Bọ ke Inemesịt—Nọ ke Ofụri Esịt

EDIMA Ete nnyịn eke heaven, Jehovah, enyene udọn̄ ke idem nnyịn. Ikọ Abasi anam nnyịn ifiọk ke enye enen̄ede ekere aban̄a kpukpru mme asan̄autom esie. (1 Pet. 5:7) Usụn̄ kiet oro Jehovah owụtde ke imọ imekere iban̄a nnyịn edi ke ndin̄wam nnyịn ke nsio nsio usụn̄ man ikeme ndinam akpanikọ nnọ enye. (Isa. 48:17) Jehovah oyom nnyịn ida un̄wam oro enye ọnọde nnyịn inam n̄kpọ akpan akpan ke ini isobode afanikọn̄. Ibet Moses owụt ke Jehovah esin̄wam nnyịn.

Ke Ibet oro, Jehovah ama ada ima an̄wam “mme ubuene,” utọ nte eyenakpa, ebeakpa, ye isenowo. (Lev. 19:9, 10; Deut. 14:29) Enye ọfiọk ke ndusụk mme asan̄autom esie ẹyeyom un̄wam eto ekemmọ nditọete. (Jas. 1:27) Ntem, ikpanaha asan̄autom Abasi emen̄e ndibọ un̄wam oro Jehovah adade mme asan̄autom esie ọnọ enye. N̄ko, oyom inyene eti esịt ke ini ibọde un̄wam.

Bible owụt n̄ko ke ikọt Abasi ẹkpenyene nditat ubọk. Ti “ubuene ebeakpa” oro Jesus okokụtde ke temple ke Jerusalem. (Luke 21:1-4) Anaedi enye ama esibọ ufọn oto un̄wam oro Jehovah ekesinọde mme ebeakpa nte ekewetde ke Ibet. Kpa ye oro enye ekedide ubuene, ẹti enye nte andinọ idịghe nte andibọ. Anaedi edu emi ama esinam enye okop idatesịt koro Jesus ọkọdọhọ ke “inemesịt okpon ke ndinọnọ akan ke ndibọbọ.” (Utom 20:35) Nte itie N̄wed Abasi oro owụtde, didie ke afo ekeme ‘ndinọ owo n̄kpọ’ man etiene okop inemesịt?—Luke 6:38.

“Ndinam Didie Nnọ Jehovah Usiene?”

Andiwet psalm ama obụp idemesie ete: “Ndinam didie nnọ Jehovah usiene kpukpru mfọnido emi enye ọfọnde ye ami?” (Ps. 116:12) Didie ke Jehovah ọkọfọn ido ye enye? Jehovah ama ọsọn̄ọ enye idem ke ini “ukụt ye nnanenyịn.” N̄ko, Jehovah ama ‘osio ukpọn̄ esie ke n̄kpa.’ Mmọdo, enye okoyom ‘ndinọ Jehovah usiene.’ Nso ke andiwet psalm akanam? Enye ọkọdọhọ ete: “Nyosio mme akan̄a mi nnọ Jehovah.” (Ps. 116:3, 4, 8, 10-14) Enye ama ebiere ndinam kpukpru se enye ọkọwọn̄ọde ndinam nnọ Jehovah nnyụn̄ nnam kpukpru n̄kpọ oro Jehovah okoyomde oto enye.

Afo emekeme ndinam kpasụk ntre. Didie? Ke ndinam mme ibet ye edumbet Abasi kpukpru ini. Tuak ibuot nọ Jehovah ke ofụri esịt nyụn̄ yak spirit esie ada fi usụn̄ ke kpukpru se anamde. (Eccl. 12:13; Gal. 5:16-18) Ke nditịm ntịn̄, afo ukemeke ndinọ Jehovah usiene kpukpru n̄kpọ oro enye anamde ọnọ fi. Edi ‘esidat Jehovah esịt’ ke ini afo enyịmede ndinam utom esie ke ofụri esịt. (N̄ke 27:11) Nso  akwa ifet ke edi ntem ndidat Jehovah esịt ke utọ usụn̄ emi!

