Job Ọnọ Enyịn̄ Jehovah Ubọn̄
Job Ọnọ Enyịn̄ Jehovah Ubọn̄
“Ẹkọm enyịn̄ Jehovah.”—JOB 1:21.
1. Ẹkere ke anie ekewet n̄wed Job, ndien ini ewe?
MOSES ekedi n̄kpọ nte isua 40 ke ini enye ekefehede ọkpọn̄ Egypt okodụn̄ ke Midian mbak Pharaoh ediwot enye. (Utom 7:23, 29) Anaedi enye ama etie do okop nnanenyịn oro ekesịmde Job sia Job okodụn̄ ke Uz emi okodude ekpere Midian. Ke ediwak isua ẹma ẹkebe, Moses ye nditọ Israel ẹma ẹsan̄a ẹkpere Uz ke mmọ ẹma ẹkekpere Isọn̄ Un̄wọn̄ọ. Anaedi ini emi ke Moses ekedikop nte Abasi ọkọdiọn̄de Job ke akpatre. Mme Jew ẹdọhọ ke Moses ekewet n̄wed Job ke Job ama akakpa.
2. Didie ke n̄wed Job ọsọn̄ọ mbuọtidem mme asan̄autom Jehovah oro ẹdude idahaemi?
2 N̄wed Job enen̄ede ọsọn̄ọ mbuọtidem mme asan̄autom Abasi emi ẹdude idahaemi. Didie? Enye anam nnyịn idiọn̄ọ ata akpan n̄kpọ oro eketịbede ke heaven ye eneni oro Satan ekenenide aban̄a ukara Abasi. N̄wed Job enen̄ede anam nnyịn ifiọk se nsọn̄ọnda ọwọrọde, enye n̄ko anam idiọn̄ọ ntak emi Jehovah esiyakde ikọt esie ẹbọ ufen ndusụk ini. Ke adianade do, n̄wed Job owụt ke Satan kpa Devil edi akwa Asua Jehovah, enye n̄ko edi asua nnyịn. N̄wed Job owụt n̄ko ke mme anana-mfọnmma owo, ukem nte Job, ẹkeme ndisọn̄ọ nda nnam akpanikọ nnọ Jehovah kpa ye oro ẹsobode n̄kpọsọn̄ idomo. Ẹyak idụn̄ọde ndusụk n̄kpọ oro ẹtịn̄de ẹban̄a ke n̄wed Job.
Satan Odomo Job
3. Nso n̄kpọ ke nnyịn idiọn̄ọ iban̄a Job, ndien ntak emi Satan okodomode enye?
3 Job ekedi imọ ye ọwọrọiso owo, ye ata eti ibuot ufọk. Enye n̄ko ekedi eti ọnọitem, esinyụn̄ an̄wam mme ubuene. Se Job akakam anamde ọfọn akan edi ke enye ama abak Abasi. Bible ọdọhọ ke Job ama “ọfọn ama, onyụn̄ enen, onyụn̄ abak Abasi, onyụn̄ afara ke idiọk.” Satan kpa Devil okodomo Job ke ntak emi Job akabakde Abasi idịghe ke ntak emi enye ekenyenede n̄kpọ okonyụn̄ edide ọwọrọiso owo.—Job 1:1; 29:7-16; 31:1.
4. Nso idi nsọn̄ọnda?
4 N̄wed Job ibuot kiet etịn̄ nte mme angel ẹkesopde idem ke heaven ke iso Jehovah. Satan ama etiene odụk mbono oro, ndien do ke enye okodori Job ikọ. (Kot Job 1:6-11.) Okposụkedi emi Satan eketịn̄de aban̄a inyene Job, enye ekenen̄ede oyom ndidomo nsọn̄ọnda Job. “Nsọn̄ọnda” ọwọrọ ndinam se inende, nnana ndo nnyụn̄ nnana ntọi. Ke ini Bible ọdọhọde ke owo ọsọn̄ọ ada, oro ọwọrọ ke enye okpono Jehovah ke ofụri esịt.
