IDỤHE SE IKPENEMDE NTEM! Abasi emi okobotde nnyịn ọn̄wọn̄ọ ndinam nnyịn idu uwem ke nsinsi ke isọn̄ emi. Edi ediwak owo inịmke ke emi ekeme nditịbe. Mmọ ẹdọhọ ke kpukpru owo ẹnyene ini emi mmọ ẹdikpade. Ntak edi oro ndusụk owo ẹsidọhọde ke ererimbot edi urua, anyam ama ọnyọn̄. Mbon en̄wen ẹnịm ke imekeme ndidu uwem ke nsinsi, edi ke ididịghe ke isọn̄ emi. Mmọ ẹdọhọ ke owo edidu uwem ke nsinsi ke ini enye akpade adaha heaven. Afo ekere didie?

Mbemiso ọbọrọde mbụme emi, ọkpọfọn ọfiọk nte Bible ọbọrọde mbụme ita emi: Ke ini isede nte Abasi okobotde owo, nso ke oro anam ifiọk iban̄a nte enye okoyomde owo odu uwem ebịghi eketre? Nso ke Abasi akaduak aban̄a isọn̄ ye mme owo? Nso ikanam mme owo ẹtọn̄ọ ndikpa?

Ke otu kpukpru se Abasi okobotde ke isọn̄ emi, idụhe eke etiede nte owo. Ntak-a? Bible ọdọhọ ke owo ikpọn̄ ke Abasi okobot ke “mbiet esie.” (Genesis 1:​26, 27) Nso ke oro ọwọrọ? Ọwọrọ ke Abasi ama anam mme owo ẹnyene mme edu emi Enye ke idemesie enyenede, utọ nte ndima mme owo nnyụn̄ mma se inende.

N̄ko, Abasi ama anam mme owo ẹkeme ndisikere n̄kpọ, ndifiọk se idide eti ye idiọk, onyụn̄ anam ọdọn̄ mme owo ndikpep n̄kpọ mban̄a enye nnyụn̄ ndi ufan esie. Ntak edi oro nnyịn ikemede ndifiọk nte ekondo okponde ye nte mme n̄kpọ oro Abasi obotde ẹnyenede ndyọ. Oro n̄ko esinam ima mme utọ n̄kpọ nte utomusọ, ikwọ, ye uto. Se ikande kpukpru emi edi ke owo kpọt ekeme ndituak ibuot nnọ Abasi. Mme n̄kpọ emi ẹnam owo enen̄ede okpụhọde ye mme odu-uwem n̄kpọ eken oro Abasi okobotde ke isọn̄.

Ndi emekere ke Abasi ọkpọnọ nnyịn utọ ifiọk oro inyenede mi onyụn̄ ọnọ nnyịn ukeme ndika iso n̄kpep mbufa n̄kpọ edieke enye okoyomde nnyịn idu uwem isua ifan̄ kpọt? Se idude edi ke Abasi ọkọnọ nnyịn nti edu ye ifiọk emi sia enye okoyom nnyịn idu uwem ke nsinsi ke isọn̄ emi.

Ndusụk owo ẹdọhọ ke Abasi ikoyomke mme owo ẹdu uwem ke nsinsi ke isọn̄ emi. Mmọ ẹdọhọ ke Abasi okoyom mme owo ẹdụn̄ ke isọn̄ ke ekpri ibio ini man ẹda oro ẹse m̀mê mmọ ẹdot ndika n̄ketiene Abasi ndu uwem ke nsinsi ke heaven. Edieke oro ekpedide akpanikọ, ndi oro ikpọwọrọke  ke Abasi anam idiọkn̄kpọ ye ufen odu ke isọn̄ emi man ada odomo mme owo ese? Oro akpanam etie nte ke se Bible etịn̄de aban̄a Abasi idịghe akpanikọ. Kop se Bible etịn̄de aban̄a Abasi mi: “Koro kpukpru usụn̄ esie ẹnende. Abasi akpanikọ, emi mîkpehe ukwan̄ikpe; enye edi eti ye edinen.”​—Deuteronomy 32:4.

Bible etịn̄ se ikanamde Abasi obot isọn̄ emi. Enye ọdọhọ ete: “Heaven enyene Jehovah, edi enye ada isọn̄ ọnọ nditọ owo.” (Psalm 115:16) Emi owụt ke Abasi okobot isọn̄ emi man mme owo ẹdụn̄ ke nsinsi, enye ama onyụn̄ ọdọn̄ kpukpru se idinamde mme owo ẹkop inem ndidụn̄ ke esịt.​—Genesis 2:​8, 9.

