdude ke mbenesụk Asia,* inyụn̄ iwat isio, ndien Aristarchus+ owo Macedonia emi otode Thessalonica odu ye nnyịn.
3 Ndien ke ndan̄nsiere nnyịn idian ke Sidon, ndien Julius anam n̄kpọ ye Paul ke edu mfọnido+ onyụn̄ ayak enye aka ekese mme ufan esie man mmọ ẹse ẹban̄a enye.+
4 Ndien nnyịn isio ikpọn̄ do inyụn̄ iwat ke n̄kan̄ Cyprus emi ekwide nnyịn, sia ofụm abarade nnyịn ke iso;
5 nnyịn inyụn̄ iwat ke inyan̄ ibe Cilicia ye Pamphylia inyụn̄ ididian ke itiembehe Myra ke Lycia.
6 Edi do akwa owoekọn̄ oro okụt ubom emi otode Alexandria+ emi oyomde ndisio n̄ka Italy, ndien enye anam nnyịn idụk.
7 Ekem, ke ima ikawat sụn̄sụn̄ ke ediwak usen inyụn̄ in̄wana idisịm Cnidus, sia ofụm mîyakke nnyịn ika iso, nnyịn iwat ke n̄kan̄ Crete emi ekwide nnyịn ke Salmone,
8 inyụn̄ in̄wana iwat mben mben tutu idisịm ebiet emi ekerede Eti Itie Mbehe, emi obio Lasea odude ekpere.
9 Ke anyan ini ama ekebe, ndiwat uwat ke emi onyụn̄ edide n̄kpọndịk koro utreudia usen usio-isop+ ama ebebe, Paul ọnọ ekikere,
10 ọdọhọ mmọ ete: “Mme ete, mmokụt nte ke uwat emi oyosụn̄ọ ke nsobo ye akwa ntakurua ọnọ mbiomo ye ubom ye ukpọn̄ nnyịn.”+
11 Edi, akwa owoekọn̄ okop uyo awat ubom ye enyene ubom utu ke ndikop se Paul etịn̄de.
12 Ndien sia itiembehe ubom oro mîkọfọnke ikem ndidu ke ofụri ini etuep, ata ediwak mmọ ẹteme ẹte ẹsio ẹkpọn̄ do, man ẹse m̀mê mmimọ iyekeme ndisịm Phoenix ikodu do ke ini etuep; emi edi itiembehe ubom ke Crete emi asakde iso ese edem usiahautịn ke n̄kan̄ edere edere ye n̄kan̄ usụk usụk.
13 Ekem, ke ini ofụm usụk efịmede sụn̄sụn̄, mmọ ẹkere ke mmimọ iyekeme ndisịm ebiet oro ikaduakde, ntem mmọ ẹkot ukwak ubom ẹsio ẹnyụn̄ ẹtọn̄ọ ndiwat mben mben n̄ka Crete.
14 Nte ededi, ibịghike-bịghi ọkpọsọn̄ oyobio+ emi ekerede Euroaquilo abara osụhọde ediberi ubom.
15 Sia ofụm eberide ubom idiọk idiọk, ubom mînyụn̄ ikemeke ndiwat ke ubere ofụm oro, nnyịn itre ndinyan̄a idem ndien ofụm ada nnyịn asan̄a.
16 Ekem nnyịn ikesịm ekpri isuo emi ekwide nnyịn emi ekerede Cauda, ndien nnyịn in̄wana idụri ekpri ubom+ idian ke etak ubom.
17 Edi ke ẹma ẹkekot enye ẹsịn ke ubom, mmọ ẹtọn̄ọ ndida urụk mbọp ubom; ndien sia ẹfehede ndịk mbak idika ikabak ke utan Syrtis, mmọ ẹsụhọde n̄kpọ uwat ndien ofụm ada mmọ asan̄a ntre.
18 Edi sia oyobio esịn̄erede nnyịn ọkpọsọn̄ ọkpọsọn̄, ke ndan̄nsiere mmọ ẹtọn̄ọ ndision̄o n̄kpọ ke ubom nduọn̄ọ;+
19 ndien ke ọyọhọ usen ita, mmọ ẹda ubọk mmọ ẹsion̄o n̄kpọutom ubom ẹduọn̄ọ.
20 Ekem, ke ini utịn m̀mê ntantaọfiọn̄ mîwọrọke ke ediwak usen, akwa oyobio+ onyụn̄ esịn̄erede nnyịn, nnyịn iduọk idotenyịn ubọhọ ofụri ofụri.
21 Ndien ke ini mmọ mîdiaha udia ke anyan ini, Paul adaha ada ke ufọt mmọ+ onyụn̄ ọdọhọ ete: “Mme ete, akpakana ẹkop uyo mi, mbufo ikpokonyụn̄ isioho ikpọn̄ Crete idisobo nsobo ye ntakurua emi.+
22 Edi, ke emi mmeteme mbufo nte ẹdat esịt, koro ukpọn̄ baba owo mbufo kiet iditakke, ubom ikpọn̄ editak.
23 Koro okoneyo emi, angel+ Abasi emi edide andinyene mi, emi nnyụn̄ nnamde edisana utom+ nnọ, ama edida ekpere mi,
24 ọdọhọ ete, ‘Paul, kûfehe ndịk. Afo enyene ndida ke iso Caesar,+ ndien, sese! Abasi ayak kpukpru mmọ emi ẹwatde ye afo ọnọ fi ke ntatubọk.’
