Uyai Edibotn̄kpọ Jehovah

“O Jehovah, N̄kpọ Emi Afo Anamde Ẹwak Didie!”

EDIDE nnyịn idụn̄ ke obio-in̄wan̄ m̀mê ke akwa obio, ke ikpọ obot m̀mê ke mbeninyan̄, nnyịn imesikụt ndiye edibotn̄kpọ Jehovah oro ẹnyenede uten̄e. Nte odotde, 2004 Calendar of Jehovah’s Witnesses owụt udịm udịm edibotn̄kpọ Jehovah oro ẹnyenede ndyọ.

Mme owo oro ẹwụtde esịtekọm ẹsitịn̄ enyịn kpukpru ini ke mme utom Abasi. Ke uwụtn̄kpọ, kere ban̄a Solomon emi ifiọk esie akawakde “akan ifiọk kpukpru nditọ edem usiaha-utịn.” Bible ọdọhọ ete: “Enye onyụn̄ etịn̄ aban̄a eto, ọtọn̄ọde ke cedar emi odude ke Lebanon tutu esịm ke hyssop emi etịbede ke ibibene; onyụn̄ etịn̄ aban̄a unam, ye inuen, ye mme ọnyọni, ye iyak.” (1 Ndidem 4:30, 33) Edidem David, ete Solomon, ama esiwak nditie n̄kere mme utịbe utịbe edibotn̄kpọ Abasi. Emi ama anam enye ọdọhọ Andibot esie ete: “O Jehovah, n̄kpọ emi afo anamde ẹwak didie! Afo amanam mmọ kpukpru ke ifiọk; inyene fo ọyọhọ ke ererimbot.”—Psalm 104:24. *

Nnyịn n̄ko ikpenyene ndidụn̄ọde nnyụn̄ ntie n̄kere mme n̄kpọ-obot. Ke uwụtn̄kpọ, nnyịn imekeme ‘ndimenede enyịn nnyịn ke enyọn̄’ nnyụn̄ mbụp: “Anie okobot mme mmọ emi?” Ke akpanikọ, edi Jehovah Abasi, emi “nsọn̄idem esie okponde,” emi onyụn̄ enen̄erede “ọsọn̄ odudu”!—Isaiah 40:26.

Didie ke editie n̄kere mme utom obot Jehovah okpotụk nnyịn? Ke usụn̄ ita ke nsụhọde n̄kaha. Enye ekeme (1) nditi nnyịn ndida uwem nnyịn ke ọsọn̄urua, (2) ndinam nnyịn in̄wam mbon en̄wen ẹkpep n̄kpọ ẹto mme n̄kpọ-obot, (3) ndinụk nnyịn ndinen̄ede mfiọk nnyụn̄ n̄wụt esịtekọm nnọ Andibot nnyịn.

Uwem nnyịn oro enen̄erede okon̄ akan eke mme unam emi “mînyeneke ibuot” anam nnyịn ikeme ndidụn̄ọde nnyụn̄ mma mme utịbe utịbe n̄kpọ-obot. (2 Peter 2:12) Enyịn nnyịn ẹkeme ndikụt ndiye n̄kann̄kụk. Utọn̄ nnyịn ẹkeme ndikop ndinem ikwọ inuen. Esinen̄ede enem nnyịn nditi ini ye ebiet oro ikokụtde ndiye n̄kpọ. Idem okposụkedi nnyịn mîdụhe mfọnmma uwem idahaemi, edi uwem enen̄ede enem!

Mme ete ye eka ẹkeme ndikop inemesịt ndikụt ndammana nduaidem oro nditọ mmọ ẹnyenede ẹban̄a mme n̄kpọ-obot. Nditọwọn̄ ẹsikop inemesịt didie ntem ndifiọhọ ikpọk n̄kọn̄kọ ke mbeninyan̄, ndibre mbre ye unam, ndidọk eto! Mme ete ye eka ẹkpenyene ndin̄wam n̄kpri nditọ mmọ ẹfiọk Andibot mme n̄kpọ-obot emi. Nditọwọn̄ ẹkeme ndika iso nnyene uten̄e ye ukpono nnọ mme n̄kpọ-obot Jehovah ke ofụri eyouwem mmọ.—Psalm 111:2, 10.

