Ndi Emekeme Ndiyere Ikot Macedonia?

APOSTLE Paul ama okụt n̄kukụt ke ini enye okodude ke esụk Troas ke Asia Minor. Owo Macedonia kiet ama ekpe enye ubọk ke n̄kukụt oro ete: “Be di ke Macedonia din̄wam nnyịn.” Ekedi Paul okokụt n̄kukụt emi, enye ye nsan̄a ukwọrọikọ esie ẹfiọk ke ‘Abasi okot mmimọ ete ikatan̄a eti mbụk’ inọ mbon Macedonia. Ndi isan̄ emi ama enyene ufọn? Lydia ye ikọtufọk esie emi ẹkedụn̄ọde ke Philippi emi ekedide akpan obio ke Macedonia ẹma ẹbọ akpanikọ. Mbon en̄wen n̄ko ke obio oro ẹma ẹkabade ẹdi mme Christian.—Utom 16:9-15.

Mme Ntiense Jehovah n̄ko ẹnyene ukem ifịk emi. Ediwak mmọ ẹsika ẹkedụn̄ ẹnyụn̄ ẹse ẹban̄a idemmọ ke ebiet emi ẹnen̄erede ẹyom mme ọkwọrọ eti mbụk. Ke uwụtn̄kpọ, Lisa okoyom ndinen̄ede nsịn idem n̄kwọrọ ikọ, ntre enye ama ọkpọn̄ Canada okodụn̄ ke Kenya. Trevor ye Emily emi ẹtode Canada n̄ko ẹma ẹkpọn̄ obio mmọ ẹkedụn̄ ke Malawi man ẹken̄wam ke utom ukwọrọikọ. Paul ye Maggie ẹto England. Ke mmọ ẹma ẹkekpọn̄ utom, mmọ ẹma ẹda ifet emi ẹka ẹken̄wam ke utom ukwọrọikọ ke Edem Usiahautịn Africa. Ndi emesima ndiwa idem nnam n̄kpọ Abasi? Ndi emekeme ndikpebe nditọete emi? Ntre, ewe edumbet Bible ye item ẹkeme ndin̄wam fi?

Dụn̄ọde Idemfo

N̄kpọ kiet emi okpobụpde idemfo ekpedi se inamde oyom ndika n̄kọkwọrọ ikọ ke esenidụt. Jesus ọkọdọhọ ke n̄kponn̄kan ibet edi:  “[Ma] Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.” Ntre, ima Abasi ye udọn̄ edinam mbet akpanam oyom ndika esenidụt n̄kọkwọrọ ikọ. Jesus ama ọdọhọ n̄ko ete: “Udiana, eke ebietde enye, edi emi, ‘Afo enyene ndima mbọhọidụn̄ fo nte idemfo.’” Edieke inyịmede ndin̄wam mbọhọidụn̄ nnyịn ke ofụri esịt, oro owụt ke imama mmọ. (Matt. 22:36-39; 28:19, 20) Ndikanam utom ke esenidụt idịghe n̄kpọ mbre, edi edi utom emi oyomde n̄waidem. Enye itiehe nte owo ndika nduọkodudu ke obio en̄wen. Ima esinam owo anam emi. Remco ye Suzanne, nditọ Netherlands, emi ẹnamde utom ukwọrọikọ ke Namibia ẹdọhọ ẹte, “Ima anam nnyịn idu mi.”

Willie emi edide esenyịn circuit ke Namibia ọdọhọ ete: “Mbon emi ẹsikade esenidụt ẹkekwọrọ ikọ isikereke ke nditọete ẹdise ẹban̄a mmimọ do. Mmọ ẹsika man ẹken̄wam nditọete do ẹkwọrọ ikọ.”

Ke ama eketie ekere se inamde oyom ndika esenidụt, bụp idemfo ete: ‘Ndi mmenyene ifiọk n̄kem ndikọkwọrọ ikọ ke esenidụt? Ndi mmenen̄ede ndiọn̄ọ ukwọrọikọ? Ewe usem ke n̄keme ndisem? Ndi mmeben̄e idem ndikpep usem en̄wen?’ Tie ye ubon mbufo neme n̄kpọ emi. Tịn̄ nọ mbiowo esop mbufo. Nyụn̄ bọn̄ akam n̄ko nọ Jehovah. Kpukpru emi ẹyenam ọfiọk m̀mê eyekeme ndika n̄kanam utom ukwọrọikọ ke esenidụt.—Se ekebe oro  “Ndi Emekeme Ndika Esenidụt?”

