Ediwak Owo ke Ererimbot Ẹnyene Mfịna Ibuot
“Esịt esitịmede mi kpukpru ini, ekpededi n̄kpọ ndomokiet itịbeke.”
“Esidi esịt ke enem mi aka etise ntọn̄ọ ndifụhọ. Mmesidiọn̄ọ ke ini ekededi esịt enen̄erede enem mi ke nyofụhọ ke akpatre.”
“Mmesidomo nditre nditịmede esịt mban̄a n̄kpọn̄, edi ndusụk ini esịt esitịmede mi aban̄a ediwak n̄kpọ eken.”
Ndi se mbon emi ẹnyenede mfịna ibuot ẹtịn̄de mi an̄wan̄a fi? Ndi ukem n̄kpọ emi ọwọrọ fi m̀mê owo fo?
Diọn̄ọ ke idịghe afo ikpọn̄ ke utọ n̄kpọ emi etịbe ọnọ. Ata ediwak owo ke ererimbot ẹnyene mfịna ibuot mîdịghe owo mmọ enyene mfịna emi.
Kpukpru nnyịn imokụt ke idu ke “ndiọkeyo emi ọsọn̄de ndiyọ” onyụn̄ asan̄ade ye afanikọn̄. (2 Timothy 3:1) Ndụn̄ọde kiet ẹkenamde owụt ke owo kiet ke otu kpukpru owo itiaita ke ererimbot ẹnyene mfịna ibuot. Ke 2020, COVID-19 ama anam esịt enen̄ede etịmede n̄kpọ nte owo 26 ke otu kpukpru owo 100 akan nte ekedide ke isua 2019. N̄kpọ nte owo 28 ke otu kpukpru owo 100 ẹnyụn̄ ẹnen̄ede ẹfụhọ ẹkan nte ekedide ke 2019.
Imọdiọn̄ọ ke ata ediwak owo mfịn ẹnyene mfịna ibuot. Edi ọfọn idiọn̄ọ m̀mê nnyịn m̀mê owo nnyịn etiene enyene mfịna emi.
Mfịna ibuot esinam owo didie?
Mfịna ibuot isiyakke owo okop idem inem, ekere n̄kpọ ọfọn, onyụn̄ anam utom ọfọn.
Mfịna ibuot . . .
-
ISINAMKE OWO ke ntak emi owo mîsọn̄ke idem, inyụn̄ itoho enyene-idem.
-
ESINAM OWO ke ntak emi owo enen̄erede ofụhọ, isinyụn̄ iyakke owo ekere n̄kpọ ọfọn onyụn̄ anam se akpanade enye anam.
-
Ekeme ndinam owo ikemeke ndidian idem ye mbon en̄wen inyụn̄ ikemeke ndinam n̄kpri n̄kpri n̄kpọ emi akpanade enye anam ke usen ke usen.
-
Ekeme ndinam owo ekededi—eyenọwọn̄ m̀mê akwaowo inamke n̄kpọ m̀mê enye oto m̀mọ̀n̄, m̀mê ewe ufọkabasi ke enye aka, m̀mê ọdiọn̄ọ n̄wed m̀mê idiọn̄ọke, m̀mê edi imọ m̀mê ubuene.
Se ikemede ndin̄wam owo emi enyenede mfịna ibuot
Edieke afo m̀mê owo fo ọtọn̄ọde ndinam n̄kpọ nte mîkesinamke, ọsọn̄de ndide idap m̀mê edede idap akaha, ọsọn̄de ndidia udia m̀mê adiade udia akaha, okopde ọkpọsọn̄ editịmede esịt m̀mê ọkpọsọn̄ mfụhọ, ọfọn aka ufọkibọk man ọdiọn̄ọ se idide mfịna ye se akpanamde.
Jesus Christ emi enyenede ifiọk akan kpukpru owo ọkọdọhọ ete: “Mbon emi idem ọsọn̄de isiyomke abiausọbọ, edi mbon oro idem mîsọn̄ke ẹsiyom.” (Matthew 9:12) Mbon emi idem mîsọn̄ke emi ẹkade ẹbịne dọktọ ẹnyụn̄ ẹbọde usọbọ ẹsikop nsọn̄idem, ẹda uwem mmọ ẹnam akpan n̄kpo, ẹnyụn̄ ẹkop inemesịt. Ọfọn owo aka ufọkibọk edieke mfịna esie mîmaha ndikụre onyụn̄ enen̄erede ọsọn̄ ubọk. a
Kpa ye emi Bible mîdịghe n̄wed usọbọ, se enye etịn̄de ekeme ndin̄wam owo emi ọdọn̄ọde. Mbọk kot mme ibuotikọ eken ke magazine emi man okụt nte Bible ekemede ndin̄wam owo emi enyenede mfịna ibuot.
a Enyọn̄-Ukpeme imekke usọbọ inọ owo. Owo kiet kiet enyene nditịn̄ enyịn nyom nsio nsio usọbọ oro ẹdude ndien ekem enye ke idem esie emek enye oro enye edidade.
Ekeme Ndidi Ayama Mmọ Emi N̄ko
BIBLE EKEME NDIBỌRỌ MBỤME FO
Ndi Bible Ekeme Ndin̄wam Mi ke Ini Ọkpọsọn̄ Mfụhọ?
Odu n̄kpọ ita emi Abasi ọnọde man an̄wam nnyịn ke ini ọkpọsọn̄ mfụhọ.
ESSENTIAL BIBLE TEACHINGS
Ntak Emi Abasi Ayakde Mme Owo Ẹbọ Ufen?
Ediwak owo ẹsibụp ntak emi usua ye ufen okponde ntem ke ererimbot emi. Bible ọnọ ata eti ntak emi ọdọn̄de owo esịt.
N̄KPARAWA OWO ẸBỤP
Nso ke N̄kpanam Man Nditịmede Esịt N̄kaha?
Enyene n̄kpọ itiokiet emi akpanamde man udutịmede esịt ukaha.
ẸKÛTIE KE NDUE-IDEM!
Ibat Mme Uyen Emi Ẹnyenede Mfịna Ibuot ke Ọdọk—Nso ke Bible Etịn̄?
Bible etịn̄ se idin̄wamde mme uyen emi ẹsifụhọde.
ABAN̄A NNYỊN
Dọhọ Mmọ Ẹdi Ufọk
Se nte Bible ekemede ndibọrọ mbụme fo, mîdịghe kpep n̄kpọ ban̄a Mme Ntiense Jehovah.
