Mme Mbụme Ẹtode Mme Andikot

Ke ini Jesus ọkọdọhọde mme anditiene enye “ẹbuọt, ẹkûdori-enyịn ndifiak mbọ,” ndi ikọ esie ọkọwọrọ ke owo ikpakam ifiakke ibọ iso okụk oro ẹkebuọtde?

Ikọ Jesus oro ẹwetde ke Luke 6:35 ekeme nditịm n̄n̄wan̄a owo ke ẹnyenede Ibet Moses ke ekikere. Abasi okowụk nditọ Israel ete ‘ẹkûbọ udori’ ke ini ẹnọde ekemmọ eyen Israel oro odude ke unana, ebuọt. (Exodus 22:25; Leviticus 25:35-37; Matthew 5:42, NW) Owo ikọbọhọ ebuọt emi ida inam mbubehe. Utu ke oro, ẹkenọ ebuọt emi owo mîbọhọ udori mi ẹda ẹn̄wam owo oro okodude ke afanikọn̄. Ikpowụtke ima ke usụn̄ ndomokiet owo ndida nsọn̄ọn̄kpọ oro esịmde mbọhọidụn̄ esie ndia udori. Edi, owo oro ọkọnọde ebuọt ama enyene unen ndifiak mbọ iso okụk esie, ndien enye ama akam esibọ “ubiọn̄” ndusụk ini.—Deuteronomy 15:7, 8, NW.

Ke adan̄aemi ọsọn̄ọde se Ibet eketịn̄de, Jesus ama anam n̄kpọ emi an̄wan̄a ke ata ntatara usụn̄, ọdọhọde ke enye oro ọnọde owo un̄wam ikpenyeneke ndidori enyịn “ndifiak mbọ” n̄kpọ ndomokiet. Ukem nte nditọ Israel, ndusụk ini mme Christian ẹsisobo nsọn̄ọn̄kpọ m̀mê mme idaha efen oro ẹnamde mmọ ẹdu ke unana. Edieke eyenete odude ke utọ idiọk idaha oro onyụn̄ oyomde un̄wam okụk, ndi ikpọfọnke ndinọ enye un̄wam? Ke akpanikọ, ata ima ayanam ekemmọ Christian oyom ndin̄wam eyenete oro osobode nsọn̄ọn̄kpọ oro mîtoho enye. (Mme N̄ke 3:27) Ẹkeme ndiyom okụk nnọ eyenete oro odude ke unana, ọkpọkọm se ẹnọde ekpride akan se ẹkpebuọtde-buọt enye.—Psalm 37:21.

Ke akpa isua ikie E.N., ẹma ẹdọn̄ apostle Paul ye Barnabas ẹmen etịbe oro mme Christian ẹketịpde ke Asia Minor ẹsọk nditọete mmọ ke Judea ke ntak akan̄. (Utom 11:28-30) Ntre ke edi mfịn, mme Christian ẹsiwak ndinọ mme enọ ẹsọk nditọete mmọ oro ẹdude ke unana ke mme ini afanikọn̄. Ke ndinam ntre, emi n̄ko esinọ mbon en̄wen eti ikọ ntiense. (Matthew 5:16) Nte ededi, ẹkpenyene ndikere mban̄a edu ye idaha owo oro oyomde un̄wam. Ntak emi enye oyomde un̄wam? Odot ẹtịm ẹfiọk ikọ Paul emi: “Edieke owo mînyịmeke ndinam utom, enye okûnyụn̄ adia n̄kpọ.”—2 Thessalonica 3:10.

Edieke n̄kpọ mînen̄ekede isọn̄ ye eyenete oro oyomde ebuọt, edi oyom un̄wam n̄kukụre ke ekpri ibio ini man afiak ọtọn̄ọ mbubehe esie oro ọkọduọde, ekeme ndifọn ẹnọ enye ebuọt oro owo mîdibọhọ udori. Ke mme utọ idaha oro, ndinọ owo ebuọt ye ekikere edifiak mbọ ofụri iso okụk oro ẹkenọde ituahake ye se Jesus eketịn̄de ke Luke 6:35. Ẹkpenyene ndiwewet n̄kpọ emi, ndien owo emi ọbọde ebuọt ekpenyene ndisịn ofụri ukeme man ọnọ okụk oro ẹkebuọtde enye nte ekemde ye se ẹkewetde ke n̄wed. Ke akpanikọ, ukem ima Christian oro onụkde eyenete ndinọ eyenete esie ebuọt ekpenyene ndinụk enye oro ọbọde ebuọt ndisọsọp nyak okụk ẹkebuọtde enye nnọ andinyene.

Owo oro oyomde ndinọ (m̀mê ndibọ) ebuọt ekpenyene ndibem iso n̄kere mban̄a idaha ubon esie. Ke uwụtn̄kpọ, ndi emi ayanam enye okûkeme ndise mban̄a ubon esie, emi N̄wed Abasi oyomde enye ebem iso ese aban̄a? (2 Corinth 8:12; 1 Timothy 5:8) Kpa ye kpukpru emi, mme Christian ẹkpenyene ndiyom ifet ndiwụt kiet eken ima, ẹnamde-nam ima mmọ ẹwụt ke usụn̄ oro ekemde ye mme edumbet Bible.—James 1:27; 1 John 3:18; 4:7-11.