Ikpowụtke ifiọk edieke nnyịn ikpamade mme n̄kpọ-obot edi itre ndinọ Andibot mmọ itoro. Ntịn̄nnịm ikọ Isaiah an̄wam nnyịn ndikere mban̄a Andibot, ke ini enye obụpde ete: “Nte  afo ufiọkke? Nte afo akanam ukopke? Jehovah emi okobotde mme utịt ererimbot edi nsinsi Abasi; enye ikpaha mba, inyụn̄ ikpọtke; idịghe nte ẹdụn̄ọrede asian esie.”—Isaiah 40:28.

Ih, mme n̄kpọ oro Jehovah anamde ẹwụt anana-mbiet ọniọn̄ esie, akakan odudu esie, ye ntotụn̄ọ ima oro enye amade nnyịn. Ke ini nnyịn ikụtde ndiye n̄kpọ-obot oro ẹdude ẹkan nnyịn ẹkụk inyụn̄ ifiọkde mme edu Andibot kpukpru mmọ, emi akpakam onụk nnyịn nditịn̄ mme ikọ oro David eketịn̄de mi: “O Ọbọn̄, baba kiet ke otu mme abasi ibietke fi; baba n̄kpọ kiet inyụn̄ ibietke se afo anamde.”—Psalm 86:8.

Nnyịn imekeme ndinịm nte ke mme n̄kpọ-obot Jehovah ẹyeka iso ndinyene mme okopitem ubonowo ndyọ. Nnyịn iyaka iso ndinyene anana-utịt ifet ndikpep n̄kpọ efen efen mban̄a Jehovah ke ‘nsinsi nsinsi.’ (Ecclesiastes 3:11, NW) Ndien adan̄a nte nnyịn ikpepde iban̄a Andibot nnyịn, ntre ke nnyịn iditetịm ima enye.

[Ikọ idakisọn̄]

[Ekebe ke page 9]

Itoro Oro Ẹnọde Andibot

Ediwak ntaifiọk oro ẹwụtde esịtekọm ẹdifiọk ke Abasi edi Andibot. Se uwụtn̄kpọ ifan̄ oro ẹtienede mi:

“Nsinen̄ede n̄kop nduaidem ye idatesịt ke ukpepn̄kpọ ifiọk ntaifiọk mi ke ini n̄kụtde obufa n̄kpọ nnyụn̄ ndọhọde idemmi nte, ‘Nte Abasi akanamde enye emi edi oro.’ Utịtmbuba mi edi ndifiọk esisịt n̄kpọ mban̄a uduak Abasi.”—Henry Schaefer, prọfesọ oro ekpepde n̄kpọ aban̄a mmọn̄ibọk.

“Amaedi se inamde Ekondo atara okpon, owo kiet kiet enyene ndibiere oro ke idemesie, edi nnyịn idikemeke ndifiọk se inamde Ekondo atara okpon edieke ẹsiode Enye [Abasi] ẹfep.”—Edward Milne, owo Britain oro ekpepde n̄kpọ aban̄a ndutịm ekondo.

“Nnyịn imọfiọk ke ẹda mfọnn̄kan ibat ẹnam mme n̄kpọ-obot ẹn̄wan̄a, koro Abasi okobot ibat.”—Alexander Polyakov, ata-ibat owo Russia.

“Ke ini ikpepde iban̄a mme n̄kpọ-obot, nnyịn idụn̄ọde mme ekikere Andibot, itịm imehe ye mme ekikere esie, idomo ndifiọk ekondo oro edide Esie mînyụn̄ idịghe eke nnyịn.”—Louis Agassiz, owo America oro ekpepde n̄kpọ aban̄a mme odu uwem n̄kpọ.

[Ndise ke page 8, 9]

Inuen inyan̄ibom Ekpri Isuo Antarctic

[Ndise ke page 9]

Grand Teton National Park, Wyoming, U.S.A.

[Ebiet Ẹdade N̄kpọ Ẹto]

Photo Jack Hoehn/Index Stock