Ẹdu ke Mben̄eidem!

“Ẹdu ke mben̄eidem, koro ke hour emi mbufo mîkereke, Eyen owo eyedi.”—MATT. 24:44.

1, 2. (a) Nso ye nso ke ẹketịn̄ ke ntịn̄nnịm ikọ Bible, emi ebietde en̄wan ekpe? (b) Didie ke en̄wan oro ẹdin̄wanade ke ini iso ebehe fi?

KE EDIWAK isua, ọwọrọetop osio-ndyọ kiet ama esibre mbre ye mme ekpe Bengal esie oro ẹnọde ukpep man mme owo ẹse. Enye ọkọdọhọ ete: “Unam ama ayak idemesie ọnọ fi, etie fi nte n̄kpọ eke ẹnọde fi akakan enọ ke ofụri ererimbot.” Edi ofụri mbuọtidem oro ama etre ke October 3, 2003. Owo ifiọkke ntak, edi ekpe esie kiet, ata afia ekpe emi odobide kilogram 172, ama an̄wana ye enye. Osio ndyọ oro ikodorike enyịn ke en̄wan oro, enye ikonyụn̄ iben̄eke idem.

² Odot itịm ifiọk ke Bible etịn̄ aban̄a en̄wan “idiọk unam,” ndien ana nnyịn iben̄e idem. (Kot Ediyarade 17:15-18.) Idiọk unam emi an̄wana ye mmanie? N̄kpọ ẹyekpụhọde ke usụn̄ oro akpade owo idem, ndien ererimbot Devil ayabahade an̄wana ye idemesie. Ididuot idiọk unam oro ada aban̄a Edidiana Mme Idụt, ndien “nnụk duop” ada aban̄a ofụri ukara owo. Mmọ ẹyen̄wana ye akpara oro, emi edide Akwa Babylon, kpa ukara ererimbot eke nsunsu ido ukpono, ẹnyụn̄ ẹsobo enye ibak ibak. Ini ewe ke emi editịbe? Nnyịn ifiọkke usen ye hour. (Matt. 24:36) Edi imọfiọk ke edidi ke hour emi nnyịn mîdorike enyịn, imonyụn̄ ifiọk ke ini emi osụhọde enen̄ede omụhọ. (Matt. 24:44; 1 Cor. 7:29) Mmọdo, enen̄ede odot idu ke mben̄eidem ke n̄kan̄ eke spirit man otodo ke ini en̄wan oro asiahade, Christ onyụn̄ edide nte Andisobo, enye okponyụn̄ edi Andinyan̄a nnyịn! (Luke 21:28) Man idu ke mben̄eidem ntem, imekeme ndikpep n̄kpọ nto mme anam-akpanikọ asan̄autom Abasi emi ẹkedude ke mben̄eidem ẹnyụn̄ ẹdade enyịn mmọ ẹkụt nte mme un̄wọn̄ọ Abasi ẹsude. Ndi iyekpep n̄kpọ ito mme n̄kpọ oro ẹketịbede mi?

Ẹdu ke Mben̄eidem—Nte Noah

3. Nso ye nso ikanam ọsọn̄ Noah ndisọn̄ọ nda nnam n̄kpọ Abasi?

³ Okposụkedi emi ererimbot oro Noah okodude uwem ọkọdiọkde etieti, enye ama odu ke mben̄eidem ndikụt nte un̄wọn̄ọ Abasi osude. Kere ban̄a afanikọn̄ oro Noah ọkọyọde ke ini mme ọsọn̄ibuot angel ẹkemende idem eke obụk ẹsịne ẹdida ndiye iban nte ndantie! Ebuana emi mîdịghe ndammana mi ama anam ẹman nditọ oro ẹkande odudu owo, “n̄kpọsọn̄ irenowo” emi ẹkesidade ọkpọsọn̄ odudu mmọ ẹfiomo mbon en̄wen. (Gen. 6:4) Kere ban̄a afai oro ẹkenamde nte ata ikpọ owo emi ẹkebakde ibak ke ebiet ekededi oro mmọ ẹkekade. Mmọdo, idiọkn̄kpọ ama odu ke kpukpru ebiet, ekikere ye edu uwem owo ẹnyụn̄ ẹnen̄ede ẹbiara. Do, Jehovah Ọbọn̄ Andikara ama enịm ini emi ẹdisobode ererimbot unana uten̄e Abasi oro.—Kot Genesis 6:3, 5, 11, 12. *

4, 5. Ke mme usụn̄ ewe ke mme idaha ke eyo nnyịn ẹbiet eke eyo Noah?

