Ma Edinen Ido ke Ofụri Esịt Fo

“Afo amama edinen ido.”—PS. 45:7.

1. Nso idin̄wam nnyịn isan̄a ke “usụn̄ edinen ido”?

JEHOVAH ke ada Ikọ ye edisana spirit esie owụt ikọt esie “usụn̄ edinen ido.” (Ps. 23:3) Edi sia nnyịn idide mme anana-mfọnmma owo, imesiwaha ikpọn̄ usụn̄ oro. Oyom inen̄ede isịn ukeme man ifiak inam se inende. Nso idin̄wam nnyịn inam oro? Ukem nte Jesus, ana ima ndinam se inende.—Kot Psalm 45:7.

2. Nso idi “usụn̄ edinen ido”?

² Nso idi “usụn̄ edinen ido”? Se Jehovah adade nte edinen ke ẹda ẹbiere “usụn̄” emi. Ke usem Hebrew ye Greek, “edinen ido” ọwọrọ owo ndisọn̄ọ nyịre ke mme edumbet ido uwem. Sia Jehovah edide “ebietidụn̄ edinen ido,” esinem mme asan̄autom esie ndiyom enye ebiere edumbet ido uwem oro enende, emi mmọ ẹkpenịmde.—Jer. 50:7.

3. Didie ke ikeme ndikpep mme n̄kpọ en̄wen mban̄a edinen ido Abasi?

³ Nnyịn idinen̄ede inem Abasi esịt n̄kukụre edieke idomode ke ofụri esịt ndida mme edumbet esie ndu uwem. (Deut. 32:4) Oro ọtọn̄ọ ye edikpep kpukpru se ikemede ndikpep mban̄a Jehovah Abasi ke Ikọ esie, kpa Bible. Adan̄a nte ikpepde iban̄a enye, isan̄ade ikpere enye ke usen ke usen, ntre ke idinyụn̄ ima edinen ido esie. (Jas. 4:8) Ana inyịme n̄ko ndausụn̄ Ikọ Abasi eke odudu spirit ke ini iyomde ndinam ikpọ ubiere.

Yom Edinen Ido Abasi

4. Nso isịne ke ndiyom edinen ido Abasi?

⁴ Kot Matthew 6:33. Ndiyom edinen ido Abasi idịghe ndibiat ini n̄kwọrọ eti mbụk Obio Ubọn̄ kpọt. Man Jehovah enyịme edisana utom nnyịn, ana edu uwem nnyịn ekem ye n̄kokon̄ edumbet esie kpukpru usen. Nso ke ana kpukpru mbon oro ẹyomde edinen ido Jehovah ẹnam? Ana mmọ “ẹmen obufa owo ẹsịne, emi ẹkebotde ekekem ye uduak Abasi ke ata edinen ido ye akpanikọ.”—Eph. 4:24.

5. Nso idin̄wam nnyịn ikan mmemidem?

⁵ Nte idomode ndida ndinen edumbet Abasi ndu uwem, idem ekeme ndimem nnyịn ndusụk ini ke ntak unana mfọnmma nnyịn. Nso ikeme ndin̄wam nnyịn ikan mmemidem emi ekemede ndinam owo akpa mba inyụn̄ ikpep ndima nnyụn̄ nnam se inende? (N̄ke 24:10) Ana isibọn̄ akam kpukpru ini inọ Jehovah “ye esịt akpanikọ ye ọyọhọ nsọn̄ọ oro asan̄ade ye mbuọtidem.” (Heb. 10:19-22) Edide idi mme Christian oro ẹyetde aran m̀mê inyene idotenyịn edidu uwem mi ke isọn̄, imọbuọt idem ke uwa ufak Jesus Christ ye ke se enye anamde nte akamba Akwa Oku nnyịn. (Rome 5:8; Heb. 4:14-16) Apostle John ekewet ete: “Iyịp Jesus . . . eyet nnyịn isana ke kpukpru idiọkn̄kpọ.” (1 John 1:6, 7) Bible ọdọhọ ke ọkpọkọm mme idiọkn̄kpọ nnyịn ẹtie “nte iduot, ẹyenam mmọ ẹfia nte snow.” Nso utịbe utịbe enọ ke Jehovah ada uwa ufak edima Eyen esie ọnọ nnyịn ntem!—Isa. 1:18.

