Mme Mbụme Ẹtode Mme Andikot

Mme demon ẹdidu ke m̀mọ̀n̄ ke Tọsịn Isua Ukara Christ?

Bible inọhọ ọyọhọ ibọrọ ke mbụme emi. Nte ededi, nnyịn imekeme ndinyene ibọrọ emi esịnede ifiọk mban̄a ebiet emi mme demon ẹdidude ke Tọsịn Isua Ukara Christ.

Ke ini eketịn̄de se ididade itie ke ntọn̄ọ ye utịt Tọsịn Isua Ukara Christ, apostle John ọkọdọhọ ete: “Ekem n̄kụt angel otode ke heaven osụhọde, akama ukpọhọde editụn̄ọ ukpe ye akwa n̄kpọkọbi ke ubọk. Enye onyụn̄ omụm dragon, akani urụkikọt, emi edide Andidori ikọt Abasi ikọ ye Satan, onyụn̄ ọkọbi enye ke thousand isua, onyụn̄ otop enye esịn ke editụn̄ọ ukpe, onyụn̄ ọkọbi ukpe, onyụn̄ esịri abaha enye, enịm ufịk-n̄kpọ ke esịt, man okûbian̄a aba mme idụt tutu thousand isua ẹbe; ini oro ama ebe, ẹnyene ndikpọhọde enye nyak ke ekpri ibio ini.” (Ediyarade 20:1-3) Mme ufan̄ikọ emi ẹtịn̄ ẹban̄a edisịn Satan kpọt ke editụn̄ọ ukpe ye edisio enye ke esisịt ini. Okposụkedi owo mîsiakke mme demon, owụt ifiọk nte ke ini angel oro akamade ukpụhọde editụn̄ọ ukpe—Jesus Christ oro ẹnọde ubọn̄—edimụmde onyụn̄ esịn Devil ke editụn̄ọ ukpe, enye ayanam kpasụk ntre ye mme demon.—Ediyarade 9:11.

Ke ama akakabarede edi Edidem ke heaven ke 1914, Jesus Christ ama anam n̄kpọ oro ekenen̄ede otụk Satan ye mme demon. Ediyarade 12:7-9 ọdọhọ ete: “Ekem [ekọn̄] etịbe ke heaven; Michael ye mme angel esie ẹn̄wana ekọn̄ ye dragon; dragon ye mme angel [mme demon] esie ẹnyụn̄ ẹn̄wana ekọn̄, edi mmọ ikanke. Ufan̄ inyụn̄ idụhe aba inọ mmọ ke heaven. Ndien ẹsio akwa dragon ẹduọk ke isọn̄, kpa akani urụkikọt oro ẹkotde enye ẹte, andidori ikọt Abasi ikọ ye Satan, andibian̄a ofụri ererimbot; ẹsio enye ẹduọk ke isọn̄, ẹnyụn̄ ẹsion̄o mme angel esie ẹduọn̄ọ ye enye.” Toto ke ini oro, Satan ye mme demon esie ẹdu ke isọn̄ inyụn̄ ikemeke ndika heaven aba. Nnyịn imekeme ndibiere nte owụtde ifiọk nte ke ini Jesus Christ edikọbide Satan ke editụn̄ọ ukpe man enye okûnyene aba odudu ndinam idiọk ke isọn̄, Enye oyonyụn̄ anam kpasụk ntre ye mme demon.

Kere n̄ko ban̄a ata akpa ntịn̄nnịm ikọ ke Bible. Enye ọdọhọ ntem: “[Ami Abasi] nyonyụn̄ nsịn usua ke ufọt fo [Satan] ye n̄wan [esop Jehovah eke heaven], ye ke ufọt ubon fo [Satan] ye ubon esie [Jesus Christ]: enye ayanuak fi ibuot, afo oyonyụn̄ anuak enye nditịn̄-ikpat.” (Genesis 3:15) Edinuak urụkikọt ibuot esịne edisịn Satan ke editụn̄ọ ukpe ke Tọsịn Isua Ukara Christ. Ntịn̄nnịm ikọ oro aka iso ọdọhọ ete ke usua odu ke ufọt Andinuak ibuot ye ubon Satan. Ubon, m̀mê esop emi, esịne ikpehe oro enyịn mîkwe emi ndiọi angel, m̀mê mme demon, ẹnamde. Ntem owụt ifiọk ndinịm nte ke ini Jesus edisịnde Satan ke editụn̄ọ ukpe, enye oyomụm onyụn̄ esịn mme demon n̄ko do. Ndiọi spirit ndinen̄ede n̄kop ndịk mban̄a editụn̄ọ ukpe emi owụt ke mmọ ẹfiọk ke ẹyekọbi mmimọ ke ini iso.—Luke 8:31.