⁴ Jesus ama etịn̄ ntịn̄nnịm ikọ ete ke mme idaha ke eyo nnyịn ẹdibiet eke eyo Noah. (Matt. 24:37) Ke uwụtn̄kpọ, nnyịn imokụt n̄ko nte ndiọi spirit ẹfịnade owo. (Edi. 12:7-9, 12) Mme demon emi ẹkemen idem eke obụk ẹsịne ke eyo Noah. Okposụkedi emi Abasi mîyakke mmọ ẹfiak ẹmen idem eke obụk ẹsịne, mmọ ẹdomo ndikara kpukpru  owo, ikpọ ye n̄kpri. Mme owo ifiọkke, edi mme ama oburobụt idan̄ emi ẹsikop inemesịt ẹban̄a idiọkn̄kpọ ye oburobụt edinam mbon oro mmọ ẹkemede ndisabade mi ke isọn̄.—Eph. 6:11, 12.

⁵ Ikọ Abasi okot Devil “owotowo” onyụn̄ ọdọhọ ke enye ‘ekeme ndida n̄kpa ndi.’ (John 8:44; Heb. 2:14) Enye inyeneke odudu ndiwot owo ke idemesie. Edi abak-ibak owo eke spirit emi esịn udọn̄ ọnọ abian̄a ye etabi. Enye anam mme owo ẹnyene udọn̄ ndiwot owo. Ke uwụtn̄kpọ, owo ediwot eyen kiet ke otu kpukpru nditọ 142 oro ẹmanade ke United States. Ye utọ ndisịme afai emi ọyọhọde kpukpru ebiet mi, ndi afo ekere ke Jehovah ikwe se ikade iso nte enye okokụtde eke eyo Noah? Ndi enye eyetre ndinam n̄kpọ mban̄a emi?

6, 7. Didie ke Noah ye ubon esie ẹkewụt ke mmimọ imenyene mbuọtidem ye mbak Abasi?

⁶ Ekem, Abasi ama asian Noah ke imọ imeben̄e idem ndida Ukwọ mmọn̄ mfụk ofụri isọn̄, nnyụn̄ nsobo kpukpru obụkidem. (Gen. 6:13, 17) Jehovah ama ọdọhọ Naoh ete ọkọn̄ ubom emi ebietde ata akamba ekebe. Noah ye ubon esie ẹma ẹtọn̄ọ utom oro. Nso ikanam mmọ ẹkop uyo ẹnyụn̄ ẹdu ke mben̄eidem ke ini Abasi ekebierede ikpe?

⁷ Ọkpọsọn̄ mbuọtidem ye mbak Abasi ẹkenam Noah ye ubon esie ẹnam ewụhọ Abasi. (Gen. 6:22; Heb. 11:7) Noah, nte ibuot ufọk, ama odu ke edidemede ke n̄kan̄ eke spirit onyụn̄ efep mbiara ido uwem ererimbot eset oro. (Gen. 6:9) Enye ama ọfiọk ke akana ikpeme ubon imọ mbak mmọ ẹdikpebe edu afai ye nsọn̄ibuot mbon oro ẹkekande mmọ ẹkụk. Ama enen̄ede oyom mmọ ẹtre ndisịn ibuot nsịn itọn̄ ke mme edinam eke usen ke usen. Abasi ama ọnọ mmọ utom ẹnam, ndien ama enen̄ede oyom ofụri ubon ẹda utom oro nte ebeiso n̄kpọ.—Kot Genesis 6:14, 18.

Noah ye Ubon Esie Ẹma Ẹdu ke Mben̄eidem

8. Nso iwụt ke mbonubon Noah ẹma ẹnyene uten̄e Abasi?

⁸ Mbụk Bible enen̄ede aban̄a Noah emi ekedide ibuot ufọk, edi n̄wan ye nditọ Noah ye iban mmọ ẹketuak ibuot n̄ko ẹnọ Jehovah. Prọfet Ezekiel ama ọsọn̄ọ emi. Enye ọkọdọhọ ke ọkpọkọm Naoh okodu uwem ke eyo imọ, ke owo ikpanyan̄ake nditọ esie ke ntak edinen ido ete mmọ. Mmọ ẹma ẹkponi ẹkem ndikop uyo m̀mê ndisọn̄ ibuot. Ke ntre, mmọ ẹma ẹwụt ke idemmọ ke mmimọ imama Abasi ye mme usụn̄ esie. (Ezekiel 14:19, 20) Ubon Noah ẹma ẹbọ item esie, ẹnyene orụk mbuọtidem esie, inyụn̄ iyakke mbon en̄wen ẹkpan mmọ ndinam utom oro Abasi ọkọnọde.