Dụn̄ọde N̄kpọekọn̄ Eke Spirit Fo

6. Ntak emi ọfọnde nnyịn isidụn̄ọde n̄kpọekọn̄ eke spirit nnyịn?

⁶ Oyom isịne “edinen ido nte ukwak  ikpanesịt” kpukpru ini, sia enye edide akpan ubak n̄kpọekọn̄ eke spirit oro Abasi ọnọde. (Eph. 6:11, 14) Edide nnyịn iyak idem nnyịn inọ Jehovah ndondo emi m̀mê imananam edisana utom ke ata ediwak isua, ọfọn nnyịn idụn̄ọde n̄kpọekọn̄ eke spirit nnyịn kpukpru usen. Ntak-a? Koro ẹma ẹsion̄o Devil ye mme demon esie ẹduọn̄ọ mi ke isọn̄. (Edi. 12:7-12) Esịt ayat Satan sia enye ọdiọn̄ọde ke ini imọ edi ibio. Ntem enye ọdọdiọn̄ an̄wana ye ikọt Abasi. N̄kọ omokụt do ntak emi oyomde isịne “edinen ido nte ukwak ikpanesịt”?

7. Nnyịn ididu uwem didie edieke ifiọkde ufọn edisịne “edinen ido nte ukwak ikpanesịt”?

⁷ Ukwak ikpanesịt esikpeme owo ata esịt. Sia idide mme anana mfọnmma, ndamban̄a esịt nnyịn esiwak ndibian̄a nnyịn. (Jer. 17:9) Sia esịt nnyịn esiwakde ndinam nnyịn inam se mînenke, oyom itụnọ inyụn̄ inọ enye ukpep. (Gen. 8:21) Edieke ifiọkde ufọn edisịne “edinen ido nte ukwak ikpanesịt,” nnyịn idisioho enye inịm ke ekpri ini ke ndiyak mme n̄kpọ oro Abasi asuade ẹnem nnyịn esịt; nnyịn idinyụn̄ itiehe ikere nte ikpanamde idiọkn̄kpọ. Nnyịn idibiatke akpakịp ini itie ise ekebe ndise. Utu ke oro, iyaka iso idomo ndinam se inemde Jehovah esịt. Idem ke ini iyakde idem inọ ekikere obụkidem inyụn̄ ituakde ukot iduọ ke ekpri ini, Jehovah ayan̄wam nnyịn ifiak idaha ida.—Kot Mme N̄ke 24:16.

8. Ntak emi iyomde “akwa otuekọn̄” mbuọtidem?

⁸ “Akwa otuekọn̄” mbuọtidem edi ubak n̄kpọekọn̄ eke spirit nnyịn. Enye ke ikeme “ndida nnịme kpukpru enyịm ikan̄ andidiọk.” (Eph. 6:16) Ndien mbuọtidem ye ima oro imade Jehovah ke ofụri esịt ẹn̄wam nnyịn ika iso inam edinen ido inyụn̄ isọn̄ọ idu ke usụn̄ oro adade esịm nsinsi uwem. Adan̄a nte ikpepde ndima Jehovah, ntre n̄ko ke idima edinen ido esie. Edi nso kaban̄a ubieresịt nnyịn? Didie ke enye an̄wam nnyịn ima edinen ido?

Ka Iso Nyene Eti Ubieresịt

9. Nso ufọn ke idia ito edinyene eti ubieresịt?

⁹ Ke ini ikanade baptism, ima iben̄e Jehovah ọnọ nnyịn “eti ubieresịt.” (1 Pet. 3:21) Sia ibuọtde idem ke ufak, iyịp Jesus ofụk mme idiọkn̄kpọ nnyịn onyụn̄ anam inyene edisana idaha ke iso Abasi. Edi man ika iso inyene eti idaha ke iso Abasi, ana ika iso inyene eti ubieresịt. Edieke esịt esibiomde m̀mê ọnọde nnyịn ntọt aban̄a se mîfọnke, akpana iwụt esịtekọm sia emi ọwọrọ ke ubieresịt nnyịn ke ọfọn. Mme utọ ntọt oro ẹwụt ke ubieresịt nnyịn idoroke ufiọn iban̄a ndinen usụn̄ Jehovah. (1 Tim. 4:2) Edi odu usụn̄ en̄wen emi ubieresịt ekemede ndin̄wam mbon oro ẹyomde ndima edinen ido.

