1. Ntak emi nnyịn ikpọkọmde Jehovah ke ndinam nnyịn inyene mbuọtidem?

IDỤHE n̄kpọ emi ọfọnde ndinyene nte mbuọtidem! Edi, idịghe kpukpru owo ẹnyene mbuọtidem. (2 Thess. 3:⁠2) Kpa ye oro, Jehovah esin̄wam ikọt esie ẹnyene mbuọtidem. (Rome 12:3; Gal. 5:22) Imenen̄ede ikọm Jehovah ke ndinam nnyịn inyene mbuọtidem.

2, 3. (a) Nso ufọn ke idibọ edieke inyenede mbuọtidem? (b) Nso mbụme ke idineme idahaemi?

² Jesus Christ ọkọdọhọ ke owo ndomokiet ikemeke nditiene imọ ibọhọke Ete imọ odụri enye edi. (John 6:​44, 65) Abasi ekeme ndifen mme idiọkn̄kpọ nnyịn edieke ibuọtde idem ye Jesus, ndien emi ekeme ndinam nnyịn idu uwem ke nsinsi. (Rome 6:23) Esịt enem nnyịn etieti nte Abasi ọnọde nnyịn utọ akwa ifet emi, kpa ye emi nnyịn idide mme anamidiọk, mînyụn̄  idotke se enye akpatuade mbọm. (Ps. 103:10) Edi Jehovah ama okụt ke nnyịn imekeme ndinam se ifọnde. Ntre, ke ntak mfọnido esie oro owo mîdotke, enye ama anam nnyịn ikeme ndikop eti mbụk. Eti mbụk anam nnyịn ibuọt idem ye Jesus Christ inyụn̄ idori enyịn ndidu uwem ke nsinsi.​—⁠Kot 1 John 4:​9, 10.

³ Edi nso idi mbuọtidem? Ndi ndinyene mbuọtidem ọwọrọ ndidiọn̄ọ se Abasi anamde ọnọ nnyịn idahaemi, ye se aduakde ndinam ke ini iso? Nso ke ikpanam man iwụt ke imenyene mbuọtidem?

4. Ntak emi idọhọde ke isidịghe owo ama ọfọfiọk uduak Abasi ọwọrọ ke enye enyene mbuọtidem?

⁴ Isidịghe owo ama ọfọfiọk uduak Abasi ọwọrọ ke enye enyene mbuọtidem. Owo emi enyenede mbuọtidem esisịn idem anam uduak Abasi. Edieke ibuọtde idem ke Jesus emi Abasi edidade inyan̄a mme owo, nnyịn iyọkwọrọ eti mbụk inọ mbon en̄wen. Apostle Paul ọkọdọhọ ete: “Edieke afo atan̄ade ‘ikọ oro ke inua fo’ an̄wan̄wa, ete Jesus edi Ọbọn̄, onyụn̄ adade esịt fo ọbuọt idem ete, Abasi akanam enye eset ke n̄kpa, ẹyenyan̄a fi. Koro owo ada esịt ọbuọt idem enyene edinen ido, edi ada inua atan̄a an̄wan̄wa enyene edinyan̄a.”​—⁠Rome 10:​9, 10; 2 Cor. 4:⁠13.

5. Ntak emi enen̄erede ọfọn inyene mbuọtidem, ndien nso ke ikpanam mbak mbuọtidem nnyịn edimem? Nọ uwụtn̄kpọ.

⁵ Edieke iyomde ndidu uwem ke nsinsi ke obufa ererimbot, ana inyene mbuọtidem inyụn̄ inam mbuọtidem nnyịn ọsọn̄. Mbuọtidem onyụn̄ etie nte flawa. Oyom isiduọk mmọn̄ ke flawa man enye ọkọri onyụn̄ eye. Edieke owo mîduọkke mmọn̄ ke flawa, enye ekeme ndiyemede nnyụn̄ n̄kpa. Kpasụk ntre ke edi ye mbuọtidem nnyịn. Ana inam n̄kpọ mbak mbuọtidem nnyịn edimem. (Luke 22:32; Heb. 3:12) Edieke ikade iso ikpep Ikọ Abasi inyụn̄ inamde se ikpepde, mbuọtidem nnyịn eyetetịm ọsọn̄.​—⁠2 Thess. 1:3; Titus 2:⁠2.

