Ediwak owo ẹsisịn ibuot ẹsịn itọn̄ ẹn̄wana n̄kpọ kpukpru usen man ẹnyene se ẹdade ẹdu uwem. Edi nsio nsio afanikọn̄ ererimbot emi ẹkeme ndinam oro enen̄ede ọsọn̄. Nso inam idọhọ ntre?

• Ebiet ekededi emi afanikọn̄ etịbede, uwem esisọn̄ do etieti​—udia ye okụk ufọk esinen̄ede ọsọn̄ urua.

• Ke ini afanikọn̄ etịbede, ẹsisio ndusụk owo ke utom. Ndusụk owo ẹsinyụn̄ ẹnam utom emi owo mîkpehe ọfọn.

• Ke ini oyobio, unyekisọn̄ ye mme n̄kpọ ntre etịbede, emi esibiat itie mbubehe, ufọk ye mme akpan n̄kpọ eken emi mme owo ẹnyenede, ndien emi esinam mme owo ẹbuene.

• Edieke mûbiatke okụk ntịme ntịme, eyenyene se adade an̄wam idem ke usen nnanenyịn.

• Ke ini afanikọn̄ etịbede, ekeme ndidi okụk oro ekenịmde ye enye oro edin̄wanade idikemke se adade edep se oyomde. Onyụn̄ ekeme ndinam inyene fo iwọrọke n̄kpọ aba.

• Okụk ikemeke ndidep kpukpru n̄kpọ, utọ nte inemesịt ye ima ke ubon.

Bible ọdọhọ ete: “Ke inyenede se idiade ye se isịnede ye itie udakibuot, nnyịn iyọyụhọ ye mme n̄kpọ emi.”​—1 Timothy 6:8.

Edieke iyakde se inyenede ekem nnyịn, iyokop inemesịt ke ini inyenede ekpri se idade idu uwem. Item emi esinen̄ede an̄wam nnyịn akpan akpan ke ini nnyịn mînyeneke okụk.

Edieke oyomde ndiyak se enyenede ekem fi, ana etre ndibiat okụk ntịme ntịme. Edieke edide ubọk isịmeke itọn̄ anyanade, oyodụk akamba mfịna.