5. Nso ke Satan eketịn̄ aban̄a Job?
5 Satan ọkọdọhọ ke Job ikponoke Abasi ke ofụri esịt. Enye ọkọdọhọ ke Job okpono Jehovah ke ntak emi Abasi ekpemede enye onyụn̄ ọnọde enye se enye oyomde. Jehovah ama ayak Satan odomo Job man owụt ke Satan ososu. Mmọdo, Satan ama ada usen kiet kpọt osobo onyụn̄ anam ẹyịp kpukpru ufene Job, owot nditọutom esie ye nditọ esie mboduop. (Job 1:13-19) Ndi Job ama ọduọ? Bible ọdọhọ ke n̄kukụre se ikọwọrọde ọbọn̄ mbon ke inua ke ofụri se iketịbede emi ekedi, “Jehovah ọkọnọ, Jehovah onyụn̄ ọbọ; ẹkọm enyịn̄ Jehovah.”—Job 1:21.
6. (a) Nso iketịbe isan̄ en̄wen oro nditọ Abasi ẹkesopde idem ke heaven? (b) Satan ekenyene anie ke ekikere ke ini akamiade ata aban̄a nsọn̄ọnda Job?
6 Ekem, nditọ Abasi ẹma ẹfiak ẹsop idem ke heaven. Satan ama afiak osu nsu odori Job, ete: “Ikpa ke ibuot ikpa, ye kpukpru se owo enyenede ke owo edinọ ke ibuot uwem esie. Edi kam nyan ubọk fo tụk ọkpọ esie, ye obụkidem esie: enye iditreke ndikpọn̄ fi an̄wa-an̄wa.” Itien̄wed emi owụt ke idịghe Job kpọt ke Satan eketịn̄ aban̄a. Ndidọhọ ‘Kpukpru se owo enyenede ke owo edinọ ke ibuot uwem esie’ owụt ke Devil eketịn̄ ikọ emi aban̄a “owo” ekededi oro atuakde ibuot ọnọ Jehovah. Ke oro ebede, Abasi ama ayak Satan ọtọ Job idiọk udọn̄ọ. (Job 2:1-8) Edi ntọn̄ọ akakam edi oro.
Se Ikemede Ndikpep Nto Job
7. Didie ke n̄wan Job ye mme ufan esie ẹkesịn̄ede enye?
7 Akpa idomo oro ekesịmde Job ama otụk n̄wan esie n̄ko. Anaedi ibuot ama oyon̄ enye ke ini kpukpru nditọ esie ẹkekpan̄ade, ofụri inyene mmọ ẹkenyụn̄ ẹtakde. Enyene ndidi ama abiak enye ndikụt ebe esie ọbọde ufen udọn̄ọ. Ntre enye ama ofiori ete: “Nte afo osụk omụm mfọn-mma fo akama? Kpọn̄ Abasi, ndien kpa n̄kpa.” Ekem Eliphaz, Bildad, ye Zophar ẹma ẹdi ndidọn̄ Job esịt. Edi utu ke ndidọn̄ enye esịt, mmọ ẹkekam ẹtịn̄ se ibiakde-biak enye. Ke uwụtn̄kpọ, Bildad ọkọdọhọ ke idiọkn̄kpọ nditọ Job okoyom mmọ okụt. Eliphaz ọdọhọ ke Job ọkọbọ ufen idiọkn̄kpọ esie. Enye n̄ko ọkọdọhọ ke ekpededi owo anam eti n̄kpọ, ke oro idoroke Abasi udori! (Job 2:9, 11; 4:8; 8:4; 16:2; 22:2, 3) Job ama aka iso ọsọn̄ọ ada kpa ye ofụri ndiọi ikọ ye nsịn̄ede oro. Edi akpanikọ nte ke Job ama edue ke ‘ndikenịm idem esie ke edinen n̄kan Abasi.’ (Job 32:2) Kpa ye ofụri se ikọwọrọde enye emi, enye okosụk ananam akpanikọ ọnọ Abasi.