6. Mme Hebrew 11:1 ọdọhọ ke mbuọtidem edi nso?

⁶ Bible etịn̄ se mbuọtidem edide ke Mme Hebrew 11:⁠1. (Kot.) Enye ọdọhọ ke: (1) Mbuọtidem edi “idotenyịn oro enyenede nsọn̄ọ nte ke se ẹtiede ẹbet eyedi.” Mme n̄kpọ oro itiede ibet esịne se Abasi ọn̄wọn̄ọde ndinam ke ini iso, utọ nte nditre idiọkido nnyụn̄ nnam isọn̄ edi Paradise. (2) Mbuọtidem edi “uyarade oro owụtde ke ata idem n̄kpọ odu okposụkedi enyịn mîkwe.” Nnyịn imọdiọn̄ọ ke Jehovah Abasi, Jesus Christ, mme angel, ye Obio Ubọn̄ heaven ẹdu, okposụkedi emi nnyịn mîkwe mmọ. (Heb. 11:⁠3) Didie ke ikeme ndiwụt ke imenịm ke mme n̄kpọ oro nnyịn mîkwe mi ẹdu? Didie ke ikeme n̄ko ndiwụt ke imenịm ke Abasi ayanam kpukpru se enye ọn̄wọn̄ọde? Nte itịn̄de ikọ ye nte inamde n̄kpọ ẹdiwụt emi. Emi oyowụt n̄ko ke imenen̄ede inyene mbuọtidem.

7. Didie ke uwụtn̄kpọ Noah an̄wam nnyịn ifiọk se ndinyene mbuọtidem ọwọrọde? (Se akpa ndise ibuotikọ emi.)

⁷ Mme Hebrew 11:7 ọdọhọ ke Noah ama enyene mbuọtidem. Itien̄wed oro ọdọhọ “ke Abasi ama ọkọnọ [Noah] ntọt aban̄a mme n̄kpọ oro owo mîkwe kan̄a, [Noah] owụt ke imabak Abasi onyụn̄ ọkọn̄ ubom ndida nnyan̄a mbonufọk esie.” Sia Noah ekenyenede mbuọtidem, enye ama ọkọn̄ akwa ubom. Anaedi mme owo ẹma ẹbụp enye ntak emi enye ọkọn̄de utọ akwa ubom oro. Ndi Noah okododop uyo? Ikodopke! Mbuọtidem ama  anam enye etịn̄ ọnọ mmọ ke Abasi ọmọn̄ osobo ererimbot oro. Etie nte Noah ama etịn̄ se Jehovah eketịn̄de ye enye ọnọ mmọ ete: “Utịt kpukpru obụkidem emedi ke iso mi, koro oto mmọ afai ọyọhọ isọn̄ . . . ami mmọn̄ nnam ukwọ mmọn̄ edep ke isọn̄ osobo kpukpru obụkidem emi odudu uwem odude mmọ ke idem ke idak ikpaenyọn̄. Kpukpru se idude ke isọn̄ ẹyekpan̄a.” Anaedi enye ama ọdọhọ mmọ ke ana ‘mmọ ẹdụk ubom’ oro man ẹbọhọ. Noah ndikọkwọrọ ikọ nnọ mme owo owụt ke enye ama enyene mbuọtidem. Bible okot enye “ọkwọrọ edinen ido.”​—⁠Gen. 6:​13, 17, 18; 2 Pet. 2:⁠5.

