N̄wam Nditọ Fo Ẹyọ Mfịna Mmọ

NDITỌ nnyịn ẹsisobo ekese mfịna. Spirit idiọk ererimbot Satan emi ye “udọn̄ ini uyen” ẹsifịna mmọ. (2 Tim. 2:22; 1 John 5:19) Ke adianade do, mbon emi mîmaha Mme Ntiense Jehovah ẹsisak ẹnyụn̄ ẹsuene mmọ ke ntak emi mmọ ẹsịnde ifịk ẹdomo ‘nditi Andibot mmọ.’ (Eccl. 12:1) Eyenete nnyịn emi ekerede Vincent etịn̄ se iketịbede inọ imọ ke ini ikedide eyenọwọn̄, ete: “Ẹma ẹsisuene mi, ẹyom mi ikọ, mîdịghe ẹyom en̄wan ye ami sia ndide kiet ke otu Mme Ntiense Jehovah. N̄kpọ emi ama esifịna mi ndusụk ini tutu n̄wed odorode mi.” *

Ke adianade ye mfịna emi mbon ererimbot ẹsinọde nditọ nnyịn, mmọ ẹsin̄wana n̄ko ye udọn̄ ediyom nditie nte ubọkn̄ka. Cathleen emi edide eyenete an̄wan isua 16 ọdọhọ ete: “Imemke utom nditie ntre isio isio ubietke ubọkn̄ka.” Alan eyenete  nnyịn emi edide isua 21 ọdọhọ ete: “Nditọ ufọkn̄wed nnyịn ẹma ẹsikot mi ẹte ntiene mmimọ ke utịturua n̄kadia uwem, ama esinyụn̄ ọdọn̄ mi nditiene mmọ n̄ka.” N̄kpọ en̄wen emi esinen̄erede ọdọn̄ nditọwọn̄ esidi nditiene mbre mbre mbuba ke ufọkn̄wed, ndien emi ekeme ndinam owo odụk idiọk ndụk. Tanya emi edide eyenete nnyịn an̄wan ọdọhọ ete: “Mma mma mbre mbuba etieti. Mme andikpep mbre mbuba ke ufọkn̄wed nnyịn ẹma ẹsidomo ndinam mi ntiene ndụk n̄ka mbre mbuba. Ikesimemke ndisịn.”

Didie ke ekeme ndin̄wam nditọ fo ẹyọ kpukpru emi? Jehovah ọdọhọ mme ete ye eka ete ẹteme nditọ mmọ se ẹkpenamde. (N̄ke 22:6; Eph. 6:4) Kpukpru ete ye eka emi ẹbakde Abasi ẹyom nditọ mmọ ẹkop item Jehovah. (N̄ke 6:20-23) Emi ayan̄wam mme uyen ẹkeme ndibiọn̄ọ odudu ererimbot emi idem ke ebiet emi ete ye eka mmọ mîdụhe.

Isimemke utom inọ mme ete ye eka ndin̄wana idem, nse mban̄a ubon, nnyụn̄ ntiene mbuana ke ndutịm esop. Ndusụk mbon oro ẹnamde kpukpru emi ẹbọk nditọ ikpọn̄, ndusụk ẹnyene ebe m̀mê n̄wan oro mînịmke ke akpanikọ, emi mîyakke mmọ ẹbọ emem. Kpa ye kpukpru emi, Jehovah oyom mme ete ye eka ẹsio ini ẹnịm ẹkpep nditọ mmọ Bible. Mmọdo, nso ke akpanam man an̄wam nditọ fo ẹyọ kpukpru mfịghe, idomo, ye afanikọn̄ oro ẹsisịmde mmọ ke usen ke usen?

Ndidi Ufan Jehovah

Akpa kan̄a, ana inam nditọ nnyịn ẹfiọk ke Jehovah edi ata Owo. Ana in̄wam mmọ ẹkụt “Enye emi enyịn owo mîkwe.” (Heb. 11:27) Vincent oro ikasiakde ke enyọn̄ emi eti nte ete ye eka esie ẹken̄wamde enye edi ufan Jehovah. Enye ọdọhọ ete: “Mmọ ẹma ẹkpep mi ufọn edibọn̄ akam. N̄kọtọn̄ọ ndisibọn̄ akam mbemiso ndụkde idap toto ke eyenọwọn̄. Mma nnen̄ede n̄kpere Jehovah idem.” Ndi emesitie ye nditọ fo ọbọn̄ akam? Ntak emi mûkpan̄ke utọn̄ ukop nte mmọ ẹsibọn̄de akam-a? Ndi mmọ ẹsisụk ẹbọn̄  ukot akam kiet kpukpru ini? Mîdịghe ndi akam mmọ esiwụt ke mmọ ẹnen̄ede ẹma Jehovah? Edieke akpan̄de utọn̄ okop nte mmọ ẹbọn̄de akam, eyekeme ndifiọk m̀mê mmọ ẹnen̄ede ẹkpere Abasi.