Nam Esop Ọsọn̄ Idem

Edi akpanikọ ke ọmọbọ ufọn esop Abasi ke ediwak usụn̄. Jehovah ada esop esie ọnọ nnyịn ekese udia eke spirit. Ama ọbọ akpanikọ oro anamde fi ọwọrọ ufụn nsunsu ukpepn̄kpọ ido ukpono onyụn̄ ọwọrọ ke ekịm eke spirit oro mmọ ẹdude. (John 8:32) Ke mme mbono esop, n̄kpri ye ikpọ mbono oro “ofụn emi anamde akpanikọ onyụn̄ enyenede ọniọn̄” etịmde, ke ọkọbọ ifiọk oro adade esịm nsinsi uwem ke Paradise isọn̄ emi ubiak ye ndutụhọ mîdidụhe aba. (Matt. 24:45-47) Ndi emekeme ndibat mme ufọn oro ọbọde idahaemi ke esop Abasi—ye enye oro edibọde ke ini iso? Nso ke ekeme ndinọ esop Abasi ke usiene ofụri n̄kpọ emi?

Apostle Paul ekewet ete: “Ofụri idem, emi ẹnamde akpaha adiana kiet onyụn̄ anam utom ọtọkiet ebe ke kpukpru ikek oro ẹnọde se ẹyomde, nte asan̄ade ekekem ye utom ndido kiet kiet ke nnennen udomo, anam idem ọkọri man anam enye ọsọn̄ọ owụhọ ke ima.” (Eph. 4:15, 16) Okposụkedi emi itien̄wed oro aban̄ade mme Christian oro ẹyetde aran akpan akpan, edumbet esie ekeme ndinyene n̄kpọ ndinam ye kpukpru Christian mfịn. Ih, kpukpru owo ke esop ẹkeme ndinam esop ọsọn̄ idem onyụn̄ ọkọri. Didie?

Imekeme ndinam emi ebe ke ndidomo ndisịn udọn̄ nnọ nnyụn̄ n̄n̄wam nditọete ẹsọn̄ọ ẹda ẹnam n̄kpọ Abasi kpukpru ini. (Rome 14:19) Imekeme n̄ko ndinam esop “ọkọri” ebe ke ndin̄wụm mbun̄wụm spirit Abasi ke ini inamde n̄kpọ ye nditọete nnyịn. (Gal. 5:22, 23) N̄ko n̄ko, imekeme ndiyom ifet ‘ndinam se ifọnde nnọ kpukpru owo, edi akpan akpan ye mmọ emi ẹbuanade n̄kpọ ye nnyịn ke mbuọtidem.’ (Gal. 6:10; Heb. 13:16) Kpukpru owo ke esop—nditọete iren ye iban, n̄kpri ye ikpọ—ẹkeme ndinam esop “ọkọri man anam enye ọsọn̄ọ owụhọ ke ima.”

Ke adianade do, imekeme ndida ukeme, odudu, ye inyene nnyịn nsịn ke utom unyan̄a uwem oro esop anamde. Jesus Christ ọkọdọhọ ete: “Mbufo ẹkebọ ke mfọn.” Nso ke ikpanam sia ikọbọde ke mfọn? Enye ọkọdọhọ ete: “Ẹnọ ke mfọn.” (Matt. 10:8) Ke ntre, nen̄ede sịn ifịk nam utom edikwọrọ Obio Ubọn̄ ye utom edinam mbet. (Matt. 24:14; 28:19, 20) Ndi enyene n̄kpọ oro akpande fi ndinam utom emi? Ti ubuene ebeakpa oro Jesus eketịn̄de aban̄a. Se enye ọkọnọde ikawakke. Edi Jesus ọkọdọhọ ke enye ọnọ akan kpukpru mbon eken. Enye akanam se idaha esie akayakde enye anam.—2 Cor. 8:1-5, 12.

Bọ ke Eti Esịt

Edi akpanikọ ke odu ini oro anade ọbọ un̄wam oto esop. Kûmen̄e ndibọ un̄wam ekededi oro esop ẹnọde fi nte osụk an̄wanade ndiyọ n̄kpọsọn̄ idaha editịm n̄kpọ emi. Jehovah ọnọ nnyịn iren oro ẹdotde ẹnyụn̄ ẹkerede ẹban̄a man mmọ “ẹkpeme esop”—ẹnọ fi un̄wam ke ini osobode idomo ye ukụt. (Utom 20:28) Mbiowo ye mbon eken ke esop ẹyema ndidọn̄ fi esịt, ndin̄wam fi, nnyụn̄ n̄kpeme fi ke mme ini afanikọn̄.—Gal. 6:2; 1 Thess. 5:14.