9. Mmanie mfịn ẹnyene orụk mbuọtidem Noah?

⁹ Enem didie ntem ndikụt mme ibuot ufọk mfịn ke otu nditọete nnyịn ke ofụri ererimbot emi ẹsịnde ofụri ukeme ẹkpebe Noah! Mmọ ẹfiọk ke ikemke ndinọ ubon mmimọ udia, edisịnen̄kpọ, itie udakibuot, ye ukpep kpọt. Ana mmọ ẹnọ mme ubon mmọ n̄ko mme n̄kpọ eke spirit. Ke ndinam ntre, mmọ ẹdu ke mben̄eidem kaban̄a se Jehovah edisọpde inam.

10, 11. (a) Anaedi eketie Noah ye ubon esie didie ke idem ke ini mmọ ẹkesịnede ke esịt ubom oro? (b) Nso mbụme ke oyom ibụp idem nnyịn?

 ¹⁰ Etie nte Noah, n̄wan esie, nditọ esie, ye iban mmọ ẹma ẹnam utom ukọn̄ ubom oro ke n̄kpọ nte isua 50. Nte mmọ ẹkekọn̄de ubom oro, mmọ ẹma ẹdụk ẹnyụn̄ ẹwọrọ ke esịt ubom oro ke ata ediwak ini. Mmọ ẹma ẹda itai ẹyet enye mbak mmọn̄ edidụk, ẹdọn̄ udia, ẹnyụn̄ ẹda unam ẹdidọn̄. Da enyịn ikike kụt n̄kpọ emi! Ke akpatre, usen oro ẹketiede-tie ẹbet edisịm. Edi ọyọhọ usen 17 ke ọyọhọ ọfiọn̄ iba ke isua 2370 M.E.N., mmọ ẹnyụn̄ ẹdụk ubom oro. Jehovah eberi usụn̄, edịm onyụn̄ ọtọn̄ọ ndidep. Akwa edịm emi ikedepke ke obio kiet kpọt. Mmọn̄ enyọn̄, m̀mê inyan̄ibom heaven, ama esịrede, ata ọkpọsọn̄ edịm onyụn̄ edep ọduọhọ ubom oro. (Gen. 7:11, 16) Mmọ emi mîsịneke ke ubom oro ke ẹkpan̄a, edi ẹnyan̄a mbon oro ẹsịnede ke ubom. Anaedi eketie ubon Noah didie ke idem? Mmọ ẹma ẹnen̄ede ẹkọm Abasi. Edi eyịghe idụhe ke mmọ ẹma ẹkere ẹte, ‘Esịt enen̄ede adat nnyịn ke ndisan̄a ye ata Abasi nnyụn̄ ndu ke mben̄eidem!’ (Gen. 6:9) Ndi emekeme ndida enyịn ikike n̄kụt nte ọbọhọde Armageddon, onyụn̄ etienede enen̄ede owụt esịtekọm aban̄a oro?

¹¹ Idụhe n̄kpọ ndomokiet oro ekemede ndikpan Ata Ọkpọsọn̄ ndisu un̄wọn̄ọ esie ndisobo idiọk editịm n̄kpọ Satan emi. Bụp idemfo ete, ‘Ndi mmenen̄ede nnịm ke baba un̄wọn̄ọ Abasi ndomokiet idikpụhu, idem ata n̄kpri ikpehe esie, ye nte ke kpukpru mmọ ẹyesu ke edikem ini mmọ?’ Edieke edide ntre, du ke mben̄eidem ebe ke nditie mbet nnyụn̄ nsọn̄ọ nnyene “usen Jehovah” oro enen̄erede ekpere ke ekikere.—2 Pet. 3:12.

Moses Ama Aka Iso Odu ke Mben̄eidem

12. Nso ikpakanam enyịn eke spirit Moses ekịm?

¹² Ẹyak ikere iban̄a uwụtn̄kpọ en̄wen. Edieke isede ke enyịn obụkidem, Moses okodu ke ata eti idaha ke Egypt. Sia enye ekedide eyen emi adiaha Pharaoh ekemende akama, eyịghe idụhe ke ẹma ẹnen̄ede ẹma enye, enye onyụn̄ adia ata nti udia, esịne ata nti edisịnen̄kpọ, onyụn̄ odụn̄ ke ata ndiye n̄kann̄kụk. Enye ama enen̄ede ọbọ ukpep. (Kot Utom 7:20-22.) Anaedi enye ọkpọkọbọ ata akamba n̄kpọ-akpa.

