IBUOTIKỌ MAGAZINE EMI | NDI AYAMA NDIBỌ AKAKAN ENỌ ABASI?
Nso Inam Enen̄ede Ama Akakan Enọ Abasi?
Nso isinam enen̄ede ama enọ emi ẹnọde fi? Anaedi n̄kpọ inan̄ emi ẹsinam: (1) owo emi ọkọnọde fi enọ oro, (2) ntak emi enye ọkọnọde fi, (3) se enọ oro akakpade enye, ye (4) se enọ oro anamde ọnọ fi. Ndikere mban̄a n̄kpọ inan̄ emi ayanam inen̄ede ima ufak oro edide akakan enọ Abasi.
ANIE ỌKỌNỌ ENỌ EMI?
Se isinamde inen̄ede ima ndusụk enọ edi owo emi ọkọnọde nnyịn enọ oro. Edieke akwa owo m̀mê owo emi nnyịn inen̄erede ikpono ọnọde nnyịn n̄kpọ, nnyịn isidaha enọ oro ibre mbre. Ntre n̄ko ke isima enọ emi iman nnyịn m̀mê edima ufan nnyịn ọnọde nnyịn; imesima enọ oro ọkpọkọm isọn̄ke urua. Se ikanamde Jordan, oro iketịn̄de iban̄a ke akpa ibuotikọ, ama enọ Russell edi oro. Didie ke emi an̄wam nnyịn idiọn̄ọ nte ikpadade ufak?
Akpa, Bible ọdọhọ ke “Abasi [okosio] ikpọn̄-ikpọn̄ edibon Eyen esie ọdọn̄ edi ke ererimbot man nnyịn ikpenyene uwem ebe ke enye.” (1 John 4:9) Emi anam enọ emi etetịm ọsọn̄ urua. Idụhe owo emi okponde akan Abasi. Andiwet psalm kiet eketịn̄ ntem aban̄a Abasi: “Afo, emi enyịn̄ fo edide Jehovah, afo ikpọn̄ edi Ata Edikon̄ ke ofụri isọn̄.” (Psalm 83:18) Owo emi okponde akan ke ofụri ekondo ọnọ nnyịn enọ emi.
Ọyọhọ iba, Abasi edi “Ete nnyịn.” (Isaiah 63:16) Ntak emi idọhọde ke Abasi edi Ete nnyịn? Enye ọkọnọ nnyịn uwem. Enye n̄ko esise aban̄a nnyịn nte eti ete esede aban̄a nditọ esie. Enye okokot ikọt esie ke eset Ephraim onyụn̄ ọdọhọ ete ke Ephraim edi edima eyen imọ, ndien ke imọ iditreke nditua enye mbọm. (Jeremiah 31:20) Kpasụk ntre ke Abasi ada mbon oro ẹtuakde ibuot ẹnọ enye mfịn. Enye edi Andibot nnyịn, edima Ete nnyịn, ye ata Ufan nnyịn. Oro anam nnyịn inen̄ede ima se ededi oro enye ọnọde nnyịn.
NTAK EMI ABASI ỌKỌNỌDE NNYỊN ENỌ EMI-E?
Imesinen̄ede ima ndusụk enọ ke ini ifiọkde ke ẹnọ nnyịn n̄kpọ oro ke ntak ima, ke andinọ inọhọ sia onyụn̄ anade ọnọ. Owo emi esitatde esịt ọnọ owo n̄kpọ isinamke emi man mbon en̄wen ẹnọ imọ n̄kpọ n̄ko.
Abasi ọkọnọ nnyịn Eyen esie sia enye amade nnyịn. Bible ọdọhọ ete: “Ẹkeda emi ẹwụt ima oro Abasi amade nnyịn, koro Abasi okosiode ikpọn̄-ikpọn̄ edibon Eyen esie ọdọn̄ edi ke ererimbot man nnyịn ikpenyene uwem ebe ke enye.” (1 John 4:9) Ndi Abasi akanam emi sia onyụn̄ anade enye anam? Ihih! “Ufak oro Christ Jesus ekekpede” edi “mfọnido [Abasi] oro owo mîdotke.”—Rome 3:24.
Ntak emi enọ Abasi emi edide ‘mfọnido oro owo mîdotke’? Bible ọdọhọ ete: “Abasi owụt ima eke enye amade nnyịn ke emi Christ akakpade ke ibuot nnyịn ke adan̄aemi nnyịn isụk idide mme anamidiọk.” (Rome 5:8) Ata ima akanam Abasi ọnọ Eyen esie edikpa ọnọ nnyịn mme anamidiọk emi mîkemeke ndinyan̄a idem. Idụhe se nnyịn ikanamde emi akpanamde idot ndibọ enọ emi, ndien tutu amama nnyịn idikemeke ndinọ Abasi se enye ọkọnọde nnyịn. Enọ emi owụt ke Abasi enen̄ede ama nnyịn. Idụhe ima emi okponde ntem!