8. Nso ke James eketịn̄ aban̄a mbuọtidem?

⁸ Etie nte James ekewet n̄wed esie esisịt ini ke apostle Paul ama eketịn̄ se mbuọtidem edide. James n̄ko ama ọdọhọ ke ana owo owụt ke imenyene mbuọtidem, idịghe nditetịn̄ ke inua kpọt. Enye ọkọdọhọ ete: “Wụt mi mbuọtidem fo eke mîsan̄ake ye utom, ndien ami nyada utom n̄wụt fi mbuọtidem mi.” (Jas. 2:18) Enye ama owụt n̄ko ke owo ndinịm ke Abasi odu iwọrọke ke enye ọbuọt idem ye Abasi. Ke uwụtn̄kpọ, mme demon ẹnịm ke Abasi do, edi mmọ ibuọtke idem ye enye. Utu ke oro, mmọ ẹkam ẹbọbiọn̄ọ uduak esie. (Jas. 2:​19, 20) Edi James eketịn̄  ntem aban̄a Abraham emi ọkọbuọtde idem ye Abasi: “Nte owo ikabatke Abraham ete nnyịn ke edinen ke ntak utom ke enye ama akayak Isaac eyen esie ọnọ ke itieuwa? Afo omokụt ete ke mbuọtidem esie akasan̄a ye utom esie ndien utom esie ama anam mbuọtidem esie ọfọn ama.” Ekem enye ama owụt ke ana mbuọtidem asan̄a ye utom, onyụn̄ ọdọhọ ete: “Kpa nte idem eke mînyeneke spirit akpade, ntre n̄ko ke mbuọtidem eke mîsan̄ake ye utom akpa.”​—⁠Jas. 2:​21-23, 26.

9, 10. Didie ke apostle John anam nnyịn ifiọk ntak emi anade inyene mbuọtidem?

⁹ Ke n̄kpọ nte isua 30 ama ekebe ke James ama eketịn̄ aban̄a mbuọtidem, apostle John ama ewet Gospel esie. Enye ama onyụn̄ ewet akpa, udiana, ye ọyọhọ n̄wed John ita. Enye n̄ko ama enen̄ede ọfiọk se mbuọtidem edide. Enye ama etiene etịn̄ n̄kpọ aban̄a mbuọtidem.

¹⁰ Ke uwụtn̄kpọ, enye ọkọdọhọ ete: “Owo eke ọbuọtde idem ke Eyen enyene nsinsi uwem; owo eke ọsọn̄de ibuot ye Eyen idikwe uwem, edi iyatesịt Abasi odoro enye ke idem.” (John 3:36) Ana owo oro ọbuọtde idem ye Jesus Christ okop uyo esie. Ke ini ikotde Gospel John, iyokụt ke Jesus etịn̄ ediwak ini ete ke ana nnyịn ika iso ibuọt idem ye imọ, edieke iyomde ndinyene nsinsi uwem.​—⁠John 3:16; 6:​29, 40; 11:​25, 26; 14:​1, 12.

11. Didie ke ikeme ndiwụt ke imama kpukpru se Jehovah anamde ọnọ nnyịn?

¹¹ Imọkọm Jehovah etieti nte enye adade edisana spirit esie anam nnyịn ifiọk enye ye Eyen esie, inyụn̄ ibuọt idem ye mmọ. (Kot Luke 10:21.) Nnyịn iyaka iso ndikọm Jehovah ke ndida Eyen esie emi edide “Akpan Isụn̄utom ye Andinam mbuọtidem nnyịn ọfọn ama,” ndụri nnyịn nnọ idemesie. (Heb. 12:⁠2) Ana ika iso ndibọn̄ akam nnyụn̄ n̄kpep Bible man itetịm ibuọt idem ye Jehovah inyụn̄ iwụt enye ke imama kpukpru se enye anamde ọnọ nnyịn emi.​—⁠Eph. 6:18; 1 Pet. 2:⁠2.