Ndikot Bible ekeme ndinam mme uyen ẹnen̄ede ẹkpere Jehovah. Cathleen oro ikasiakde ke enyọn̄ emi ọdọhọ ete: “Ndikesikot Bible ke ini n̄kedide ekpri ama enen̄ede an̄wam mi. Emi ama anam nnen̄ede mfiọk ke ekpededi kpukpru owo ẹsua mi ke Jehovah do ye ami.” Ndi nditọ fo ẹnyene ndutịm ukot Bible?—Ps. 1:1-3; 77:12.

Edi akpanikọ ke nte eyen kiet adade ukpep emi ẹnọde enye esikpụhọde ye nte enye eken adade. N̄ko, isua emana mmọ ekeme nditụk nte mmọ ẹnamde n̄kọri. Edi esisọn̄ mme uyen emi owo mîn̄wamke ndinen̄ede mfiọk Jehovah. Mmọdo, ana mme ete ye eka ẹdọdiọn̄ ẹsiak ikọ Abasi ẹnọ nditọ mmọ, man mmọ ẹkeme ndinam se Jehovah amade ke ebiet ekededi emi mmọ ẹdude. (Deut. 6:6-9) Oyom mmọ ẹfiọk ke Jehovah ama mmimọ.

Nte Akpanamde Nneme Mbufo Enem

Usụn̄ en̄wen emi ekemede ndin̄wam nditọ fo edi ndisineme nneme ye mmọ. Edi eti nneme idịghe sụk nditịn̄ ikọ nnọ nditọ kpọt. Emi abuana ndibụp mmọ mbụme nnyụn̄ n̄kpan̄ utọn̄ n̄kop ibọrọ mmọ, idem ekpededi umaha se mmọ ẹtịn̄de. Anne emi enyenede nditọiren iba ọdọhọ ete: “Mmesibụp mmọ mbụme tutu se mmọ ẹtịn̄de ẹnen̄ede an̄wan̄a mi. N̄ko, ndibụp mbụme ntem esin̄wam mi mfiọk mfịna mmọ.” Ndi nditọ fo ẹsikụt ke emesikpan̄ utọn̄ ọnọ mmimọ ke ini itịn̄de ikọ inọ fi? Tanya oro ikasiakde ke enyọn̄ emi ọdọhọ ete: “Ete ye eka mi ẹma ẹsinen̄ede ẹkpan̄ utọn̄ ẹnọ mi ẹsinyụn̄ ẹti se ikenemede. Mmọ ẹma ẹdiọn̄ọ enyịn̄ nditọ ufọkn̄wed nnyịn, ẹsibụp ẹban̄a mmọ, ẹsinyụn̄  ẹtịn̄ n̄kpọ ẹban̄a akani nneme oro ikenemede.” Ndisikpan̄ utọn̄ nnọ nditọ fo nnyụn̄ nti se mmọ ẹkenemede ye afo ekeme ndinam nneme mbufo enem.

Ndusụk ubon ẹsineme nti nneme ke ini udia. Vincent ọdọhọ ete: “Ima isinen̄ede ima nditie ọtọkiet ndia udia. Mama ye Papa ẹkesiyom kpukpru nnyịn itie ọtọkiet idia udia ini ekededi oro ikemede. Mmọ ikesiyakke ise ekebe ndise, ikpọhọde ekebe utịn̄ikọ, m̀mê ikot n̄wed ke ini udia. Sia nneme nnyịn ekesiban̄ade n̄kpri n̄kpri n̄kpọ, emi ama esinọ mi ifet ndibọ nduọkodudu ke kpukpru nsịn̄ede oro n̄kosobode ke ufọkn̄wed. Ndisineme nneme ye ete ye eka mi ke ini udia ama anam n̄keme ndisitịn̄ mfịna mi nnọ mmọ man ẹn̄wam mi.”

Bụp idemfo ete, ‘Ikafan̄ ke urua ke kpukpru owo ke ufọk nnyịn ẹsitie ọtọkiet ẹdia udia?’ Ndi ndinam ndutịm man kpukpru owo ke ufọk mbufo ẹsitie ọtọkiet ẹdia udia ekeme ndinọ fi ifet ndisineme nti nneme ye nditọ fo?

