“Ẹtiene Mi, . . . Ndien Ami Nyọnọ Mbufo Nduọk-Odudu”

N̄kparawa Owo Emi Ẹbietde Ntọi Mbara Oro Ẹnọde Nduọkodudu

NTE eyịghe mîdụhe, Jesus Christ ama esịn mme anditiene enye ẹdide uyen ke ini enye ọkọdọhọde ete: “Ẹtiene Mi, . . . ndien Ami nyọnọ mbufo nduọk-odudu.” (Matthew 11:28) Ke ini mme owo ẹketọn̄ọde ndida n̄kpri nditọ mmọ nsọk enye, mme mbet esie ẹma ẹdomo ndikpan mmọ. Edi Jesus ọkọdọhọ ete: “Ẹyak n̄kpri nditọ ẹtiene Mi; ẹkûkpan mmọ.” Jesus ama akam “emen mmọ akama, odori mmọ ubọk, onyụn̄ ọdiọn̄ mmọ.” (Mark 10:14-16) Nte eyịghe mîdụhe, Jesus akada n̄kpri owo ke ọsọn̄urua.

Bible etịn̄ aban̄a mme anam-akpanikọ n̄kparawa owo, ọkọrọ ye n̄kpri nditọwọn̄, oro ẹkenịmde n̄wọrọnda uwụtn̄kpọ ke ndinam n̄kpọ Abasi. Ẹma ẹbem iso ẹtịn̄ ẹban̄a ‘otu n̄kparawa owo’ oro ẹnọde nduọkodudu nte ntọi mbara ke n̄wed Psalm. Ẹtịn̄ n̄ko ẹban̄a “n̄kparawa” ye “nditọ-iban” emi ẹtorode enyịn̄ Jehovah.—Psalm 110:3; 148:12, 13.

Ebiet Emi Mme Uyen Ẹkemede Ndinam N̄kọri

Odot ndimen n̄kparawa owo ndomo ye ntọi mbara, koro mbara enyene ebuana ye eduek ye edidiọn̄. (Genesis 27:28) Ntọi mbara esidep sụn̄sụn̄ onyụn̄ ọnọ nduọkodudu. Ke ini edidu Christ emi, ediwak uyen Christian ẹnọ idemmọ unyịme unyịme ye ọkpọsọn̄ udọn̄. Kpa nte ntọi mbara oro ọnọde nduọkodudu, ediwak n̄kparawa owo ẹnam n̄kpọ Abasi idara idara ẹnyụn̄ ẹn̄wam ekemmọ mme andituak ibuot.—Psalm 71:17.

Mme uyen Christian inọhọ mbon en̄wen kpọt nduọkodudu; mmọ ke idemmọ ẹbọ nduọkodudu ke utom mmọ. Esop Abasi edi ebiet oro mmọ ẹkemede ndinam n̄kọri. Ke ndimụm n̄kokon̄ idaha ido uwem n̄kama, n̄kparawa iren ye iban ẹnyene ntotụn̄ọ itie ebuana ye Abasi. (Psalm 119:9) Ke esop, mmọ n̄ko ẹsibuana ke nti edinam ẹnyụn̄ ẹnyene nti ufan—kpa mme n̄kpọ oro ẹtịpde ẹsịn ke uwem oro ọnọde uyụhọ onyụn̄ enyenede uduak.

‘Ọnọ Nsọn̄idem ye Nduọkodudu’

Nte esitie mme uyen Christian ke idem nte ke mmimọ ibiet “ntọi mbara”? Tania edi n̄kaiferi kiet emi abuanade ifịk ifịk ke esop onyụn̄ okopde inemesịt ndisibiat se iwakde ibe hour 70 ke ọfiọn̄ ke utom ukwọrọikọ. Etie enye didie ke idem? Enye ọdọhọ ete: “Ami mmọbọ nduọkodudu ye nsịnudọn̄. Ndinyene Jehovah ye esop esie eke isọn̄ ke uwem mi ọnọ mi ‘nsọn̄idem ye nduọkodudu.’”—Mme N̄ke 3:8.

Ariel, asan̄autom uyọhọ ini efen emi edide uyen, owụt esịtekọm aban̄a udia eke spirit emi enye esidiade ke esop. Enye ọdọhọ ete: “Ke ini n̄kade mme mbono esop Christian, ikpọ ye n̄kpri mbono, nnyụn̄ ndiade udia ke okpokoro Jehovah eke spirit, emi esinen̄ede ọnọ mi nduọkodudu ke n̄kan̄ eke spirit.” Ndien esinọ mi nsịnudọn̄ ndifiọk nte ke mmenyene mme nsan̄a  utom ke ofụri ererimbot.” Ke etịn̄de aban̄a n̄kponn̄kan ebiet emi nduọkodudu otode, enye ọdọhọ ete: “Enen̄ede ọnọ nduọkodudu ndinyene Jehovah nte ufan, akpan akpan ke ini n̄kopde m̀mê n̄kụtde mme enyene-ndịk utịp emi editịm n̄kpọ emi adade ọsọk mme owo.—James 2:23.