10, 11. (a) Bụk ifiọkutom emi owụtde ntak emi ikpanamde se ubieresịt nnyịn oro Bible ọnọde ukpep etemede. (b) Ntak emi ndima edinen ido ekemede ndinam esịt enen̄ede enem nnyịn?

¹⁰ Ke ini inamde se mînenke, ubieresịt nnyịn ekeme ndibiom m̀mê afịna nnyịn.  Uyen kiet ama oyo ọkpọn̄ usụn̄ edinen ido. Enye ama enyene mbumehe edise ndise idan̄ onyụn̄ ọtọn̄ọ ndisin̄wọn̄ ikọn̄ekpo. Esịt ama esibiom enye ke ini enye akade mbono esop, onyụn̄ etie enye nte enye edi mbubịk ke ini enye etienede ọwọrọ an̄wautom, ntre enye ama etre mme edinam Christian emi. Enye ọkọdọhọ ete: “Edi n̄kọdiọn̄ọke ke ubieresịt mi oyobiom mi aban̄a mme n̄kpọ emi.” Enye ama adian do ete: “Ndisịme ido mi ekebịghi n̄kpọ nte isua inan̄.” Ekem enye ama ọtọn̄ọ ndikere ndifiak nnyọn̄ ndi esop. Okposụkedi emi enye ekekerede ke Jehovah idikopke akam imọ, enye ama osụk ọbọn̄ akam eben̄e edifen nnọ. Ikọyọhọke minit duop ke oro ebede, eka esie ama edi edise enye onyụn̄ ọdọhọ enye afiak ọtọn̄ọ ndidụk mbono esop. Enye ama aka Ufọkmbono Obio Ubọn̄ ọkọdọhọ ebiowo ekpep n̄kpọ ye imọ. Nte ini akakade, enye ana baptism onyụn̄ ọkọm Jehovah ke ndinyan̄a uwem imọ.

¹¹ Ndi nnyịn ikwe ke ndinam se inende enen̄ede enem owo esịt? Nte nnyịn ikpepde ndima edinen ido inyụn̄ ikade iso inen̄ede inam enye, iyenen̄ede ikop idatesịt ndinam se inemde Ete nnyịn eke heaven esịt. Kere ban̄a emi! Usen ke edi emi esịt mîdibiomke ofụri ubonowo; mmọ ẹyenen̄ede ẹbiet Abasi ini oro. Ke ntre, ẹyak itetịm ima edinen ido ke ọwọn̄esịt nnyịn inyụn̄ idat Jehovah esịt.—N̄ke 23:15, 16.

12, 13. Didie ke ikeme ndinọ ubieresịt nnyịn ukpep?

¹² Nso ke ikeme ndinam man inọ ubieresịt nnyịn ukpep? Ke ini ikpepde N̄wed Abasi ye mme n̄wed oro ẹkọn̄ọde ke Bible, ọfọn iti ite ke “esịt edinen owo etie ekere man ọbọrọ.” (N̄ke 15:28) Kere ban̄a ufọn ndinam emi ke ini iyomde ndimek utom idịbi udia. Edieke utom atuahade ye se N̄wed Abasi ọdọhọde, ata ediwak nnyịn imesinam se ofụn oro anamde akpanikọ onyụn̄ enyenede ọniọn̄ etemede. Edi edieke n̄kpọ oro ẹtịn̄de ẹban̄a utom mînaha in̄wan̄-in̄wan̄, ẹkpenyene ndiyom mme edumbet Bible oro ẹnyenede ebuana ẹnyụn̄ ẹbọn̄ akam ẹnen̄ede ẹkere ẹban̄a mmọ. * Emi esịne mme utọ edumbet nte owo nditre ndinam se idifịnade ubieresịt mbon en̄wen. (1 Cor. 10:31-33) Akpana inen̄ede ikere iban̄a mme edumbet oro ẹnyenede ebuana ye itie ufan nnyịn ye Abasi. Edieke inen̄erede inịm ke Jehovah edi ata owo, iyebem iso ibụp idem nnyịn ite, ‘Ndi ndinam utom emi ayayat onyụn̄ abiak Jehovah?’—Ps. 78:40, 41.

