Mme Mbụme Ẹtode Mme Andikot

Didie ke Ezekiel akakabade edi “imụm” ke ini ẹkekande Jerusalem ẹkụk ẹnyụn̄ ẹsobode enye?

Ke nditịm ntịn̄, emi ọkọwọrọ ke enye ikenyeneke nditịn̄ n̄kpọ ndomokiet ndian ke ntịn̄nnịm etop Jehovah oro enye ama akatatan̄a.

Prọfet Ezekiel ọkọtọn̄ọ utom esie nte anam-akpanikọ owo ukpeme ọnọ nditọ Israel oro ẹkedude ke ntan̄mfep ke Babylon ke “ọyọhọ isua ition nte ẹketan̄ edidem Jehoiachin ẹfep,” oro edi, ke 613 M.E.N. (Ezekiel 1:2, 3) Ke ọyọhọ usen duop ke ọfiọn̄ ẹnyọn̄ duop eke 609 M.E.N., ẹma ẹyarade ẹnọ enye ebe ke odudu spirit Abasi nte ke mbon Babylon ẹmọn̄ ẹtọn̄ọ ndikan Jerusalem n̄kụk. (Ezekiel 24:1, 2) Nso ididi utịp edikan n̄kụk emi? Ndi Jerusalem ye mme andidụn̄ ke enye oro ẹnanade mbuọtidem ẹyebọhọ? Nte owo ukpeme, Ezekiel ama atatan̄a in̄wan̄-in̄wan̄ etop nsobo otode Jehovah, ndien ikoyomke Ezekiel adian n̄kpọ ndomokiet, nte n̄kpọ eke ẹdọhọde ke emi edinam ẹtịm ẹnịm etop oro ke akpanikọ. Ezekiel akakabade edi imụm koro enye mîkenyeneke nditịn̄ n̄kpọ ekededi ndian ke etop oro akaban̄ade edikan Jerusalem n̄kụk.—Ezekiel 24:25-27.

N̄kpọ nte ọfiọn̄ itiokiet ke ẹma ẹkesobo Jerusalem ke 607 M.E.N., owo kiet oro ọkọbọhọde ama ada etop nsobo edisana obio oro ọsọk Ezekiel ke Babylon. Ke mbubịteyo oro mbemiso andibọhọ oro ekedide edisịm, Jehovah ama ‘atat Ezekiel inua ndien enye ikedịghe aba imụm.’ (Ezekiel 33:22) Ezekiel ama afiak ọtọn̄ọ nditịn̄ ikọ.

Ndi Ezekiel ekedi ata imụm ini oro? Ke akpanikọ ikedịghe, koro ke enye ama akakabade “imụm” emi, enye ama etịn̄ ntịn̄nnịm ikọ oro ekenen̄erede aban̄a mme idụt n̄kann̄kụk oro ẹkedatde esịt ẹban̄a iduọ Jerusalem. (Ezekiel, ibuot 25-32) Ke nsonso oro Ezekiel ọkọtọn̄ọde utom nte prọfet ye owo ukpeme, Jehovah ama ọdọhọ enye ete: “Nyanam edeme fo adiana fi ke nsịn̄, afo oyonyụn̄ odop uyo, udunyụn̄ udịghe owo eke edisuade ọnọ mmọ: koro mmọ ẹdide ufọk nsọn̄-ibuot. Ndien ke adan̄aemi ndọhọde ye afo, nyatat fi inua.” (Ezekiel 3:26, 27) Ke ini Jehovah mîkenyeneke etop inọ Israel, Ezekiel ekenyene nditie nte imụm nnọ idụt oro. Ezekiel ekenyene nditịn̄ se Jehovah okoyomde enye etịn̄ ke nnennen ini oro Jehovah okoyomde enye etịn̄ emi. Ezekiel ndikedi imụm ọkọwọrọ ke enye ikenyeneke nditịn̄ ntịn̄nnịm ikọ ndomokiet nnọ nditọ Israel.

Otu owo ukpeme eyomfịn, kpa mme Christian oro ẹyetde aran ke ẹtọt mme owo ẹban̄a nsobo Christendom, kpa ndamban̄a Jerusalem. Ke ini “akwa ukụt” editọn̄ọde onyụn̄ osobode “Akwa Babylon,” kpa ukara ererimbot eke nsunsu ido ukpono, idiyomke otu Ezekiel oro ẹyetde aran etịn̄ n̄kpọ ndomokiet aban̄a nsobo Christendom, emi edide akwa ubak ukara oro.—Matthew 24:21; Ediyarade 17:1, 2, 5.

Ih, ini ke edi oro nsụhọ oro ẹyetde aran ye nsan̄a mmọ ẹdikabarede imụm, oro ọwọrọ ke mmọ idinyeneke nditịn̄ n̄kpọ ndomokiet nnọ Christendom. Oro edidi ke ini “ndụk duop” ye “unam” ẹdisobode Akwa Babylon ẹnyụn̄ ẹnịmde enye iferi. (Ediyarade 17:16) Nte ededi, emi iwọrọke ite ke mme Christian ẹdidi ata ata imụm. Kpa nte mmọ ẹkam ẹnamde idahaemi, mmọ ẹyetoro Jehovah ẹnyụn̄ ẹtịn̄ ẹban̄a enye kpukpru usen ke “ofụri emana.”