MME owo ẹtịn̄ nsio nsio n̄kpọ ẹban̄a se isitịbede owo ama akpa. Ndusụk owo ẹdọhọ ke owo ama akpa, ke enye esifiak amana. Oro anam ndusụk owo ẹsidọhọ ke ima ifiak idi ke emana en̄wen, ke ididi emi m̀mê oko. Edi mbon en̄wen ẹdọhọ ke owo ama akpa, akpa.

Ekeme ndidi ebiet emi afo otode ye ido obio mbufo anam se afo ekerede aban̄a n̄kpọ emi okpụhọde ye se mbon emi ẹtịn̄de. Sia mme owo ẹkerede nsio nsio n̄kpọ ẹban̄a se isitịbede ke ini owo akpade, didie ke ikeme ndifiọk nnennen ibọrọ mmemmem ọkpọsọn̄ mbụme emi?

Ke ata ediwak isua, ikpọ owo ufọkabasi ke nsio nsio itie ke ofụri ererimbot ẹkpep mme owo ke ukpọn̄ isikpaha ke nsinsi. Ndusụk mbon emi ẹdọhọde ke idi Christian, mbon Hindu, mme Jew, ye mbon Muslim ẹnịm ke ukpọn̄ isikpaha. Mmọ ẹdọhọ ke owo ama akpa, ke ukpọn̄ esie esiwọrọ aka heaven, hell, m̀mê obio ekpo. Mbon Buddha ẹdọhọ ke owo ama akpa, ke enye esifiak amana ediwak ini tutu enye esịm ini emi enye mîdibọhọ ufen aba. Mmọ ẹsidọhọ ke utọ owo oro esịm Nirvana ndien.

Utọ ukpepn̄kpọ emi anam ata ediwak owo ke ererimbot ẹnịm ke owo ama akpa, ke enye isikpaha ofụri ofụri, ke enye esika iso odu uwem ke ebiet en̄wen. Oro anam ediwak owo ẹkere ke ana owo akpa man aka iso odu uwem. Ndien emi anam etie nte ke Abasi okoyom mme owo ẹsikpa. Edi nso ke Bible etịn̄ aban̄a emi? Mbọk kot ibuotikọ oro etienede man ọfiọk. Nte Bible ọbọrọde mbụme emi ekeme ndikpa fi idem.