Edieke oyomde ndika ebiet emi mûkaha akpa, nso ke edinam?

1. 1. Odụk usụn̄ ekededi emi odụkde fi ibuot.

2. 2. Etiene mbon emi ekerede ke mmọ ẹdiọn̄ọ usụn̄.

3. 3. Oyom n̄kpọ emi ekemede ndin̄wam fi, utọ nte n̄kpọ emi ntaifiọk ẹsiode ẹdi, emi esin̄wamde owo ọdiọn̄ọ ebiet emi enye akade (GPS), map, m̀mê etiene ufan fo emi enen̄erede ọdiọn̄ọ usụn̄.

Akpanam akpa m̀mê ọyọhọ n̄kpọ iba, ọmọdọdiọn̄ọ nan̄a ke udûsịmke ebiet emi okoyomde ndika. Edi edieke anamde ọyọhọ ita, eyesịm nnennen ebiet emi okoyomde ndika usopke usụn̄.

Uwem nnyịn etie nte ndika isan̄ emi edidade nnyịn ikesịm inem uwem ke ini iso. Se ibierede ndinam ediwụt m̀mê iyesịm do m̀mê nnyịn idisịmke.

Kpa ye oro ndusụk se isibierede esinyenede ufọn ke ekpri ini, ndusụk se isibierede esidi ata akpan n̄kpọ. Se isibierede emi esiwụt se idade ke ọfọn ye se idade ke ọdiọk. Se ibierede ekeme ndifọn mîdịghe afịna nnyịn ye mbon nnyịn. Se ikemede ndibiere emi esịne:

• Idan̄ ye ndọ

• Ndinam akpanikọ, utom, ye okụk

• Nte ikpọbọkde nditọ

• Nte ikpesinamde n̄kpọ ye mbon en̄wen

Edisan̄a didie idiọn̄ọ ke se ebierede ndinam ke mme n̄kpọ ẹbatde mi ayanam fi ye ubon fo ẹkeme ndikop inemesịt ke ini iso?

Mbụme anade ibụp idem nnyịn idahaoro edi: Nso idin̄wam mi mbiere ndinam se ifọnde ye se idiọkde?

Magazine emi ayanam ikụt ntak oro ikpenịmde se Bible ọdọhọde ke ọfọn ye se enye ọdọhọde ke ọdiọk, ye nte ndidiọn̄ọ oro edin̄wamde nnyịn.