Ebiet Emi Akpakade

Ẹkedọhọ Paul aka Macedonia. Jehovah iwụtke aba mme owo ebiet emi mmọ  ẹkpekade ke n̄kukụt. Edi magazine emi ye mme n̄wed nnyịn eken ẹkeme ndin̄wam nnyịn idiọn̄ọ ebiet emi ẹyomde mme ọkwọrọ eti mbụk. Ntre, emekeme ndiwet ebiet emi ọfiọkde ke ẹyom utọ un̄wam emi. Edieke mûben̄eke idem ndikpep usem en̄wen m̀mê ndidụn̄ ke esenidụt, emekeme ndika ebiet emi ẹsemde usem emi ọfiọkde. Bụp nte edisan̄ade inyene n̄wed ukaisan̄, nte edisan̄ade ikesịm do, nte obio oro etiede, ye nte uwem etiede do. Ọkpọfọn eneme n̄kpọ emi ye owo emi odude ke esenidụt anam utom ukwọrọikọ. Nen̄ede bọn̄ akam ban̄a emi. Ti ke ‘edisana spirit ikayakke Paul ye nsan̄a esie ẹkwọrọ ikọ ke n̄kann̄kụk Asia.’ Okposụkedi emi mmọ ẹkedomode ndidụk Bithynia, ‘spirit Jesus ikayakke mmọ ẹdụk’ do n̄ko. Ntre, ekeme ndidi ayada fi ini ndifiọk ebiet emi akpakade akan̄wam.—Utom 16:6-10.

Ekeme ndidi ọmọfiọk ndien se akpanamde. Ntem, edieke oyomde ndika esenidụt n̄kọkwọrọ ikọ, wet leta nọ n̄kọk itieutom emi esede aban̄a idụt emi aduakde ndika. Ke leta oro, siak kpukpru ifetutom oro akakamade ye enye oro osụk akamade idahaemi. Bụp mmọ nte uwem etiede do, ebiet emi edikụtde utọ ufọk emi ekemede ndikpe, utọ ufọkibọk emi ẹdude do, ye utọ utom emi owo ekemede ndisọp n̄kụt do. Kpọn̄ leta emi nọ kọmiti utom esop mbufo. Mmọ n̄ko ẹyewet leta ẹban̄a fi, ẹnyụn̄ ẹdian leta mbiba emi ẹnọ ẹsọk n̄kọk itieutom idụt emi afo emekde ndika. Se n̄kọk itieutom oro ẹdibọrọde fi ayanam ọfiọk ebiet emi edikemede ndika.

Willie oro ikasiakde ke enyọn̄ emi ọdọhọ ete: “Ndusụk owo ẹsibem iso ẹka ẹkese idụt oro mmọ ẹyomde ndikodụn̄ n̄kwọrọ ikọ, ẹnyụn̄ ẹse m̀mê m̀mọ̀n̄ ke mmimọ idima ndidụn̄. Ebe ye n̄wan kiet ẹma ẹfiọk ke mmimọ idikemeke ndidụn̄ ke obio-in̄wan̄. Ntre, mmọ ẹma ẹkedụn̄ ke ekpri obio emi ẹkeyomde mme ọkwọrọikọ, emi mmọ ẹkenyụn̄ ẹkemede ndinyene eti ufọk, ikan̄ ilektrik, ye n̄kpọ ntre.”

Ben̄e Idem Ndiyọ N̄kpọsọn̄ Idaha

Isimemke owo ndikpọn̄ obio esie n̄kodụn̄ ke obio en̄wen. Lisa oro ikasiakde ke enyọn̄ emi ọdọhọ ete: “Ndobo ekeme ndimen fi mmen.” Nso ikan̄wam enye? Se ikenen̄erede in̄wam enye ekedi ndidian idem ye nditọete ke obufa esop mmọ. Enye ama ebiere ndidiọn̄ọ enyịn̄ kpukpru owo ke esop mmọ. Ntre, enye ama esibak aka mbono esop esinyụn̄ atuak ada eneme nneme ye nditọete ke mbono esop ama akasuana. Lisa ama esisan̄a ye nditọete emi ke an̄wautom, esikot mmọ ufọk, onyụn̄ anam ufan ye mmọ. Enye ọdọhọ ete: “Ntuaha n̄kpọfiọk ke ndikedi mi. Jehovah enen̄ede ọdiọn̄ mi.”

Paul ye Maggie ẹma ẹkpọn̄ ufọk emi mmọ ẹma ẹkedụn̄ọ ke ofụri isua 30 ke nditọ  mmọ ẹma ẹkekponi. Paul ọdọhọ ete: “Ndinyam inyene nnyịn ikakam idịghe n̄kpọ ndomokiet, edi se ikakam isọn̄de nnyịn ekedi ndikpọn̄ ubon nnyịn. Ima itua eyet etieti ke ubomofụm. Utọ n̄kpọ emi ekeme ndinam owo atua n̄kpọfiọk. Edi ima ibuọt idem ye Jehovah. Edieke ọtọn̄ọde ndinyene ufan do, eyenem fi ndika iso nnam utom fo.”