8. Nso eti uwụtn̄kpọ ke Elihu ekenịm ọnọ mme ọnọitem mfịn?
8 Bible ọdọhọ ke Elihu ama onyụn̄ edi ndise Job. Elihu ama akpan̄ utọn̄ okop ofụri se Job ye mme ufan esie ẹketịn̄de. Elihu ama enen̄ede enyene ifiọk kpa ye oro enye ekedide eyenọwọn̄ ọnọ Job ye mme ufan esie mbita eken. Enye eketịn̄ ikọ ata ukpono ukpono ye Job. Elihu ama otoro Job ke eti ido esie. Edi enye ama ọdọhọ Job ke enye okụt idem ke edinen akaha. Ekem enye ama ọsọn̄ọ Job idem ete ke n̄kpọ isitreke ndifọn ye mbon oro ẹkade iso ẹnam akpanikọ ẹnọ Abasi. (Kot Job 36:1, 11.) Nso eti uwụtn̄kpọ ke emi edi ntem ọnọ mme ọnọitem mfịn! Elihu ama enyene ime, enen̄ede akpan̄ utọn̄, otoro Job ke ebiet emi enye akanamde ọfọn, onyụn̄ ọnọ nti item.—Job 32:6; 33:32.
9. Didie ke Jehovah akanyan̄a Job?
9 Ke akpatre, Jehovah ama edise Job. Bible ọdọhọ ete: “Jehovah etie ke oyobio ọbọrọ Job.” Jehovah ama obụp enye ediwak mbụme oro akanamde enye okpụhọde ekikere esie. Job ama enyịme nsuannọ oro, onyụn̄ ọdọhọ ete: “Mmedehe,” nnyụn̄ “[ntie] ke obu ye ntọn̄ ntua n̄kpọfiọk.” Ke Jehovah ama eketịn̄ ikọ ye Job ama, Enye ama ayat esịt ye mme ufan abian̄a ita oro ẹkekade ẹkese Job sia mmọ “mîkọdọhọke se inende.” Job kpọt okodot ndikpe Abasi ubọk ke ibuot mmọ. Ekem “Jehovah osio Job ke itie mbuot ekọn̄ afiak edi, ke ini enye anamde n̄kpe-ubọk ọnọ mme ufan esie: Jehovah onyụn̄ ọtọn̄ọ ntak ọnọ Job kpukpru se enye ekenyenede utịm ikaba.”—Job 38:1; 40:4; 42:6-10.
Ndi Imenen̄ede Ima Jehovah?
10. Ntak emi Jehovah mîkowotke Satan m̀mê ndifre enyịn mban̄a usọn̄enyịn esie?
10 Jehovah edi Andibot ekondo ye Andikara kpukpru n̄kpọ. Ntak emi enye mîkefreke enyịn iban̄a usọn̄enyịn Devil-e? Abasi ama ọfiọk ke edieke idopde uyo m̀mê isobode Satan, ke oro idiyakke ẹfiọk ke Satan okosu nsu. Devil ọkọdọhọ ke Job emi ekedide ata asan̄autom Jehovah ọyọkpọn̄ Abasi edieke enye atabade kpukpru se enye enyenede. Job ama ọsọn̄ọ ada. Ekem Satan ama ọdọhọ ke owo ekededi oro ọbọde ufen ọyọkpọn̄ Abasi. Job ama okụt ukụt, edi ọbọn̄ mbon ikọkpọn̄ke Abasi. Ntre, okposụkedi emi Job mîkọfọnke ima, enye ama owụt ke Satan edi ekpe nsu. Nso kaban̄a mme asan̄autom Abasi eken?
11. Didie ke Jesus ekenen̄ede owụt ke Satan edi ekpe nsu?
11 Ke akpanikọ, asan̄autom Abasi kiet kiet oro ọsọn̄ọde ada kpa ye se Satan anamde enye owụt ke imọ ke idem imọ idọhọ ke Satan edi osu nsu. Jesus ekedi isọn̄ ndinen̄ede n̄wụt ke Satan edi osu nsu. Jesus ekedi mfọnmma owo kpa nte Adam akpa ete nnyịn ekedide. Jesus ndisọn̄ọ nda nnam akpanikọ tutu esịm usen emi enye akpade ekenen̄ede owụt ke Satan edi ekpe nsu, ye nte ke enye okosu nsu odori ikọt Abasi.—Edi. 12:10.