“Heaven enyene Jehovah, edi enye ada isọn̄ ọnọ nditọ owo.”—Psalm 115:16

Bible etịn̄ n̄ko se Abasi akaduakde aban̄a mme owo. Abasi ọkọdọhọ Adam ye Eve ete “ẹyọhọ ke isọn̄ ẹnyụn̄ ẹkan enye, ẹnyụn̄ ẹkara . . . kpukpru mme odu-uwem edibotn̄kpọ eke ẹnyọnide ke isọn̄.” (Genesis 1:28) Abasi ọkọdọhọ mmọ ẹse ẹban̄a isọn̄ ẹnyụn̄ ẹnam ofụri isọn̄ akabade Paradise. Ata eti utom ke Abasi ọkọnọ mmọ oro! Abasi okoyom Adam ye Eve ye nditọ oro mmọ ẹdinyenede ẹdu uwem ke nsinsi ke isọn̄, idịghe ke heaven.

Ntak ndien mme owo ẹsikpade? Bible ọdọhọ ke kiet ke otu mme angel Abasi, emi ẹkedide ẹdidiọn̄ọ nte Satan kpa Devil, ama odomo ndibiat se Abasi ọkọtọn̄ọde ke In̄wan̄ Eden. Nso ke enye akanam?

Satan ama anam Adam ye Eve ẹtiene enye ẹsọn̄ ibuot ye Abasi. Satan ọkọdọhọ ke enyene eti n̄kpọ emi Abasi mîyakke mmọ ẹnyene, oro edi, ke enye iyakke mmọ ẹbiere se idide eti ye idiọk ke idemmọ. Adam ye Eve ẹma ẹnịm se Satan eketịn̄de, ntak edi oro mmọ ẹkekpọn̄de Abasi ẹtiene Satan. Nso ke emi akada edi? Nte ini akakade, mmọ ẹma ẹkpa, kpa nte Abasi okonyụn̄ ọdọhọde. Ntre ke nsinsi uwem oro Abasi akaduakde ndinọ mmọ akatak mmọ.​—Genesis 2:17; 3:​1-6; 5:5.

Nsọn̄ibuot Adam ye Eve ada afanikọn̄ ọsọk kpukpru owo tutu esịm mfịn emi. Ikọ Abasi ọdọhọ ete: ‘Idiọkn̄kpọ okoto owo kiet odụk ererimbot, n̄kpa onyụn̄ oto ke idiọkn̄kpọ oro odụk, ndien n̄kpa atara esịm kpukpru owo.’ (Rome 5:12) Nnyịn isikpa ke ntak idiọkn̄kpọ ye n̄kpa oro ikadade ito akpa ete ye eka nnyịn, idịghe ke ntak emi Abasi ama ekebebiere kpukpru n̄kpọ enịm.

Se Satan, Adam, ye Eve ẹkenamde ikabiatke se Abasi akaduakde aban̄a isọn̄ ye mme owo. Sia Abasi enen̄erede ama nnyịn onyụn̄ amade ndinam se inende, enye ama anam n̄kpọ man osio nnyịn ke ufụn idiọkn̄kpọ ye n̄kpa oro Adam ye Eve ẹkesịnde nnyịn. Apostle Paul ọkọdọhọ ete: “N̄kpọ eyenutom idiọkn̄kpọ edi n̄kpa, edi enọ oro Abasi ọnọde edi nsinsi uwem ke Christ Jesus Ọbọn̄ nnyịn.” (Rome 6:23) Abasi ama nnyịn onyụn̄ “ọnọ ikpọn̄-ikpọn̄ edibon Eyen esie [Jesus Christ], man owo ekededi eke ọbuọtde idem ye enye okûtak edi enyene nsinsi uwem.” (John 3:16) Jesus ndinyịme ndikpa mfak nnyịn anam ikeme ndinyene kpukpru se Adam akpakanamde atak nnyịn. a

Ibịghike, Abasi ọmọn̄ anam isọn̄ emi akabade Paradise nte enye ọkọn̄wọn̄ọde. Afo eyetiene odu ke Paradise oro edieke anamde se Jesus eketịn̄de emi: “Ẹbe ke mfafaha inuaotop ẹdụk; koro usụn̄ emi adade esịm nsobo atatara onyụn̄ an̄wan̄a, mme andibe ke enye ndụk ẹnyụn̄ ẹwak; edi inuaotop emi adade esịm uwem afafaha usụn̄ onyụn̄ esịre, ndien mme andikụt enye iwakke.” (Matthew 7:​13, 14) Omokụt do ke afo enyene ndibiere nte ini iso fo editiede. Nso ke edibiere?