ENỌ EMI AKAKPA ABASI NSO?
Imesinen̄ede ima ndusụk enọ ke ini ifiọkde se enọ oro akakpade andinọ. Ke ini owo enyịmede ndiyak n̄kpọ emi enye adade ke ọsọn̄urua nnọ nnyịn, imesinen̄ede ima enọ oro.
Abasi ọkọnọ nnyịn “ikpọn̄-ikpọn̄ edibon Eyen esie.” (John 3:16) Eyen esie emi ke enye akama akan. Ke ofụri isua emi Abasi okobotde ekondo, Jesus ama etiene enye anam utom onyụn̄ ‘adat enye esịt kpukpru usen.’ (Mme N̄ke 8:30) Jesus edi “Eyen ima” Abasi onyụn̄ edi “mbiet Abasi oro enyịn mîkwe.” (Colossae 1:13-15) Idụhe owo iba emi ẹmade kiet eken nte Jesus ye Ete esie ẹmade idemmọ.
Kpa ye oro, Abasi ‘ikemen̄eke ndinọ Eyen esie’ edikpa ọnọ nnyịn. (Rome 8:32) Jehovah ọkọnọ nnyịn Eyen emi enye amade akan. Idụhe enọ en̄wen emi akpade enye n̄kpọ ntem.
SE ENỌ ORO ANAMDE ỌNỌ NNYỊN
Imesima enọ emi enen̄erede enyene ufọn ọnọ nnyịn, akpan akpan edieke enọ oro akanyan̄ade nnyịn. Ke uwụtn̄kpọ, edieke ọdọn̄ọde n̄kpa n̄kpa, ndien unyeneke okụk uka ufọkibọk ukûsọbọ idem, edi owo edinọ fi okụk ọkọsọbọ idem. Ndi ekpefre se owo oro anamde ọnọ fi?
“Kpa nte otode ke Adam kpukpru owo ẹkpan̄a, kpasụk ntre ke Christ ẹyenam kpukpru owo ẹdu uwem.” (1 Corinth 15:22) Kpukpru nnyịn ikadada idiọkn̄kpọ ye n̄kpa ito Adam, ntak edi oro Bible ọdọhọde ke kpukpru owo ẹkpan̄a. Nnyịn ikemeke ndinam emem ye Abasi ke idem nnyịn inyụn̄ ikemeke ndifak owo en̄wen. Ntak edi oro Bible ọdọhọde ete: “Baba owo mmọ kiet ikemeke ndifak eyenete esie, m̀mê ndinọ Abasi ufak ibuot esie; ndien ekọmurua ufak ukpọn̄ mmọ enen̄ede okpon tutu owo ikemeke ndikpe enye ke nsinsi.” (Psalm 49:7, 8) Imenen̄ede iyom owo an̄wam nnyịn sia nnyịn mîkemeke ndifak idem nnyịn. Mîkpedịghe Abasi, eke nnyịn okpokụre.
Sia Jehovah enen̄erede ama nnyịn, enye ama anam Jesus edikpa ọnọ nnyịn. Didie ke n̄kpa Jesus anam nnyịn idu uwem? “Iyịp Jesus Eyen esie eyet nnyịn isana ke kpukpru idiọkn̄kpọ.” Mbuọtidem emi inyenede ke iyịp Jesus anam Abasi efen mme idiọkn̄kpọ nnyịn onyụn̄ anam ikeme ndinyene 1 John 1:7; 5:13) Nso ke ufak emi edinam inọ mbon nnyịn oro ẹkekpan̄ade? Akpa Corinth 15:21 ọbọrọ ete: “Kpa nte n̄kpa otode owo, ediset mme akpan̄kpa oto owo n̄ko,” oro edi, Jesus. *
nsinsi uwem. (Idụhe owo emi okponde akan Abasi emi ọkọnọde Jesus edikpa ọnọ nnyịn, inyụn̄ idụhe ima emi okponde akan emi. Idụhe enọ emi akpade owo n̄kpọ nte Jehovah Abasi ndinọ Jesus edikpa ọnọ nnyịn. Inyụn̄ idụhe enọ emi enyenede ufọn ọnọ nnyịn nte uwa emi osiode nnyịn ke idiọkn̄kpọ ye n̄kpa. Ke akpanikọ, idụhe enọ emi ọsọn̄de urua nte ufak.
^ ikp. 19 Edieke oyomde ndifiọk n̄kpọ en̄wen mban̄a se Abasi aduakde ndinam nnọ mme akpan̄kpa, mbọk kot ibuot 7 ke n̄wed Nso ke Bible Ekpep Nnyịn? mme Ntiense Jehovah emi, n̄wed emi odu n̄ko ke www.ps8318.com/efi.