25 Ke ntre, mme ete, ẹdat esịt; koro mmenịm Abasi+ ke akpanikọ nte ke edidi kpa nte enye etịn̄de ọnọ mi.
26 Edi, nnyịn iyọfiọrọ ikabak ke isuo+ kiet.”
27 Ekem ke esịmde ọyọhọ okoneyo duopenan̄ nte ofụm akada nnyịn oyo ke inyan̄ Adria, ke ufọt okoneyo mme awat ubom ẹtọn̄ọ ndikere ẹte mmimọ imekpere obot.
28 Ndien mmọ ẹdomo utụn̄ọ mmọn̄ ẹnyụn̄ ẹkụt ẹte edi fathom* edịp; ntre ke mmọ ẹbe ẹka iso esisịt ẹnyụn̄ ẹtọn̄ọ ntak ẹdomo ẹkụt ẹte edi fathom efịt.
29 Ndien sia ẹfehede ndịk ẹte nnyịn imekeme ndikodoro ke itiat, mmọ ẹsion̄o ukwak ubom inan̄ ke etak ubom ẹduọn̄ọ ẹnyụn̄ ẹyom eyo esiere.
30 Edi ke ini mme awat ubom ẹyomde ndifen̄e n̄kpọn̄ ubom ẹnyụn̄ ẹsụkde ekpri ubom ke inyan̄ ẹnam nte iyom ndida ke iso ubom nduọn̄ọ ukwak ubom,
31 Paul ọdọhọ akwa owoekọn̄ ye mbonekọn̄ ete: “Ibọhọke mmọ emi ẹsọn̄ọ ẹdu ke ubom, mbufo idibọhọke.”+
32 Ekem mbonekọn̄ ẹsịbe urụk ekpri ubom+ ẹnyụn̄ ẹyak enye ọfiọrọ aka.
33 Edikem ke ini eyo ekperede ndisiere Paul ọtọn̄ọ ndisịn udọn̄ nnọ mmọ kpukpru ete ẹdia udia, ọdọhọde ete: “Mfịn edi ọyọhọ usen duopenan̄ nte mbufo ẹketie ẹbet ẹnyụn̄ ẹtie biọn̄, mbufo inyụn̄ idiaha n̄kpọ.
34 Ke ntre mmesịn udọn̄ nnọ mbufo nte ẹdia n̄kpọ, koro emi edi ke ufọn mbufo; koro ndomo idet+ ibuot mbufo kiet iditakke.”
35 Ke enye ama eketịn̄ ntem ama, enye n̄ko emen uyo, ọnọ Abasi ekọm+ ke iso kpukpru mmọ onyụn̄ obụn̄ ọtọn̄ọ ndita.
36 Ntre kpukpru mmọ ẹdat esịt ẹnyụn̄ ẹtọn̄ọ ndidia udia.
37 Edi, kpukpru nnyịn emi idude ke ubom ikedi ukpọn̄ ikie iba ye ata ye efịtekiet.
38 Ke ini mmọ ẹdiade udia ẹyụhọ, mmọ ẹtọn̄ọ ndinam ubom efere+ ke ndision̄o wheat nduọn̄ọ ke inyan̄.
39 Ke akpatre ke ini eyo esierede, mmọ idiọn̄ọke isọn̄ oro, edi mmọ ẹkụt itụn̄ inyan̄ibom emi enyenede esụk,+ ẹnyụn̄ ẹbiere ẹte, edieke mmimọ ikemede, iyakadian ubom do.
40 Ntre, mmọ ẹsịbe ukwak ubom, ẹyak mmọ ẹduọn̄ọ ke inyan̄ ẹnyụn̄ ẹtat urụk emi ẹkedade ẹbọp ubọi, ndien ke ẹma ẹkekot afara iso ubom ẹnọ ofụm, mmọ ẹwat ẹbịne esụk.
41 Ke ini mmọ ẹsịmde obom utan, mmọ ẹwat ubom ẹkedian ke obot ndien iso ubom owụhọ ke utan onyụn̄ ọsọn̄ọ afaha, edi odudu mbufụt ọtọn̄ọ ndiwụri etak ubom mbai mbai.+
42 Ndien mbonekọn̄ ẹbiere ndiwot mbon n̄kpọkọbi, mbak owo ndomokiet ediwọk ọbọhọ ọnyọn̄.
43 Edi akwa owoekọn̄ oyom ndinyan̄a Paul onyụn̄ akpan mmọ ndinam uduak mmọ. Ndien enye owụk mbon oro ẹkemede ndiwọk ewọk ete ẹduọ ẹdụk inyan̄ ẹnyụn̄ ẹbem iso ẹwọk ẹkesịm obot,
44 yak mmọ eken ẹnyụn̄ ẹnam ntre, ndusụk mmọ ẹfiọrọ ke enyọn̄ obukpọk ndusụk eken ẹfiọrọ ke enyọn̄ n̄kpọ efen emi ẹtode ke ubom. Ntem ke kpukpru mmọ ẹdisịm obot ke ifụre.+