Kụt ete ke ọbọ un̄wam oro oyomde ke eti esịt. Sinen̄ede wụt esịtekọm ke un̄wam oro ẹnọde fi. Da un̄wam oro nditọete ẹnọde fi nte mfọnido Abasi oro owo mîdotke. (1 Pet. 4:10) Ntak edide akpan n̄kpọ ndinam ntre? Koro nnyịn iyomke ndinana esịtekọm nte ediwak owo ke ererimbot ẹnanade.

Da Ukem Ukem Nyụn̄ Nyene Eti Ibuot

Kop se Paul eketịn̄de aban̄a Timothy ke leta oro enye ekewetde ọnọ ẹsọk esop  ke Philippi: “Nnyeneke owo en̄wen eke enyenede edu emi ebietde eke esie emi editịmde ese aban̄a mme n̄kpọ oro ẹban̄ade mbufo.” Edi Paul ama adian do ete: “Kpukpru owo eken ẹyom ufọn idemmọ, idịghe eke Christ Jesus.” (Phil. 2:20, 21) Ke ikerede iban̄a se Paul eketịn̄de emi, didie ke ikeme nditre ndisịn idem ‘nyom ufọn’ idem nnyịn?

Nnyịn ikpenyeneke ndinyenyịk nditọete ẹn̄wam nnyịn ke ini isobode afanikọn̄. Ntak-a? Da ke uwụtn̄kpọ: Imesinen̄ede ikop inemesịt edieke nditọete ẹn̄wamde nnyịn ke ini mbabuat n̄kpọntịbe. Edi ndi nnyịn isidọhọ mmọ ẹn̄wam nnyịn? Baba. Ntre, ke adan̄aemi ndima nditọete nnyịn ẹsikopde inemesịt ndin̄wam nnyịn, ikpanaha ikere ke akpana mmọ ẹmen kpukpru mbiomo nnyịn ẹbiom. Idem n̄kpọ, n̄kọ ikpama nditọete nnyịn ẹnam se ededi oro mmọ ẹkemede ke imaesịt.

Ke akpanikọ, nditọete ẹben̄e idem ẹnyụn̄ ẹnyịme ndin̄wam fi ini ekededi. Edi, ke ndusụk idaha, mmọ idikemeke ndinam kpukpru se oyomde mmọ ẹnam. Edieke oro etịbede, ti ke kpa nte Jehovah ekesede aban̄a andiwet psalm, enye eyese aban̄a fi ke kpukpru idomo oro osobode.—Ps. 116:1, 2; Phil. 4:10-13.

Mmọdo, kop inemesịt ndibọ n̄kpọ ekededi oro Jehovah ọnọde fi, akpan akpan ke ini osobode ukụt ye afanikọn̄. (Ps. 55:22) Se enye oyomde afo anam edi oro. Edi kûfre ke idiọk idụhe edieke etienede ọnọ owo n̄kpọ n̄ko koro ẹsidọhọ ke ubọk otụk edem, edem otụk ubọk. Ke ntre, nen̄ede ‘biere ke esịt fo’ nditiene ntịp se ededi oro enyenede nsịn ke utom Abasi. (2 Cor. 9:6, 7) Ntem ke afo edikeme ndibọ ke inemesịt nnyụn̄ nnọ ke ofụri esịt.

[Ekebe/Mme ndise ke page 31]

“Ndinam didie nnọ Jehovah usiene kpukpru mfọnido emi enye ọfọnde ye ami?”—Ps. 116:12

▪ Yom ifet ‘nam se ifọnde nọ kpukpru owo’

▪ Sịn udọn̄ nọ nyụn̄ n̄wam nditọete ẹsọn̄ọ ẹda ẹnam n̄kpọ Abasi

▪ Nen̄ede sịn ifịk ke utom unam mbet nte ekpekekeme