Ntak Emi Abasi Ayakde Idiọkido Odu-o?

IDIỌKIDO ye ndutụhọ ẹyọyọhọ kpukpru ebiet. Ekọn̄ esiwot mbio-obio ye mbonekọn̄ ukem ukem. Ubiatibet ye afai ẹdi ọsọ n̄kpọ. Ekeme ndidi ẹma ẹsari m̀mê ẹfịk fi ke ndondo emi. Ke ntak se afo okokụtde ye se ikọwọrọde fi, enen̄ede etie nte afo ama obụp ete, ‘Ntak emi Abasi ayakde idiọkido odu-o?’

Mbụme oro edi akani usem. N̄kpọ nte isua 3,600 emi ẹkebede, anam-akpanikọ asan̄autom Abasi emi ekekerede Job ama obụp ete: “Mme idiọk owo ẹnam didie ẹdu uwem?” (Job 21:7) Ke ini Jeremiah okokopde editịmede esịt aban̄a ndiọi edinam mbio-obio mmọ, emi ẹkedude uwem ke ọyọhọ isua ikie itiaba M.E.N., enye ama obụp ete: “Mme idiọk owo ẹnam didie ẹkụt unen ke usụn̄ mmọ? Kpukpru mbon nsu ẹnam didie ẹtie ke ifụre?” (Jeremiah 12:1) Job ye Jeremiah ẹma ẹfiọk ke Abasi edi edinen. Kpa ye oro, mmọ ẹma ẹkere m̀mê ntak emi idiọkido awakde ntem-e? Ekeme ndidi n̄kpọ emi ayan̄a fi ifiọk n̄ko.

Ndusụk owo ẹdọhọ ke Abasi edi ntak idiọkido ye ndutụhọ. Mbon eken ẹkere ẹte: ‘Edieke Abasi edide Ata Ọkpọsọn̄, edinen, ye ima, ntak emi enye mîtreke idiọkido ye ndutụhọ? Ntak emi enye ayakde idiọkido odu edisịm eyo nnyịn?’ Ibuotikọ oro etienede ọyọbọrọ mme mbụme emi ye mme akpan mbụme en̄wen.

[Ebiet Ẹdade Ndise Ẹto ke page 3]

AP Photo/Adam Butler