Jehovah ama anam prọfet Ezekiel etịn̄ prọfesi ete ke ikọt imọ ẹyenyọn̄ ẹdi Isọn̄ Un̄wọn̄ọ ẹnyụn̄ ẹfiak ẹdiana kiet nte idụt kiet. Prọfesi oro owụt n̄ko ke ikọt Abasi ẹyediana kiet ẹtuak ibuot ẹnọ enye ke mme akpatre usen emi.

Jehovah ama ọdọhọ prọfet Ezekiel ewet n̄kpọ ke eto iba. Enye ọkọdọhọ enye ewet ikọ emi ke eto kiet, “Eke Judah ye eke nditọ Israel mme nsan̄a esie,” onyụn̄ ewet ke eto enye eken, “Eke Joseph, eto Ephraim, ye ofụri ufọk Israel mme nsan̄a esie.” Eto iba emi ẹyekabade ẹdi “eto kiet” ke ubọk Ezekiel.—Ezek. 37:15-17.

Nso ke “Ephraim” ada aban̄a? Jeroboam, akpa edidem obio ubọn̄ esien Israel duop, okoto esien Ephraim. Esien Ephraim  ẹma ẹwak ẹnyụn̄ ẹwọrọ etop. (Deut. 33:13, 17; 1 Ndi. 11:26) Ephraim ekedi eyen Joseph. (Num. 1:32, 33) Jacob, ete Joseph, ama enen̄ede ọdiọn̄ Joseph akan nditọ esie eken. Ntak edi oro ẹkekotde eto oro adade aban̄a obio ubọn̄ esien Israel duop, “eto Ephraim.” Anyan ini mbemiso Ezekiel eketịn̄de prọfesi emi aban̄ade eto iba, mbon Assyria ẹma ẹkan obio ubọn̄ esien Israel duop ke 740 mbemiso eyo Christ, ẹnyụn̄ ẹtan̄ mmọ ẹnyọn̄ obio mmọ nte ifịn. (2 Ndi. 17:6) Nte ini akakade, mbon Babylon ẹma ẹkan mbon Assyria. Ntem, ke ini Ezekiel eketịn̄de prọfesi emi aban̄ade eto iba, ata ediwak nditọ Israel ẹkedụn̄ọ ke nsio nsio obio oro Babylon akakarade.

Ke 607 mbemiso eyo Christ, mbon Babylon ẹma ẹkan obio ubọn̄ esien Israel iba ẹnyụn̄ ẹtan̄ mme owo ẹka idụt mmọ nte ifịn. Anaedi mmọ ẹma ẹnyụn̄ ẹtan̄ mbon obio ubọn̄ esien Israel duop oro ẹkesụhọde ẹnyọn̄ obio mmọ. Ndidem emi ẹtode esien Judah ẹkesikara obio ubọn̄ esien Israel iba emi. Mme oku ẹkesidụn̄ n̄ko ke Judah, sia mmọ ẹkesinam utom ke temple Jerusalem. (2 Chron. 11:13, 14; 34:30) Ntak edi oro ẹkekotde eto oro adade aban̄a obio ubọn̄ esien Israel iba, “eke Judah.”

Ini ewe ke ẹkemen eto iba emi ẹdian kiet? Ekedi ke ini emi nditọ Israel ẹkefiakde ẹnyọn̄ Jerusalem man ẹkefiak ẹbọp temple ke 537 mbemiso eyo Christ. Mbon obio ubọn̄ esien Israel iba ye mbon obio ubọn̄ esien Israel duop emi ẹkewọrọde ke ufụn ẹma ẹtiene ẹbọp temple. Ubahade ikodụhe aba ke otu nditọ Israel. (Ezek. 37:21, 22) Nditọ Israel ẹma ẹfiak ẹdiana kiet ẹtuak ibuot ẹnọ Jehovah. Prọfet Isaiah ye Jeremiah ẹma ẹtetịn̄ ke emi eyetịbe.—Isa. 11:12, 13; Jer. 31:1, 6, 31.

Nso ke prọfesi emi ekpep nnyịn aban̄a nte ikpatuakde ibuot inọ Jehovah? Enye ekpep nnyịn ke Jehovah ayanam kpukpru ikọt esie ‘ẹkabade ẹdi kiet.’ (Ezek. 37:18, 19) Ndi emi etịbe mfịn? Ih. Prọfesi emi ọkọtọn̄ọ ndisu ke 1919, ke ini Abasi eketịmde ikọt esie idem man ẹnam n̄kpọ esie onyụn̄ anam mmọ ẹfiak ẹdiana kiet. Satan ikemeke-keme nditọ ubahade ke otu mmọ aba.

Ini oro, ata ediwak ikọt Abasi ẹkedori enyịn nditiene Christ n̄kara ke heaven nte ndidem ye mme oku. (Edi. 20:6) Mmọ ẹketie nte eto Judah. Edi, nte ini akakade, ata ediwak mbon oro ẹkedoride enyịn ndidu uwem ke nsinsi mi ke isọn̄ ẹma ẹtọn̄ọ ndidian idem ye eyen Jew, oro edi, Israel Abasi. (Zech. 8:23) Mmọ emi ẹketie nte eto Joseph, mmọ ikonyụn̄ idorike enyịn nditiene Christ n̄kara ke heaven.

Otu mbiba emi ẹdiana kiet mfịn nte ikọt Abasi ẹnam n̄kpọ esie. Mmọ ẹnyene Edidem kiet, Jesus Christ, emi Bible okotde “David asan̄autom mi.” (Ezek. 37:24, 25) Jesus ama ọbọn̄ akam ọnọ Ete esie aban̄a mme mbet esie ete: “Kpukpru mmọ [ẹkpekam ẹdi] kiet, kpa nte afo Ete abuanade n̄kpọ ye ami, ami nnyụn̄ mbuanade n̄kpọ ye afo.” * (John 17:20, 21) Jesus ama onyụn̄ ọdọhọ ke ekpri otuerọn̄, oro edi, mbon oro ẹyetde aran ẹyediana kiet ye “mme erọn̄ en̄wen,” ẹnyụn̄ ẹkabade ẹdi “otuerọn̄ kiet.” “Ekpemerọn̄ kiet” edinyụn̄ ada kpukpru mmọ usụn̄. (John 10:16) Kpa nte Jesus ọkọdọhọde, kpukpru ikọt Abasi ẹdiana kiet mfịn ẹnam n̄kpọ esie, edide mmọ ẹdika heaven m̀mê ẹdidu uwem ke isọn̄.