12. Nso ke ikpanam man iwụt ke imenyene mbuọtidem?

¹² Ana inam n̄kpọ ndiwụt ke imọbuọt idem ye Jehovah inyụn̄ inen̄ede inịm ke enye ayanam se enye ọn̄wọn̄ọde. Ke uwụtn̄kpọ, ana ika iso ikwọrọ eti mbụk Obio Ubọn̄ Abasi inyụn̄ inam mme owo ẹdi mbet. Ana inyụn̄ ika iso “inam se ifọnde inọ kpukpru owo, edi akpan akpan mmọ emi ẹbuanade n̄kpọ ye nnyịn ke mbuọtidem.” (Gal. 6:10) Adianade do, ana isịn ofụri ukeme nnyịn ‘ndisio akani owo ye mme edinam esie nduọk,’ ikûnyụn̄ unam n̄kpọ ekededi oro ekemede ndinam mbuọtidem nnyịn emem.​—⁠Col. 3:​5, 8-10.

13. (a) Ntak emi ‘ndibuọt idem ke Abasi’ edide akpan n̄kpọ? (b) Ẹmen mbuọtidem ẹdomo ye nso, ndien ntak-a?

¹³ Bible ọdọhọ ke “mbuọtidem mîdụhe owo ikemeke nditịm nnem [Abasi] esịt, koro ana owo eke asan̄ade ekpere Abasi enịm ete enye odu ye nte ke enye edi andinọ mbon oro ẹnen̄erede ẹyom enye utịp.” (Heb. 11:⁠6) Bible owụt ke ‘ndibuọt idem ke Abasi’ etie nte “itiat idakisọn̄,” sia mbuọtidem esin̄wam owo edi asan̄autom Abasi onyụn̄ ọsọn̄ọ ada anam n̄kpọ Abasi. (Heb. 6:⁠1) Edi ana ikọt Abasi ‘ẹdian nti edu en̄wen ke mbuọtidem mmọ,’ man mmọ ẹkeme ‘ndinịm idem mmọ ke ima Abasi.’​—⁠Kot 2 Peter 1:​5-7; Jude 20, 21.

14, 15. Nso ke ekpetịn̄ aban̄a ima ye mbuọtidem?

¹⁴ Mme andiwet Bible ẹtịn̄ ediwak ini  ke ọfọn inyene mbuọtidem. Mmọ ẹtịn̄ n̄kpọ ẹban̄a mbuọtidem ẹkan nte ẹtịn̄de ẹban̄a edu en̄wen. Ndi emi ọwọrọ ke mbuọtidem ọfọn akan kpukpru edu eken?

¹⁵ Paul ama emen mbuọtidem odomo ye ima, onyụn̄ ọdọhọ ete: “Edieke . . . nnyenede mbuọtidem n̄kem ndidịbede ikpọ obot mfep, edi nnyeneke ima, ndịghe n̄kpọ ndomokiet.” (1 Cor. 13:⁠2) Ke ini ẹkebụpde Jesus m̀mê “ewe edi n̄kponn̄kan ewụhọ ke Ibet,” enye ọkọdọhọ ke edi ndima Abasi. (Matt. 22:​35-40) Ima an̄wam nnyịn inyene nti edu eken emi edinamde Abasi ama nnyịn. Ke uwụtn̄kpọ, Bible ọdọhọ ke ima “enenịm kpukpru n̄kpọ ke akpanikọ.” Emi ọwọrọ ke ima ayanam nnyịn inịm m̀mê ibuọt idem ke kpukpru n̄kpọ oro Jehovah etịn̄de ke Bible.​—⁠1 Cor. 13:​4, 7.

16, 17. (a) Ewe itie N̄wed Abasi ke ẹsiak ima ye mbuọtidem ọtọkiet? (b) Ewe ke otu edu iba emi okpon akan, ndien ntak-a?