12. Nso ifet ke asan̄autom Jehovah kiet kiet enyene?
12 Kpa ye kpukpru emi, Satan ke ododomo ikọt Jehovah. Kpukpru nnyịn imenyene ifet ndiwụt ke nnyịn owo kiet kiet ida ye Jehovah ye nte ke inam n̄kpọ esie sia imade enye, idịghe ke ntak se inyenede. Didie ke nnyịn ise utọ ifet oro? Nnyịn ida enye nte ata n̄kpọ ukpono. Edi n̄kpọ ndọn̄esịt n̄ko ndifiọk ke Jehovah ọyọnọ nnyịn ukeme ndiyọ kpa nte ọkọnọde Job, ye nte ke enye idiyakke Devil odomo nnyịn ebe se ikemede ndiyọ—1 Cor. 10:13.
Satan Edi Owo Usọn̄enyịn, Asua, ye Owo Mfiakedem
13. Nso ke n̄wed Job asian nnyịn aban̄a Satan?
13 N̄wed Abasi Usem Hebrew etịn̄ nte Satan akadiade ndọk akamia ata ye Jehovah onyụn̄ adade ubonowo otụn usụn̄. N̄wed Abasi Christian Usem Greek etịn̄ ekese aban̄a nte Satan ọkọbiọn̄ọde Jehovah, ndien n̄wed Ediyarade etịn̄ nte ke ibịghike Jehovah oyowụt ke imọ inyene unen ndikara oyonyụn̄ osobo Satan. N̄wed Job n̄ko etịn̄ aban̄a nsọn̄ibuot Satan. Ke ini Satan eketienede aka ebiet emi nditọ Abasi ẹkesopde idem, enye ikakaha ndiketiene ntoro Jehovah. Edi akaka ndidọk ubi. Ke enye ama okodori Job ikọ ama, Abasi onyụn̄ enyịme enye okodomo Job, enye ama “adaha ke iso Jehovah ọwọrọ.”—Job 1:12; 2:7.
14. Nso ke Satan akanam Job?
14 Ntre, n̄wed Job anam nnyịn idiọn̄ọ ke Satan edi ata asua nnyịn. Ke nditọ Abasi ẹma ẹkesop idem nte ẹtịn̄de ke Job 1:6, Bible itịn̄ke m̀mê ekebịghi didie mbemiso mmọ ẹfiak ẹsop idem nte ẹtịn̄de ke Job 2:1; edi Satan ama enen̄ede otụhọde Job ke ufan̄ ini emi. Nsọn̄ọnda Job akanam Jehovah ọdọhọ Satan ete: “[Job] onyụn̄ osụk omụm mfọn-mma esie akama; ndien afo ama esịn mi nsobo enye ke mînyeneke ntak.” Satan ikamaha ndinyịme ke imọ ikododori Job ikọ. Utu ke oro, enye ọkọdọhọ Abasi ayak imọ ifiak idomo Job idomo emi okponde akan akpa oro. Ke ntre, Devil ama odomo Job ke ini enye ekedide imọ ye ini emi enye ekedide ubuene. Emi owụt ke Satan isituaha mme ubuene ye mbon emi nnanenyịn esịmde mbọm. Enye esinen̄ede asua mbon oro ẹsọn̄ọde ẹda ye Abasi. (Job 2:3-5) Edi nsọn̄ọnda Job ama owụt ke Satan edi osu nsu.
15. Didie ke mbon mfiakedem oro ẹdude idahaemi ẹbiet Satan?
15 Satan edi akpa owo mfiakedem. Mbon mfiakedem emi ẹdude idahaemi ẹsinyụn̄ ẹnam n̄kpọ nte Devil. Mmọ ẹkeme ndisua nditọete nnyịn, mbiowo, m̀mê Otu Ukara. Ndusụk mbon mfiakedem isikam iyomke-yom ndikop ẹkotde enyịn̄ Jehovah. Mmọ iyomke-yom ndikpep n̄kpọ mban̄a Jehovah m̀mê ndikpono enye. Mbon mfiakedem ẹsinen̄ede ẹyom ndibiat mbuọtidem ikọt Abasi ukem nte Satan ete mmọ esinamde. (John 8:44) Ntak edi oro mme asan̄autom Jehovah mîsidụkke ndụk ye mmọ.—2 John 10, 11.
