Ndi Afo Emenyene “Inyene ke N̄kan̄ Abasi”?

N̄KE aban̄ade owo inyene oro ekenyenede in̄wan̄ edi kiet ke otu n̄ke Jesus Christ oro ẹnamde owo ekere n̄kpọ. Man enen̄ede okụt ke imetịm n̄kpọ iben̄e ini iso imọ, enyene-in̄wan̄ oro ama odiomi ndibọp akamba ufọk ubonn̄kpọ. Edi ke n̄ke Jesus oro, ẹkot owo oro “anana-ibuot owo.” (Luke 12:16-21) Ediwak edikabade Bible ẹkam ẹkot enye “ndisịme.” Ntak emi ẹkotde enye ndisịme?

Nte an̄wan̄ade, owo inyene emi ikesịnke Abasi ke ediomi oro enye akanamde; enye ikonyụn̄ inọhọ Abasi ubọn̄ ke ini in̄wan̄ esie ọkọfọnde n̄kpọ etieti. (Matthew 5:45) Utu ke oro, enye akanam inua ete: “Ukpọn̄, afo emenyene ediwak nti n̄kpọ emi obonde ọnọ ediwak isua; duọk odudu, dia, n̄wọn̄, kop inemesịt.” Ih, enye ekekere ke inyene imọ editie nte “edikon̄ ibibene.”—Mme N̄ke 18:11.

Ke ini mbet oro James okodụride owo utọn̄ aban̄a utọ n̄kohodeidem oro, enye ekewet ete: “Ẹdi, ndien, mbufo emi ẹdọhọde ẹte: ‘Mfịn m̀mê n̄kpọn̄ nnyịn iyanam isan̄ ika ke obio emi inyụn̄ ikadan̄ do isua kiet, inyụn̄ inam mbubehe idia udori,’ ke adan̄aemi mbufo mîfiọkke se uwem mbufo edidide n̄kpọn̄. Koro mbufo ẹdi ntụhube emi ọwọrọde ke esisịt ini ndien ekem ebe efep.”—James 4:13, 14.

Ikọ oro edi akpanikọ, koro ẹkedọhọ owo inyene oro ke n̄ke Jesus ẹte: “Afo anana-ibuot owo, ẹyekpak ukpọn̄ fo ke ubọk fo ke okoneyo emi. Anie, ndien, edinyene mme n̄kpọ eke afo ọkọkọde obon?” Ukem nte ntụhube emi ebede efep, owo inyene oro ekenyene ndikpa n̄kpọn̄ se enye akaduakde. Ndi imekpep n̄kpọ ito oro? Jesus ọkọdọhọ ete: “Ntem ke etie ye owo eke ọkọde n̄kpọuto obon ọnọ idemesie edi mînyeneke inyene ke n̄kan̄ Abasi.” Ndi afo emenyene “inyene ke n̄kan̄ Abasi”?