¹³ Ke ini iben̄ede idem inọ Ukpepn̄kpọ Enyọn̄-Ukpeme m̀mê Ukpepn̄kpọ Bible Esop, ikpenyene nditi ke oyom itie ikere se ikpepde. Ndi imesisọp idụri udịm ke ibọrọ mbụme inyụn̄ ibe ika ikpehe ekikere efen? Utọ ukpepn̄kpọ oro idinamke inen̄ede ima edinen ido m̀mê ndinam nnyịn inyene ata  eti ubieresịt. Edieke anade idi idima edinen ido, inyene ndisịn ifịk n̄kpep nnyụn̄ ntie n̄kere se ikotde ke Ikọ Abasi oro ẹwetde-wet. Ana inen̄ede isịn ifịk ikpep n̄kpọ edieke anade ima edinen ido ke ofụri esịt!

Ndikop Biọn̄ ye Nsatitọn̄ Edinen Ido

14. Jehovah Abasi ye Jesus Christ ẹyom nnyịn inam edisana utom nnyịn didie?

¹⁴ Jehovah Abasi ye Jesus Christ ẹyom nnyịn ikop inemesịt ke adan̄aemi inamde edisana utom nnyịn. Nso idin̄wam nnyịn ikop inemesịt? Ndima edinen ido edin̄wam! Jesus ama etịn̄ ke Ukwọrọikọ Oro ke Obot ete: “Mmọ oro ẹkopde biọn̄ ye nsatitọn̄ edinen ido ẹkop inemesịt, koro mmọ ẹyeyụhọ.” (Matt. 5:6) Nso ke ikọ emi ọwọrọ ọnọ mbon oro ẹyomde ndima edinen ido?

15, 16. Ke mme usụn̄ ewe ke ẹkeme ndiyụhọ biọn̄ ye nsatitọn̄ edinen ido?

¹⁵ Andidiọk akara ererimbot emi idude mi. (1 John 5:19) Edieke imende n̄wedmbụk n̄kpọntịbe ke idụt ekededi ikot, iyokụt ibak ye afai emi ẹnamde ke udomo oro mînyeneke mbiet. Esịt esitịmede edinen owo aban̄a nte mme owo ẹbakde ibak ye ekemmọ owo. (Eccl. 8:9) Sia imade Jehovah, imọfiọk ke enye ikpọn̄ ekeme ndiyụhọ biọn̄ ye nsatitọn̄ eke spirit mbon oro ẹyomde ndikpep edinen ido. Ibịghike ẹyesobo mme idiọkowo ẹfep, ndien mme ama edinen ido idikopke aba ọkpọsọn̄ mfụhọ emi mme abiatibet ye ndiọi edinam mmọ ẹdade ẹdi. (2 Pet. 2:7, 8) Nso ifụre ke emi edidi ntem!

¹⁶ Sia idide mme asan̄autom Jehovah ye mme anditiene Jesus Christ, imọfiọk ke mbon oro ẹkopde biọn̄ ye nsatitọn̄ edinen ido “ẹyeyụhọ.” Ndutịm oro Abasi anamde aban̄a mbufa enyọn̄ ye obufa isọn̄ emi ‘edinen ido edidụn̄de’ ke ẹdida ẹnam mmọ ẹkop ata uyụhọ. (2 Pet. 3:13) Ntem inaha iyak idem emem nnyịn m̀mê akpa nnyịn ndikụt nte ufịk ye afai ẹdade itie edinen ido ke ererimbot Satan emi. (Eccl. 5:8) Jehovah, kpa Ata Edikon̄, ọdiọn̄ọ se ikade iso, ọmọn̄ onyụn̄ anyan̄a mme ama edinen ido.

