Sese Enyịn̄ Oro Do ke Itịghede

ST. MORITZ. Ndi emesikop enyịn̄ oro? Ekeme ndidi emesikop, sia enye edi ebiet uka nduọkodudu ke Itịghede Engadine ke Switzerland emi ọwọrọde etop ke ererimbot. Edi St. Moritz edi ebiet kiet kpọt ke otu ebiet oro ẹdụride ntịn̄enyịn mme owo toto ke eset ẹwụt ediye itịghede oro esịnede ke otu Ikpọ Obot emi snow ofụkde ke edem usụk n̄kan̄ usiahautịn Switzerland emi ekperede adan̄a Italy. Do n̄ko ke Switzerland National Park odu, emi ata ndiye nsio nsio unam ye ikọn̄ ẹtorode Akwa Andibot nnyịn, Jehovah. (Ps. 148:7-10) Kpa ntre n̄ko ke nsụhọ ido eset emi ẹbịghide n̄kpọ nte isua 350 emi ẹkebede ẹtoro Jehovah.

Esen esen n̄kpọ oro odude ke ediwak ufọk ke itịghede emi ekeme ndidụri ntịn̄enyịn fo. Ẹsụk ẹkokụt nte ẹwetde enyịn̄ Abasi ke iso ufọk, utọ nte ke usụn̄otop. Ke ediwak isua ikie emi  ẹkebede, ekedi ido ndiwet n̄kpọ nda mbana ibibene ufọk, edide ndiwewet ke ibibene, ndikap ke mbat oro ẹyọn̄ọde ke ibibene, m̀mê ndikap ke itiat. Ndise ufọk ke Obio Bever odu emi. Ẹkabade se ẹwetde emi nte: “Ke isua 1715. Jehovah edi ntọn̄ọ, Jehovah onyụn̄ edi utịt. Ye Abasi, ẹkeme ndinam kpukpru n̄kpọ; edi ke ẹsiode Abasi ẹfep, owo ikemeke ndinam baba n̄kpọ kiet.” N̄kọ omokụt do ke ẹwet ọkpọkpọ enyịn̄ Abasi ikaba ke akani idiọn̄ọ oro.

Amakam ekeme ndikụt uwetn̄kpọ oro ebịghide akan oro ke Madulain. Idiọn̄ọ emi ọdọhọ ete: “Psalm 127. Ke mîbọhọke Jehovah ọbọp ufọk, mmọ eke ẹbọpde ẹkpa utom ikpîkpu ke esịt. Lucius Rumedius. Ke isua 1654.”

Ntak emi ẹwetde enyịn̄ Abasi ke eferife ntre ke itịghede emi? Ko ke edem, ke eyo unam ukpụhọde, ẹma ẹsio Bible ke Romansh, kpa usem otode Latin, emi ẹsemde ke Engadine. Ke nditịm ntịn̄, enye ekedi akpa n̄wed oro ẹkabarede ẹsịn ke usem oro. Sia mme owo do ẹkemade se mmọ ẹkekotde ke Ikọ Abasi, ediwak mmọ ẹma ẹwet enyịn̄ mmọ ye ikọ Bible emi esịnede ọkpọkpọ enyịn̄ Abasi ke ibibene an̄wa ufọk mmọ.

Ih, tutu esịm mfịn emi, mme uwetn̄kpọ emi ke ẹtọtọt enyịn̄ Jehovah ẹnyụn̄ ẹtoro enye ke ediwak isua ikie ẹma ẹkebe tọn̄ọ ẹkewet mmọ ke mme ufọk oro. Ẹsịn udọn̄ ẹnọ isenowo ye mme andidụn̄ itịghede emi ẹte ẹkpep mme n̄kpọ en̄wen ẹban̄a utịbe utịbe Abasi, Jehovah, ke ndika ufọk en̄wen emi enyenede enyịn̄ esie—oro edi, Ufọkmbono Obio Ubọn̄ Mme Ntiense Jehovah ke Bever.

[Ebiet ẹdade ndise ẹto ke page 7]

© Stähli Rolf A/age fotostock