 Nte ededi, ndi ekeme ndidi ke se inamde Ediyarade 20:1-3 mîtịn̄ke n̄kpọ iban̄a mme demon edi koro ẹdisobode mmọ ye ikpehe ubon Satan oro ẹkụtde ke enyịn ke Armageddon? Bible owụt ke etie nte emi idịghe ntre. Kaban̄a se iditịbede inọ Satan ke akpatre, Bible ọdọhọ ete: “Ẹmen Satan emi akabian̄ade mmọ ẹduọk ke akwa n̄kpọdiọhọ ikan̄ ye brimstone, ke ebiet eke unam ye prophet nsu [ẹma ẹkedodu]; ẹyenyụn̄ ẹtụhọde mmọ ke uwemeyo ye ke okoneyo ke nsinsi-nsinsi.” (Ediyarade 20:10) Unam ye prọfet nsu oro ẹdi mbon ukaraidem ndien ke ntre mmọ ẹdi ubak esop Satan oro ẹkụtde ke enyịn. (Ediyarade 13:1, 2, 11-14; 16:13, 14) Mmọ ẹsịm utịt ke Armageddon, ke ini Obio Ubọn̄ Abasi anuakde onyụn̄ osobode kpukpru obio ubọn̄ ererimbot. (Daniel 2:44) Bible etịn̄ aban̄a ‘nsinsi ikan̄, emi ẹkenịmde ẹnọ Satan ye mme angel esie.’ (Matthew 25:41) Ẹditop Satan ye mme demon esie ẹdọn̄ ke “akwa n̄kpọdiọhọ ikan̄ ye brimstone” oro, ukem nte ẹdọn̄de unam ye prọfet nsu sia ẹdisobode mmọ n̄ko ke nsinsi. Edieke ẹkpesobode mme demon emi ẹdide okopodudu ikpehe ubon Satan ke Armageddon, ke akpanikọ ẹkpedọhọ ke mmọ ẹma ẹdodu ke ndamban̄a akwa n̄kpọdiọhọ ikan̄ oro ye unam ye prọfet nsu. Sia owo mîsiakke mmọ ke Ediyarade 20:10, emi owụt ke owo isoboke mme demon ke Armageddon.

Sia owo mîtịn̄ke in̄wan̄-in̄wan̄ ke ẹdọn̄ mme demon ke editụn̄ọ ukpe, owo inyụn̄ itịn̄ke n̄ko ke ẹsion̄o mmọ do. Nte ededi, se iditịbede inọ Devil editịbe ọnọ mmọ. Ke ẹma ẹkesion̄o mmọ ye Devil, mmọ ẹnyụn̄ ẹdiana ye enye ẹdomo ubonowo akpatre udomo ke utịt tọsịn isua, ẹyetomo mmọ ẹdọn̄ ke akwa n̄kpọdiọhọ ikan̄, ndien ke ntem ẹsobode mmọ ke nsinsi.—Ediyarade 20:7-9.

Ntre, idem okposụkedi Ediyarade 20:1-3 etịn̄de aban̄a edimụm Satan kpọt ntop nsịn ke editụn̄ọ ukpe, nnyịn imekeme ndibiere nte enende nte ke ẹyemụm mme angel esie ẹbọp ẹdọn̄ n̄ko ke editụn̄ọ ukpe. Owo idiyakke Satan m̀mê mme udịm demon esie ẹtịmerede uduak Abasi aban̄ade edinam isọn̄ akabade edi Paradise, nnyụn̄ nnam ubonowo afiak edi mfọnmma ke Tọsịn Isua Ukara Christ.