UTOM ukwọrọikọ nnyịn edi ata akpan utom, edi idịghe kpukpru mbon oro ikwọrọde ikọ inọ ẹdiọn̄ọ emi. Idem ndusụk mbon emi ẹyomde ndifiọk Bible isimaha ndiyak nnyịn ikpep mmọ Bible.

Da Gavin ke uwụtn̄kpọ. Enye ama esidụk mbono esop, edi ikenyịmeke owo ndomokiet ekpep imọ Bible. Gavin ọkọdọhọ ke imọ ikoyomke mme owo ẹdiọn̄ọ ke imọ inen̄ekede ifiọk Bible. Enye ikoyomke ndidi Ntiense Jehovah, ikonyụn̄ iyomke owo ndomokiet abian̄a imọ. Ndi emekere ke ẹkeme ndin̄wam utọ owo emi? Kere ban̄a ufọn oro mbon oro ẹkpepde Bible ẹbọde. Jehovah ọkọdọhọ nditọ Israel ete: “Ikọ mi ọyọtọi nte mbara, nte n̄ken̄e ukot edịm ke mbiet.” (Deuteronomy 31:19, 30; 32:2) Yak itịn̄ ekpri n̄kpọ iban̄a mbara inyụn̄ imen ukwọrọikọ nnyịn idomo ye mbara man ifiọk nte ikemede ndin̄wam “kpukpru orụk owo.”—1 Timothy 2:3, 4.

Mbara esitọi sụn̄sụn̄. Mmọn̄ emi odude ke ofụm esikabade mbara. Didie ke ikọ Jehovah ‘ọkọtọi nte mbara’? Enye ekesitịn̄ ikọ sụn̄sụn̄ ọnọ ikọt esie, itịn̄ke uyat uyat. Nnyịn ikpebe Jehovah edieke nnyịn mînyịkke mbon en̄wen ẹnịm se nnyịn inịmde. Ọfọn idọhọ mmọ ẹsitie ke idemmọ ẹkere se Bible ekpepde ẹnyụn̄ ẹnam ubiere idemmọ. Edieke inamde n̄kpọ ntem ye mme owo, mmọ ẹyenyịme se nnyịn itịn̄de, ndien ukwọrọikọ nnyịn eyenen̄ede enyene ufọn.

Mbara esinem owo ke idem. Ukwọrọikọ nnyịn eyenem mme owo edieke itiede ikere nsio nsio usụn̄ emi ikpan̄wamde mmọ ẹkpep akpanikọ. Eyenete emi ekerede Chris ekedi akpa owo emi ọkọdọhọde Gavin m̀mê enye akpama ndikpep Bible, edi enye ikakpakke-kpak Gavin. Utu ke oro, enye ama etie ekere nsio nsio n̄kpọ emi ikpanamde man Gavin ama ndineme Ikọ Abasi ye imọ. Chris ama ọdọhọ Gavin ke enyene akpan etop emi odude ke Bible, ndien ke ndifiọk etop emi ayanam se enye esikopde ke mbono esop enen̄ede an̄wan̄a enye. Ekem, Chris ama ọdọhọ enye ke mme prọfesi Bible ẹkenam imọ inịm ke Bible edi Ikọ Abasi. Emi ama anam mmọ ẹneme nte mme prọfesi Bible ẹkesude. Nneme emi ama enem Gavin, ndien ke akpatre, enye ama enyịme ndikpep Bible.

Mbara esinịm mbiet ye eto uwem. Ke ini ndaeyo, edịm isidepke ke Israel ke ediwak ọfiọn̄. Edieke mbara mîkpodụhe, mbiet ye eto ẹkpeyemede ẹnyụn̄ ẹkpan̄a. Jehovah ọkọdọhọ ke mme owo ẹyeyom ndikop ikọ imọ ukem nte mbon emi itọn̄ asatde ẹsiyomde mmọn̄. (Amos 8:11) Enye ọkọdọhọ ke mbon emi ẹyetde aran ẹditie “nte mbara eke otode Jehovah,” nte mmọ ẹdianade ye “mme erọn̄ en̄wen” ẹkwọrọ eti mbụk Obio Ubọn̄ Abasi. (Micah 5:7; John 10:16) Etop emi nnyịn ikwọrọde mi edi kiet ke otu n̄kpọ emi Jehovah anamde man mbon oro ẹmade akpanikọ ẹnyene nsinsi uwem. Didie ke afo ada etop emi?

Mbara edi edidiọn̄ Jehovah. (Deuteronomy 33:13) Ukwọrọikọ nnyịn edi edidiọn̄ ọnọ mbon oro ẹmade ndikop. Ukpepn̄kpọ Bible ekedi edidiọn̄ ọnọ Gavin, sia ukpepn̄kpọ emi ama anam enye enyene ibọrọ mbụme emi ẹkesifịnade enye. Enye ama enen̄ede esịn idem, ekem ana baptism, ndien idahaemi enye esisan̄a ye Joyce an̄wan esie ọkwọrọ eti mbụk Obio Ubọn̄ Abasi.

Ndimen utom ukwọrọikọ nnyịn ndomo ye mbara ekeme n̄ko ndinam nnyịn ikụt ke ukeme oro nnyịn owo kiet kiet isisịnde enyene ufọn. Ntak idọhọde ntre? Ntọi mbara kiet ikemeke ndinam isọn̄ ebịt, edi mbara ama awak ofụk isọn̄, isọn̄ eyebịt. Kpasụk ntre, se nnyịn owo kiet kiet inamde ke utom ukwọrọikọ ekeme nditie nnyịn nte ata ekpri n̄kpọ. Edi ke ini isede se ofụri ikọt Jehovah ẹnamde, iyokụt ke ẹkwọrọ eti mbụk nte ntiense ẹnọ “kpukpru mme idụt.” (Matthew 24:14) Ndi iyanam ukwọrọikọ nnyịn edi edidiọn̄ ọnọ mme owo? Iyanam, edieke ukwọrọikọ nnyịn etiede nte mbara—ọtọide sụn̄sụn̄, enemde owo ke idem, onyụn̄ anamde mme owo ẹnyene uwem.