13. Didie ke Moses okowụk enyịn ke mme un̄wọn̄ọ Abasi?

¹³ Ana in̄wan̄-in̄wan̄ ke ukpep oro ete ye eka Moses ẹkenọde enye toto ke uyen ama anam enye ọfiọk ke edi nditen̄ ndituak ibuot nnọ ndem oro mbon Egypt ẹkesituakde ẹnọ. (Ex. 32:8) Ndutịm unọ ukpep ke Egypt ye ekese inyene ufọk ubọn̄ ikanamke Moses ọkpọn̄ utuakibuot akpanikọ. Anaedi enye ama enen̄ede etie ekere aban̄a mme un̄wọn̄ọ oro Abasi ọkọn̄wọn̄ọde ọnọ mme ete ete esie onyụn̄  enen̄ede odu ke mben̄eidem ndinam uduak Abasi. Mmọn̄ọ, n̄kọ Moses ọkọdọhọ nditọ Israel ete: “Jehovah . . . Abasi Abraham ye Abasi Isaac ye Abasi Jacob, ọdọn̄ mi utom ọnọ mbufo.”—Kot Exodus 3:15-17.

14. Didie ke ẹkedomo mbuọtidem ye uko Moses?

¹⁴ Jehovah, kpa ata Abasi, ikebietke ndisọi mbiet oro ẹkedade ẹban̄a mme abasi Egypt oro mînyeneke uwem, edi ekedi ata owo ọnọ Moses. Enye okodu uwem esie nte n̄kpọ eke okokụtde “Enye emi enyịn owo mîkwe.” Moses ama enyene mbuọtidem ke ẹyenyan̄a ikọt Abasi, edi enye ikọfiọkke ini emi ẹdinyan̄ade. (Heb. 11:24, 25, 27) Ẹkụt ọkpọsọn̄ udọn̄ oro enye ekenyenede aban̄a mme Hebrew ndiwọrọ ufụn ke ini enye akan̄wanade ọnọ eyen Israel emi ekedide ofụn, emi ẹkefiomode. (Ex. 2:11, 12) Nte ededi, ikedịghe kan̄a ini Jehovah, ntre Moses ekenyene ndifehe n̄kodụn̄ nte nyon̄ ke anyan idụt. Eyịghe idụhe ke ama ọsọn̄ enye ndikpọn̄ edinem uwem ke ndiye n̄kann̄kụk ufọk ubọn̄ Egypt n̄kodụn̄ ke wilderness. Kpa ye oro, Moses ama odu ke mben̄eidem ebe ke nditi kpukpru item oro Jehovah ọkọnọde enye. Ntem, Abasi ama ada enye ọnọ nditọete esie edinyan̄a ke enye ama akabiat isua 40 ke Midian. Moses ama okop uyo afiak aka Egypt ke ini Abasi eketemede enye. Ini ama edi edikem Moses ndinam utom oro Abasi ọnọde nnyụn̄ nnam utom Abasi ke usụn̄ Abasi. (Ex. 3:2, 7, 8, 10) Ke ini Moses, kpa ‘owo oro ekedide ata sụn̄sụn̄ akan kpukpru owo,’ akafiakde edi Egypt, ama oyom enye enyene mbuọtidem ye uko man ekeme ndida Pharaoh ke iso. (Num. 12:3) Enye ama ada Pharaoh ke iso ediwak ini adan̄a nte mme ufen ẹkekade iso, ifiọkke m̀mê ikafan̄ ke idida Pharaoh ke iso.

15. Kpa ye mme edikpu, nso ikanam Moses aka iso oyom mme ifet ndikpono Ete esie eke heaven?

¹⁵ Moses ama osobo edikpu ke se ibede isua 40 oro ẹketienede, ọtọn̄ọde ke 1513 M.E.N. esịm 1473 M.E.N. Kpa ye oro, enye ama oyom mme ifet ndikpono Jehovah onyụn̄ ada ofụri esịt esịn udọn̄ ọnọ nditọete esie ẹtiene ẹnam ntre. (Deut. 31:1-8) Ntak-a? Koro enye ama ama enyịn̄ ye ukara Jehovah akan enyịn̄ esiemmọ. (Ex. 32:10-13; Num. 14:11-16) Kpa ye mme edikpu, ana nnyịn n̄ko ika iso inọ ukara Abasi ibetedem, itịm inịm ke usụn̄ unam n̄kpọ esie ọfọn akan, enen akan, onyụn̄ ọfọn akan en̄wen ekededi. (Isa. 55:8-11; Jer. 10:23) Ndi nte afo ekerede edi oro?

Ẹdu ke Edidemede!

16, 17. Ntak emi Mark 13:35-37 enen̄erede enyene se ọwọrọde ọnọ fi?