¹⁶ Sia mbuọtidem ye ima ẹdide ata akpan edu, mme andiwet Bible ẹsiwak ndisiak mmọ mbiba ọtọkiet. Paul ọkọdọhọ nditọete esie oro ẹyetde aran ete “[ẹsịne] mbuọtidem ye ima nte ukwak ikpanesịt.” (1 Thess. 5:⁠8) Peter ọkọdọhọ ete: “Okposụkedi akanam mbufo mîkwe [Jesus], mbufo ẹmema enye. Okposụkedi mbufo mîkwe enye idahaemi, mbufo ẹmebuọt idem ye enye.” (1 Pet. 1:⁠8) James ama obụp nditọete esie oro ẹyetde aran ete: “Nte Abasi ikemekke mbon oro ẹdide ubuene ke n̄kpọ ererimbot emi ite ẹforo ke mbuọtidem ẹnyụn̄ ẹdi mme andida obio ubọn̄ nnyene, emi enye ọkọn̄wọn̄ọde ndinọ mbon oro ẹmade enye?” (Jas. 2:⁠5) John ọkọdọhọ esie ete: “Ewụhọ [Abasi] edi ntem, ete, nnyịn ibuọt idem ke enyịn̄ Eyen esie Jesus Christ inyụn̄ ima kiet eken.”​—⁠1 John 3:⁠23.

¹⁷ Ke Obio Ubọn̄ Abasi, ufọn ididụhe aba ndibuọt idem ke se Abasi ọn̄wọn̄ọde, sia kpukpru se enye ọkọn̄wọn̄ọde oyosu. Edi nnyịn idisụk ikaka iso ndima Abasi ye mme owo. Ntak edi oro Paul ọkọdọhọde ete: “Edi, mbuọtidem, ye idotenyịn, ye ima, ẹsụk ẹdodu, mbita emi; edi andikpon n̄kan ke otu mmọ edi ima.”​—⁠1 Cor. 13:⁠13.

18, 19. Nso iwụt ke ikọt Abasi ẹnen̄ede ẹnyene mbuọtidem mfịn, ndien anie anam emi etịbe?

¹⁸ Ikọt Abasi ẹnen̄ede ẹnịm mfịn ke Obio Ubọn̄ Abasi ama ọtọn̄ọ ndikara ke heaven, mmọ ke ẹnyụn̄ ẹkwọrọ ẹban̄a Obio Ubọn̄ emi. Emi anam se ibede Mme Ntiense Jehovah miliọn itiaita ke ofụri ererimbot ẹdiana kiet ẹnyụn̄ ẹdu ke emem ke ndamban̄a paradise, sia edisana spirit ada mmọ usụn̄. (Gal. 5:​22, 23) Emi owụt ke ikọt Abasi ẹnen̄ede ẹnyene mbuọtidem ye ima!

¹⁹ Idụhe owo ndomokiet emi ekemede ndinam nnyịn idiana kiet ntem. Jehovah Abasi kpọt anam nnyịn ikeme ndidiana kiet nnyụn̄ ndu ke emem ke ofụri ererimbot. Se Jehovah Abasi anamde emi anam enye ‘ọwọrọ etop.’ N̄kpọ emi ‘edi nsinsi idiọn̄ọ oro owo mîdisịbeke ifep.’ (Isa. 55:13) Esịt enen̄ede enem nnyịn ke Jehovah ayan̄yan̄a nnyịn ke ntak emi ibuọtde idem ye enye. (Eph. 2:⁠8) Jehovah ayaka iso anam ediwak owo ẹdidụk ndamban̄a paradise emi tutu esịm ini emi enye edinamde isọn̄ edi ata ata Paradise. Ini oro, kpukpru owo ẹyefọn ẹma ẹnyụn̄ ẹkop inemesịt nditoro Jehovah ke nsinsi. Ẹyak kpukpru nnyịn ika iso iwụt ke imọbuọt idem ke Jehovah ayanam se enye ọn̄wọn̄ọde!