Ọfọn Ẹsinanam Se Ikemede Nditịbe Ẹwụt

Ndinịm Utuakibuot Ubon kpukpru urua esinọ ubon ifet nditie ọtọkiet nneme nneme onyụn̄ an̄wam mme uyen ẹyọ mfịna mmọ. Alan oro ikasiakde ke enyọn̄ emi ọdọhọ ete: “Ete ye eka mi ẹkesida ini ukpepn̄kpọ ubon ẹsịn udọn̄ ẹnọ nnyịn nditịn̄ se isịnede nnyịn ke esịt. Mmọ ẹkesineme ibuotikọ emi enyenede n̄kpọ ndinam ye mfịna nnyịn.” Eka esie ọdọhọ ete: “Ima isinanam se nditọ nnyịn ẹkemede ndisobo iwụt mmọ ke ini ukpepn̄kpọ ubon. Emi ama esin̄wam mmọ ẹfiọk se ẹkpetịn̄de ke ini owo obụpde mmọ n̄kpọ aban̄a se mmọ ẹnịmde ke akpanikọ, ye nte mmọ ẹkpewụtde ke se inịmde edi akpanikọ. Emi ama anam mmọ ẹkeme ndiyọ mfịna ekededi oro mmọ ẹsobode.”

Ke nditịm ntịn̄, ke ini ubọkn̄ka ẹdọhọde uyen ẹte anam idiọkn̄kpọ, ndidọhọ nnamke, m̀mê ndikụbi inua ndaha, ikemke. Mme owo ẹyeyom ndifiọk ntak emi mmọ ẹnamde n̄kpọ ye ntak emi mmọ mînyịmeke ndinam.  Ana mmọ ẹnen̄ede ẹfiọk se ẹkpenamde ke ini ẹsakde mmọ ke ntak emi mmọ ẹdide Mme Ntiense Jehovah. Mmọ idikemeke ndisọn̄ọ nda nnam n̄kpọ Abasi edieke mmọ mîkemeke ndinam se mmọ ẹnịmde an̄wan̄a mbon en̄wen. Ndisinanam emi n̄wụt ke ufọk ekeme ndinam mmọ ẹnyene uko ndinam kpukpru emi.

Ẹwet mme n̄kpọ oro ẹkemede ndinanam n̄wụt ke ini ukpepn̄kpọ ubon ke  ekebe oro odude ke page 18. Emekeme ndifan̄a n̄kpọ ye nditọ fo man enen̄ede etie nte se mmọ ẹsisobode. Emekeme n̄ko ndineme mban̄a ndusụk akpan n̄kpọ oro ẹkpepde ke Bible. Ndikpep nditọ n̄kpọ ke ufọk esinam mmọ ẹkeme ndiyọ se ededi oro mmọ ẹsobode ke ufọkn̄wed ye ke ebiet ekededi.

Ndi Ufọk Mbufo Enem Owo Ndidu?

Ndi ẹsidọn̄ nditọ fo ndinyọn̄ ndi ufọk ke n̄wed ama akasuana? Edieke ufọk mbufo esinemde ndidu, emi ayan̄wam nditọ fo ẹyọ mfịna oro mmọ ẹsisobode ke usen ke usen. Eyenete an̄wan kiet emi odude ke Bethel idahaemi ọdọhọ ete: “Ke ini n̄kedide eyenọwọn̄, n̄kpọ kiet emi ekenen̄erede an̄wam mi ekedi nte ke ufọk nnyịn ama esinem etieti. Inamke n̄kpọ m̀mê nso ke ẹkenam mi ke ufọkn̄wed, mma mfiọk ke mma n̄kam nsesịm ufọk, ke mmọbọhọ.” Ufọk mbufo etie didie? Ndi ẹdiọn̄ọ mbufo nte mbon emi ‘ẹnyenede ima, ẹdatde esịt, ẹsinyụn̄ ẹtiede emem emem,’ mîdịghe ndi ‘iyatesịt, ndomoidem, ye ubahade’ ẹsidu ke ufọk mbufo? (Gal. 5:19-23) Edieke ẹsitọhọde kpukpru ini, ndi emekere se akpanamde man ufọk esinem nditọ fo?