Greg ye Crystal ẹma ẹkpọn̄ Canada ẹka Namibia sia ẹsemde Ikọmbakara do n̄ko. Edi nte ini akakade, mmọ ẹma ẹdikụt ufọn ẹdikpep mme usem eken ke idụt oro. Mmọ ẹdọhọ ẹte: “Umiọn̄ ama esimụm nnyịn ndusụk ini. Edi ke ima ikekpep usem eken ke idụt oro, ima idifiọk nte mmọ ẹsidude uwem. Ndidian idem ye nditọete nnyịn ama anam imehe ye obufa ebietidụn̄ nnyịn.”

Ndisụhọde idem nnyụn̄ nnyịme ndiwa idem ntem esinem nditọete obio oro n̄ko. Esinen̄ede enem Jenny nditi ubon emi ẹkedide Ireland ẹdikwọrọ ikọ. Enye ọdọhọ ete: “Mmọ ẹma ẹfọn ido etieti. Mmọ ẹkenen̄ede ẹdi ndin̄wam nnyịn, ikedịghe man nnyịn idin̄wam mmọ. Ifịk ye inemesịt mmọ ama anam ntiene n̄kanam utom ke ebiet emi ẹyomde mme ọkwọrọikọ.” Jenny asan̄a ye ebe esie anam utom isụn̄utom ke Gambia idahaemi.

“Ufọn Jehovah Ofori Owo”

Ifiọkutom emi apostle Paul ekenyenede ke Macedonia ama enem etieti. Ke n̄kpọ nte isua duop ama ekebe, enye ama ewet leta ọnọ nditọete ke Philippi ete: “Mmesikọm Abasi mi ke kpukpru ini eke ntide mbufo.”—Phil. 1:3.

Ntre ke okonyụn̄ etie Trevor ye Emily ke idem. Mmọ ẹma ẹnam utom ke Malawi mbemiso ẹkekade Ufọkn̄wed Enyọn̄-Ukpeme Ukpep Bible eke Gilead. Mmọ ẹdọhọ ete: “Ima isikere ndusụk ini m̀mê nnennen n̄kpọ ke ikakam inam emi, kpa ye oro, ikosụk ikokop inemesịt. Ima inen̄ede ikpere kiet eken inyụn̄ ikụt ke Jehovah enen̄ede ọdiọn̄ nnyịn.” Greg ye Crystal oro ikasiakde ke enyọn̄ emi ẹdọhọ n̄ko ẹte: “Idụhe se ikpanamde oro ọfọnde nte se isụk inamde idahaemi.”

Imọfiọk ke idịghe kpukpru owo ẹdikeme ndika esenidụt n̄kan̄wam. Ndusụk owo ẹsika ẹkedụn̄ ke mme ebiet oro ẹnen̄erede ẹyom mme ọkwọrọikọ ke idụt mmọ. Ndusụk ẹsika ẹken̄wam ke mme esop oro ẹyomde un̄wam ke n̄kann̄kụk mmọ. Se ikam idide akpan n̄kpọ edi ndinam n̄kpọ Jehovah ke ofụri ukpọn̄. (Col. 3:23) Edieke anamde oro, ikọ Abasi emi oyosu fi ke idem: “Ufọn Jehovah ofori owo, enye inyụn̄ idianke afanikọn̄ ke esịt.”—N̄ke 10:22.

[Ekebe/Ndise ke page 5]

 Ndi Emekeme Ndika Esenidụt?

Man ekeme ndifiọk m̀mê iyekeme ndikọkwọrọ ikọ ke esenidụt, bọrọ mme mbụme emi ẹdude ke idak emi ke ama ọkọbọn̄ akam ke ofụri esịt ọnọ Abasi aban̄a emi. N̄kani Enyọn̄-Ukpeme ẹkeme n̄ko ndin̄wam fi ọfiọk m̀mê eyekeme ndikan̄wam ke esenidụt.

• Ndi mmenen̄ede mma n̄kpọ Abasi?—“Mme Usụn̄ Ndinyene Inemesịt” (October 15, 1997, page 6)

• Ndi mmenen̄ede ndiọn̄ọ ukwọrọikọ?—“Nte Ẹkụtde Unen ke Utom Usiakusụn̄” (May 15, 1989, page 21)

• Ndi nyekeme ndikpọn̄ ubon ye mme ufan mi?—“Ndiyọ Itọn̄ Uka Ufọk ke Utom Abasi” (May 15, 1994, page 28)

• Ndi mmekeme ndikpep usem en̄wen?—“Ndinam Utom ye Esop Oro Ẹsemde Usem En̄wen” (March 15, 2006, page 17)

• Ndi nyekeme ndise mban̄a idem mi ke esenidụt?—“Nte Afo Emekeme Ndinam Utom ke An̄wautom Esenidụt?” (October 15, 1999, page 23)

[Ndise ke page 6]

Ndisụhọde idem nnyụn̄ nnyịme ndiwa idem esinem nditọete obio oro n̄ko

[Ndise ke page 7]

Mbon oro ẹkade ndin̄wam nditọete mmọ ẹdi mbon emi ẹsikụtde unen