Job Ama Ọnọ Enyịn̄ Jehovah Ubọn̄
16. Didie ke Job akanam n̄kpọ ye Jehovah?
16 Job ama esikot onyụn̄ otoro enyịn̄ Jehovah. Idem ke ini ẹkedọhọde enye ke nditọ esie ẹkpan̄a, enye ikodorike Abasi se mînenke. Okposụkedi emi Job ekeduede ọdọhọ ke Abasi ọkọnọ imọ nditọ, ke enye onyụn̄ ọbọ, enye okosụk okpokpono enyịn̄ Jehovah. Kiet ke otu n̄ke esie edi emi: “Sese, ndibak Ọbọn̄ edi eti ibuot, ndinyụn̄ n̄kabade n̄kpọn̄ idiọk edi asian.”—Job 28:28.
17. Nso ikan̄wam Job ọsọn̄ọ ada?
17 Nso ikan̄wam Job ọsọn̄ọ ada? Ana in̄wan̄-in̄wan̄ nte ke Job ama enen̄ede ekpere Jehovah mbemiso mme afanikọn̄ oro ẹkesịmde enye. Kpa ye oro n̄kpọ ndomokiet mîdụhe ndiwụt ke Job ama ọfiọk ke Satan ama amia ata ye Jehovah, enye ama ebiere ndisọn̄ọ nda nnam akpanikọ nnọ Jehovah. Enye ọkọdọhọ ete: “Ndisioho mfọn-mma ke idem mi mfep tutu ndikpa.” (Job 27:5) Nso ikanam Job enen̄ede asan̄a ekpere Jehovah ntem? Eyịghe idụhe nte ke enye ama enen̄ede ama nte Abasi akanamde n̄kpọ ye Abraham, Isaac, ye Jacob emi ẹkedide iman esie. N̄ko, mme n̄kpọ-obot oro enye okokụtde ẹma ẹnam enye ọfiọk mme edu Jehovah.—Kot Job 12:7-9, 13, 16.
18. (a) Didie ke Job okowụt ke imeten̄e Jehovah? (b) Didie ke nnyịn ikpebe eti uwụtn̄kpọ Job?
18 Se Job ekekpepde aban̄a Jehovah ama anam enen̄ede ọdọn̄ enye ndinam se inemde Jehovah esịt. Enye ama esinam uwa ọnọ Abasi kpukpru ini sia enye ekekere ke ekeme ndidi ikọtufọk imọ ẹma ẹnam se iyatde Abasi m̀mê “ẹkpọn̄ Abasi ke esịt mmọ.” (Job 1:5) Idem kpa ye oro ẹkedomode enye ata idiọk idiọk, enye okosụk etịn̄ nti ikọ aban̄a Jehovah. (Job 10:12) Nso eti uwụtn̄kpọ ke emi ekedi ntem! Ana nnyịn n̄ko ikpep Ikọ Abasi ye uduak esie kpukpru ini. Nnyịn imesikpep n̄kpọ, idụk mme mbono esop, ibọn̄ akam, inyụn̄ iwọrọ an̄wautom kpukpru ini man inen̄ede isan̄a ikpere Jehovah. Ke adianade do, nnyịn imesisịn ukeme inam mme owo ẹdiọn̄ọ enyịn̄ Jehovah. Ndien ukem nte nsọn̄ọnda Job akadatde Jehovah esịt, ntre n̄ko ke nsọn̄ọnda mme asan̄autom esie mfịn esidat enye esịt. Iyeneme iban̄a emi ke ibuotikọ oro etienede.
Nte Afo Emeti?
• Nso ikanam Satan odomo Job?
• Nso idomo ke Job okosobo, ndien didie ke enye akanam n̄kpọ?
• Nso idin̄wam nnyịn isọn̄ọ ida nte Job?
• Nso ke n̄wed Job ekpep nnyịn aban̄a Satan?
[Mme Mbụme Ukpepn̄kpọ]
[Ndise ke page 4]
Mbụk Job eti nnyịn eneni oro Satan ekenenide aban̄a ukara Abasi
[Ndise ke page 6]
Nso utọ idaha ke ẹkeme ndidomo nsọn̄ọnda fo?