Bọ Ufọn to Ndima Edinen Ido

17. Nso idi ndusụk ufọn edima edinen ido?

¹⁷ Psalm 146:8 ọsọn̄ọ etịn̄ ufọn edisan̄a ke usụn̄ edinen ido. Andiwet psalm oro ọkọkwọ ete: “Jehovah ama ndinen owo.” Kere ban̄a oro! Andikara ofụri ekondo ama nnyịn sia nnyịn imade edinen ido! Ke ntak ima Jehovah, nnyịn imenịm ke enye ọyọnọ se inanade nnyịn nte nnyịn ibemde iso iyom mme n̄kpọ Obio Ubọn̄. (Kot Psalm 37:25; Mme N̄ke 10:3.) Ke akpatre, mme ama edinen ido ẹdida ofụri ekondo emi inyene. (N̄ke 13:22) Ata ediwak ikọt Abasi ẹdinyene nsinsi inemesịt ye anana-utịt uwem ke ediye Paradise isọn̄ nte utịp emi mmọ ẹkekade iso ẹnam se inende. Idem idahaemi, mbon oro ẹmade edinen ido Abasi ẹnyene ifụre emi anamde edidianakiet odu ke mme ubon ye ke mme esop mmọ.—Phil. 4:6, 7.

18. Nso nti n̄kpọ ke ikeme ndinam nte itiede ibet usen Jehovah?

¹⁸ Nte nnyịn itiede ibet akwa usen Jehovah, ana ika iso iyom edinen ido esie. (Zeph. 2:2, 3) Ke ntre, ẹyak iwụt ke imenen̄ede ima ndinen usụn̄ Jehovah Abasi. Oro  esịne nditịm nsịne “edinen ido nte ukwak ikpanesịt” man enye ekpeme ndamban̄a esịt nnyịn. Oyom ika iso inyene eti ubieresịt n̄ko—emi edinamde esịt enem nnyịn onyụn̄ adat Abasi nnyịn esịt n̄ko.—N̄ke 27:11.

19. Nso ke ikpebiere ndinam, ndien nso ke ẹdineme ke ibuotikọ oro etienede?

¹⁹ “Enyịn Jehovah [asan̄a] akanade ofụri isọn̄ man enye owụt odudu esie ke ufọn mbon oro ẹnamde n̄kpọ ẹnọ enye ke ofụri esịt.” (2 Chron. 16:9) Mme ikọ oro ẹsọn̄ọ nnyịn idem didie ntem nte nnyịn inamde se inende ke ini emi n̄kpọ ọsọn̄de, ke ini afai, ye ke ini emi ubiatibet ọyọhọde ntịme ntịme ererimbot emi! Edi akpanikọ, ndinen usụn̄ nnyịn ẹkeme ndinam idem akpa mbon emi ẹdian̄arede ẹkpọn̄ Abasi. Edi nnyịn imenen̄ede ibọ ufọn ke ndisọn̄ọ nnam edinen ido Jehovah. (Isa. 48:17; 1 Pet. 4:4) Mmọdo, ẹyak ika iso ikop idatesịt ndida ofụri esịt mbiere ndima nnyụn̄ nnam edinen ido. Edi, ndinam n̄kpọ ke ofụri esịt abuana n̄ko ndisua se idiọkde. Ibuotikọ oro etienede oyowụt nnyịn se ndinam emi ọwọrọde.

[Ikọ Idakisọn̄]

Didie ke Afo Ọkpọbọrọ?

• Ntak emi anade ifiọk ufọn ufak edieke anade ima edinen ido?

• Ntak emi anade isịne “edinen ido nte ukwak ikpanesịt”?

• Didie ke ikeme ndinọ ubieresịt nnyịn ukpep?

[Mme Mbụme Ukpepn̄kpọ]

[Ndise ke page 26]

Ubieresịt oro ẹnọde ukpep an̄wam nnyịn ibọrọ mme mbụme oro ẹban̄ade utom idịbi udia