N̄kpọ en̄wen emi ekemede ndinam man an̄wam nditọ fo ẹyọ mfịna mmọ edi ndiyom nti ufan nnọ mmọ. Ke uwụtn̄kpọ, emekeme ndidọhọ nditọete oro ẹnịmde nti uwụtn̄kpọ ke esop mbufo ẹsan̄a ye mbufo ke ini ẹyomde ndika n̄kadia uwem. Mîdịghe emekeme ndikot esenyịn oro asan̄ade-san̄a m̀mê mme anam utom uyọhọ ini eken ufọk. Ndi ọmọfiọk isụn̄utom m̀mê eyenete ndomokiet emi anamde utom ke Bethel emi akpanamde nditọ fo ẹnam ufan, idem ekpedi ndisiwet mmọ leta, m̀mê ndisikot mmọ ke urụk-ukopikọ? Emi ekeme ndin̄wam nditọ fo ẹnam se inende ẹnyụn̄ ẹbiere se mmọ ẹdidide ke esop Abasi. Ti ufọn oro Timothy ọkọbọde ke ndidi ufan apostle Paul. (2 Tim. 1:13; 3:10) Emi ama an̄wam Timothy enen̄ede ekere aban̄a se ikpanamde ke esop Abasi.—1 Cor. 4:17.

Toro Nditọ Fo

Esinem Jehovah ndikụt mme uyen ẹnamde nti n̄kpọ kpa ye mme nsịn̄ede oro mmọ ẹsobode ke ererimbot Satan emi. (Ps. 147:11; N̄ke 27:11) Anaedi esịt esinem fi n̄ko ndikụt mmọ ẹnamde nti n̄kpọ. (N̄ke 10:1) Nam mmọ ẹfiọk ke emenen̄ede ama mmọ, sinyụn̄ toro mmọ. Jehovah ama enịm ata eti uwụtn̄kpọ ọnọ mme ete ye eka. Ke ini Jesus akanade baptism, Jehovah ọkọdọhọ enye ete: “Afo edi edima Eyen mi; mmenyịme fi.” (Mark 1:11) Ikọ emi ama enen̄ede ọsọn̄ọ Jesus idem ndiyọ kpukpru afanikọn̄ oro enye okosobode. Mmọdo, sinam ntre ye nditọ fo. Nam mmọ ẹfiọk ke amama mmọ. Sinyụn̄ toro mmọ ke se ededi oro mmọ ẹnamde ọfọn.

Imọfiọk ke ekpedi ẹtịme nte ẹtetịme, mme owo ẹdisụk iyoyom nditọ fo ikọ, ẹfịna mmọ uwem, ẹnyụn̄ ẹsak mmọ nsahi. Edi emekeme ndisụk n̄n̄wam mmọ. Didie ke ekeme ndinam emi? N̄wam mmọ ẹdi ufan Jehovah. Nam mmọ ẹkeme ndineme nneme ye afo. Neme se mmọ ẹsisobode ke ini ẹnịmde ukpepn̄kpọ ubon, nyụn̄ nam ufọk mbufo enem owo ndidu. Kpukpru emi ayan̄wam nditọ fo ẹyọ mfịna mmọ.

[Ikọ Idakisọn̄]

[Ekebe/Ndise ke page 18]

 NDINANAM SE IKEMEDE NDITỊBE N̄WỤT EKEME NDIN̄WAM

Yak ineme ndusụk n̄kpọ oro nditọ nnyịn ẹsisobode. Ọkpọfọn ẹnanam ndusụk mmọ ẹwụt ke ini ẹnịmde Utuakibuot Ubon.

▸ Andikpep mbre mbuba ọdọhọ eyen fo an̄wan etiene odụk n̄ka mbre mbuba ke ufọkn̄wed.

▸ Ẹnọ eyen fo eren sika ete ọn̄wọn̄ ke unyọn̄ọ n̄wed.

▸ Ndusụk n̄kparawa ẹkeme ndidọhọ ke iyetịm eyen fo eren edieke ifiakde ikụt enye ọkwọrọde ikọ.

▸ Eyen fo an̄wan ọkọn̄ usụn̄ ufọk owo ke an̄wautom, ndien, etise, eyen ufọkn̄wed mmọ ọwọrọ edi.

▸ Ẹsio eyen fo an̄wan ẹwụk ke iso nditọ ufọkn̄wed eken ẹte etịn̄ ntak emi enye mîkọmke ọfọn-etakubom.

▸ Akparawa kiet esisak eyen fo kpukpru ini sia enye edide kiet ke otu Mme Ntiense Jehovah.

[Ndise ke page 17]

Ndi nditọ fo ẹnyene ndutịm ukot Bible?

[Ndise ke page 19]

Ndi emesidọhọ nditọete oro ẹnịmde nti uwụtn̄kpọ ẹsan̄a ye mbufo ke ini ẹyomde ndika n̄kadia uwem?