Ke edide isua 20 ke emana, Abishai anam utom nte ọkwọrọikọ uyọhọ-ini ye asan̄autom unamutom ke esop. Enye etịn̄ aban̄a ifiọkutom esie ke mme ikọ emi: “Ami mmenyene nduọkodudu koro mmọfiọk nte n̄kemede ndiyọ ediwak mfịna oro mme uyen ẹsobode mfịn. Akpanikọ otode Bible an̄wam mi ndiwụk ntịn̄enyịn ke se nyomde ndinam man nnam n̄kpọ Jehovah ke ofụri ukpọn̄.”

Ke ntọn̄ọ ntọn̄ọ isua uyen esie, Antoine ama esisọp ndiyat esịt. Ini kiet, enye ama ada akpakaha eyịbi ekemmọ eyen ufọkn̄wed, ama onyụn̄ ada benetap ekịm eyen ufọkn̄wed efen. Mme owo ikesimaha ndisan̄a n̄kpere Antoine! Edi item otode Bible ama okpụhọde edu uwem esie. Idahaemi ke edide isua 19 ke emana onyụn̄ anamde utom nte asan̄autom unamutom ye asan̄autom uyọhọ ini ke esop, enye ọdọhọ ete: “Mmọkọm Jehovah ke ndiyak mi mfiọk enye ndinyụn̄ n̄n̄wam mi n̄kụt ufọn oro odude ke ndinyene mfara ke idem nnyụn̄ n̄kpụhọde usụn̄ uwem mi. Ke usụn̄ emi, ami mmefep ediwak mfịna.”

Mbon en̄wen ẹsikụt edu mme uyen Christian oro ọnọde nduọkodudu. Matteo edi uyen Ntiense ke Italy. Andikpep esie ama ebiere ete ke owo ekededi ke otu nditọ ufọkn̄wed emi editịn̄de idiọk ikọ eyekpe isop. Ndusụk ini ke ukperedem, nditọwọn̄ oro ẹma ẹben̄e ẹte ẹbiat ibet oro ẹfep koro, mmọ ẹkedọhọ ke “ọsọsọn̄ nditre nditịn̄ idiọk ikọ.” Matteo anam an̄wan̄a ete: “Edi andikpep oro ama ọdọhọ ete ke emi ikedịghe ntre, onyụn̄ ada mi, kiet ke otu Mme Ntiense Jehovah nte uwụtn̄kpọ, otorode mi ke iso ofụri otu nditọ ufọkn̄wed kaban̄a eti ikọinua mi.”

Ke ntịme ntịme ubet ukpepn̄kpọ kiet ke Thailand, andikpep ama okot Racha emi edide isua 11 ke emana ete ọwọrọ edida ke iso kpukpru nditọ ubet ukpepn̄kpọ oro onyụn̄ otoro enye ke eti edu esie, ọdọhọde ete: “Ntak kpukpru mbufo mîdaha enye nte uwụtn̄kpọ? Enye esịn ifịk ke ukpepn̄kpọ esie onyụn̄ odu eti uwem.” Ekem enye ama ọdọhọ nditọ ufọkn̄wed oro ete: “N̄kere ke mbufo ẹkpekabade ẹdi kiet ke otu Mme Ntiense Jehovah nte Racha man ẹnam edu mbufo ọfọn.”

Edi inem inem n̄kpọ ndikụt ediwak tọsịn uyen Christian ẹdide ẹdifiọk Jehovah etịm ọfọn ẹnyụn̄ ẹnamde uduak esie. Utọ nti n̄kparawa owo emi ẹnyene eti ibuot oro akande isua emana mmọ. Abasi ekeme ndin̄wam mmọ ẹkụt unen ke uwem mmọ idahaemi onyụn̄ anam mmọ ẹnyene ubọn̄ ubọn̄ ini iso ke obufa ererimbot emi edide. (1 Timothy 4:8) Ke nsatisọn̄ eke spirit eke akani editịm n̄kpọ emi ọyọhọde ye mme uyen emi ẹkụtde edikpu mînyụn̄ ikopke uyụhọ mi, mme uyen Christian ẹdi ata isio koro mmọ ẹnọ ata nduọkodudu!