¹⁶ “Ẹka iso ẹse, ẹdu ke edidemede, koro mbufo mîfiọkke edikem ini.” (Mark 13:33) Jesus ọkọnọ ntọt oro ke ini emi enye ekenemede idiọn̄ọ emi ediwụtde ke utịt idiọk editịm n̄kpọ emi ekpere. Kop utịtikọ akwa ntịn̄nnịm ikọ Jesus emi Mark ewetde: “Ẹdu ke ukpeme, koro mbufo mîfiọkke ini emi eteufọk edidide, m̀mê ke mbubreyo m̀mê ke ufọt okoneyo m̀mê ke ini ekikọ ọkpọkde m̀mê ke tụhi-tụhi usenubọk; man ke ini enye edide edisịm ke mbuari, enye edikụt mbufo nte ẹdede idap. Edi se ndọhọde mbufo ke ndọhọ kpukpru owo nte, Ẹdu ke ukpeme.”—Mark 13:35-37.

¹⁷ Item Jesus oro anam owo ekere n̄kpọ. Enye eketịn̄ aban̄a ikpehe ukpeme inan̄ ke okoneyo. Akpatre ikpehe ukpeme esisọn̄ akan ndidu ke ukpeme, koro enye ọtọn̄ọ ke  n̄kanika ita usenubọk esịm ini emi utịn asiahade. Mbon oro ẹnyenede mbufiọk un̄wana ekọn̄ ẹsida ini emi nte ata eti ini ndin̄wana ye mme asua, sia ẹdisịm mmọ ini oro nte “ẹdede idap.” Kpasụk ntre idahaemi, emi ererimbot ẹdede ọkpọsọn̄ idap ke n̄kan̄ eke spirit mi, ekeme ndinen̄ede nsọn̄ nnyịn ndidu ke edidemede. Ndi nnyịn imenyene eyịghe ekededi ke oyom ‘ika iso idu ke edidemede’ inyụn̄ ‘ika iso ise’ utịt ye edinyan̄a nnyịn oro ẹkebemde iso ẹtịn̄, asan̄ade ekpere?

18. Nso anana-mbiet ifet ke inyene sia idide Mme Ntiense Jehovah?

¹⁸ Ekpe Bengal ikowotke owo oro esidade unam ebre mbre, oro iketịn̄de iban̄a ke ntọn̄ọ. Edi ntịn̄nnịm ikọ Bible owụt in̄wan̄-in̄wan̄ ke nsunsu ido ukpono ye ikpehe eken ke idiọk editịm n̄kpọ emi idibọhọke utịt oro asan̄ade ekpere. (Edi. 18:4-8) Akpakam kpukpru mme asan̄autom Abasi, n̄kpri ye ikpọ, ẹkụt nte enen̄erede oyom kpukpru mmọ ẹnam se ẹkemede man idu ke mben̄eidem ibet usen Jehovah nte Noah ye ubon esie! Nnyịn idu uwem ke ererimbot unana uten̄e Abasi emi mme andikpep nsunsu ido ukpono, ọkọrọ ye mbon oro ẹdọhọde ke owo idiọn̄ọke m̀mê Abasi odu m̀mê idụhe ye mbon oro mînịmke ke Abasi odu, ẹdade ikọ mmọ ẹsak Andibot. Edi nnyịn ikpedehedei iyak edu mmọ ebe nnyịn. Ẹyak iti mme uwụtn̄kpọ oro inemede iban̄a inyụn̄ ika iso idu ke ukpeme iban̄a mme ifet ndida nnọ Jehovah ubọn̄ nte “Abasi mme abasi,” ih, kpa “akwa ye ọkpọsọn̄ Abasi emi enyenede uten̄e.”—Deut. 10:17.

[Ikọ Idakisọn̄]

Nte Afo Emeti?

• Ntak emi okoyomde Noah ada se inanade ubon esie ke n̄kan̄ eke spirit nte ebeiso n̄kpọ?

• Didie ke eyo nnyịn enen̄ede ebiet eyo Noah?

• Kpa ye edikpu, ntak emi Moses okowụkde enyịn ke mme un̄wọn̄ọ Jehovah?

• Mme ntịn̄nnịm ikọ ewe ke Bible ẹnam fi aka iso odu ke edidemede ke n̄kan̄ eke spirit?

[Mme Mbụme Ukpepn̄kpọ]

[Ndise ke page 25]

Noah ye ubon esie ẹketịn̄ enyịn ke utom Jehovah

[Ndise ke page 26]

Mme un̄wọn̄ọ Abasi oro mîkemeke ndikpu ẹma ẹn̄wam Moses aka iso odu ke ukpeme