Ata Un̄wam oro Ẹnọde Mme Ubuene

KE INI Jesus Christ, Eyen Abasi, okodude ke isọn̄, enye ama enen̄ede ama ndin̄wam mme ubuene. Owo emi okokụtde se Jesus akanamde ke ini utom ukwọrọikọ Esie, ọkọdọhọ ete: “Mme nnan ẹkụt usụn̄, mbon mbụn̄ọ ẹsan̄a, ẹnam mbon akpa-mfia ẹsana, mme inan ẹkop ikọ, ẹnam mme akpa-n̄kpa ẹset, ẹnyụn̄ ẹkwọrọ eti mbụk ẹnọ mme ubuene.” (Matthew 11:5) Nte ededi, nso kaban̄a ediwak miliọn ubuene oro ẹdude mfịn? Ndi eti mbụk ndomokiet odu ọnọ mmọ? Ih, etop idotenyịn odu!

Okposụkedi ererimbot ke ofụri ofụri esiwakde ndifụmi nnyụn̄ mfre mme ubuene, Ikọ Abasi, kpa Bible, ọn̄wọn̄ọ ete: “Koro mîdifreke eyen ubuene ke nsinsi: idotenyịn mbon ukụt iditakke ke nsinsi.” (Psalm 9:18) Mme ikọ ndọn̄esịt emi ẹdisu ke ini Obio Ubọn̄ Abasi, kpa ata ukara heaven, edidade itie kpukpru ukara owo. (Daniel 2:44) Nte Edidem ukara heaven oro, Jesus “ayatua eyen unana ye ubuene mbọm, onyụn̄ anyan̄a ukpọn̄ mme ubuene. Enye ayafak ukpọn̄ [mmọ] osio ke ukụt ye nnama: onyụn̄ ese iyịp mmọ ke n̄kpọ-uto.”—Psalm 72:13, 14.

Uwem editie didie ke ini Christ edikarade isọn̄? Mbon oro ẹdidude ke ererimbot oro Christ edikarade ẹyedara utịp utom mmọ. Bible ọdọhọ ke Micah 4:3, 4 ete: “Kpukpru mmọ ẹyetie ke idak vine mmọ ye ke idak fig mmọ; ndien baba owo kiet eke edinamde mmọ ndịk ididụhe: koro edi inua Jehovah mme udịm ọdọhọ.” Obio Ubọn̄ Abasi oyosio udọn̄ọ ye n̄kpa efep. (Isaiah 25:8) Ererimbot edikpụhọde didie ntem! Nnyịn imekeme ndinịm mme un̄wọn̄ọ Bible emi ke akpanikọ, sia edide Abasi ke idemesie ọkọnọ odudu spirit oro ẹkedade ẹwet.

Ke adianade ye etop idotenyịn oro enye ọnọde, Bible an̄wam nnyịn ndiyọ mme mfịna eke usen ke usen, utọ nte edikan unana ukpono oro ubuene esidade edi. Christian oro edide ubuene ọfiọk oto se enye ekpepde ke Bible nte ke imọ imọsọn̄ urua ke enyịn Abasi ukem nte Christian oro enyenede n̄kpọ. N̄wed Job eke Bible owụt nte ke Abasi ‘iten̄eke mbọn̄ enyịn, inyụn̄ isehe mbon inyene ikan mme ubuene: koro edi ubọk esie akanam kpukpru mmọ.’ (Job 34:19) Abasi ama kpukpru mmọ ukem ukem.—Utom 10:34, 35.