Ẹyak Idara Ọtọkiet!

ỌDỌDIỌN̄ ọsọn̄ ndikop inemesịt ye idatesịt. Ọsọsọn̄ ediwak owo ndikere mban̄a nti n̄kpọ oro ẹkpetịn̄de ye mbon en̄wen. Uwem eyomfịn, akpan akpan ke ikpọ obio, esinam mme owo ẹtie ke idemmọ ẹnyụn̄ ẹdu ikpọn̄.

Alberto Oliverio, prọfesọ udọn̄ọ ibuot ọdọhọ ke “ndobo edi ọsọ n̄kpọ,” ye nte ke “eyịghe idụhe nte ke uwem ke ikpọ obio anam mme owo ẹdu ikpọn̄. Ke ediwak idaha, enye isiyakke nnyịn ikere iban̄a nsan̄autom, mbọhọidụn̄, m̀mê anyam-n̄kpọ ke ufọkurua mbọhọ nnyịn.” Utọ ikpọn̄-ikpọn̄ uwem oro esinam owo okop mfụhọ.

Edi idaha ye edu ekemmọ mme Christian ẹdi isio. Apostle Paul ekewet ete: “Ẹdat esịt kpukpru ini.” (1 Thess. 5:16) Imenyene ekese ntak ndidara nnyụn̄ ndat esịt ọtọkiet. Nnyịn ituak ibuot inọ Ata Edikon̄ Abasi, kpa Jehovah; nnyịn imọfiọk etop akpanikọ Bible; nnyịn imenyene idotenyịn edinyan̄a ye nsinsi uwem; ndien imekeme ndin̄wam mbon  en̄wen n̄ko ẹtiene ẹnyene mme edidiọn̄ emi.​—Ps. 106:4, 5; Jer. 15:16; Rome 12:12.

Owo ndidara nnyụn̄ mbuana idatesịt esie ye mbon en̄wen ẹdi mme edu ata mme Christian. Imosụk ise Paul ekewetde mbon Philippi ete: “Mmokop idatesịt nnyụn̄ ndara ye kpukpru mbufo. Kpasụk ntre, mbufo n̄ko ẹkop idatesịt ẹnyụn̄ ẹtiene mi ẹdara.” (Phil. 2:17, 18) Ke ikọ ifan̄ oro Paul etịn̄de do, enye etịn̄ utịm ikaba aban̄a ndikop idatesịt nnyụn̄ ndara ye kiet eken.

Edi ana mme Christian ẹkpeme mbak ẹdidian̄ade ẹtie ikpọn̄. Owo ndomokiet emi adian̄arede etie ikpọn̄ ikemeke ndidara ye ekemmọ mme andinịm ke akpanikọ. Ntre, didie ke ikeme ndinam item Paul oro ọdọhọde ‘ika iso idara ke Ọbọn̄’ ye nditọete nnyịn?​—Phil. 3:1.

Dara ye Ekemmọ Mme Andinịm ke Akpanikọ

Ke ini Paul ekewetde leta ọnọ ẹsọk mbon Philippi, etie nte enye ekedi owo n̄kpọkọbi ke Rome ke ntak utom ukwọrọikọ esie. (Phil. 1:7; 4:22) Kpa ye oro, n̄kpọkọbi ikanamke ifiopesịt oro enye ekenyenede ọnọ utom ukwọrọikọ ebịt. Utu ke oro, enye ama adara ndinam n̄kpọ Jehovah ke ofụri ukeme esie nnyụn̄ nnyịme ‘ẹn̄wan̄a imọ ẹduọk nte edin̄wọn̄ uwa.’ (Phil. 2:17) Edu Paul owụt ke idatesịt itoho mme idaha oro owo odude. Kpa ye oro enye okodude ke n̄kpọkọbi, enye ama ọdọhọ ete: “Ami nyaka iso ndara.”​—Phil. 1:18.

Paul akasiak esop ke Philippi ndien enye ama enen̄ede ama nditọete esie do. Enye ama ọfiọk ke ndibuana idatesịt oro imọ ikokopde ke ndinam n̄kpọ Jehovah eyesịn udọn̄ ọnọ mmọ. Ntem, enye ama ewet ete: “Edi nyom mbufo ẹfiọk, nditọete, ẹte ke se ikọwọrọde mi ama akabade anam eti mbụk asuana utu ke ndibọbiọn̄ọ enye, tutu anam kpukpru owo ẹdiọn̄ọ ẹban̄a n̄kpọkọbi mi ke Christ ke otu kpukpru Mbon Ukpeme Edidem ye kpukpru mbon eken.” (Phil. 1:12, 13) Paul ndibuana edinem ifiọkutom emi ekedi usụn̄ kiet emi enye akadatde esịt onyụn̄ adarade ye nditọete esie. Anaedi mbon Philippi n̄ko ẹma ẹdara ye Paul. Edi man mmọ ẹnam ntre, ikanaha mmọ ẹyak idem emem mmọ ke ntak n̄kpọkọbi Paul. Utu ke oro, mmọ ẹkenyene ndikpebe uwụtn̄kpọ esie. (Phil. 1:14; 3:17) Akan oro, mbon Philippi ẹkenyene ndika iso nsịn Paul ke akam mmọ nnyụn̄ nnọ enye un̄wam ye ibetedem ekededi oro mmọ ẹkekemede ndinọ.​—Phil. 1:19; 4:14-16.

 Ndi nnyịn imesikop idatesịt ukem nte Paul? Ndi nnyịn imesidomo ndikụt nti n̄kpọ ke uwem nnyịn ye ke utom ukwọrọikọ Christian nnyịn? Ke ini isobode ye nditọete nnyịn, ọfọn idara iban̄a utom ukwọrọikọ nnyịn. Idịghe inyenyene mme aduai-owo-idem ifiọkutom mbemiso inam emi. Ekeme ndidi ima ida eti ntọn̄ọikọ m̀mê n̄kọkibuot inam owo enyene udọn̄ ke etop Obio Ubọn̄. Eyedi ima inyene inem inem nneme ye owo iban̄a akpan ufan̄ikọ Bible. Mîdịghe ekeme ndidi ẹkekụt nnyịn ke efakutom ẹnyụn̄ ẹdiọn̄ọ nnyịn nte kiet ke otu Mme Ntiense Jehovah, ndien emi ke idemesie edi eti ikọ ntiense. Ndibuana mme utọ ifiọkutom emi edi usụn̄ kiet ndidara ọtọkiet.

Ediwak ke otu ikọt Jehovah ẹmenam ndien ke ẹsụk ẹnanam n̄waidem man ẹnam utom ukwọrọikọ. Mme asiakusụn̄, mme esenyịn oro ẹsan̄ade-san̄a, mbon Bethel, mme isụn̄utom, ye mme asan̄autom ofụri ererimbot ke ẹsịn idem ẹnam utom uyọhọ ini ẹnyụn̄ ẹdara nte mmọ ẹnamde oro. Ndi nnyịn imadat esịt inyụn̄ idara ye mmọ? Ke edide ntre, ẹyak iwụt esịtekọm oro inyenede iban̄a ndima “nsan̄a [nnyịn emi] ke utom obio ubọn̄ Abasi.” (Col. 4:11) Ke ini idude ọtọkiet ke mbono esop m̀mê ke ikpọ mbono mme Christian, nnyịn imekeme ndinen̄ede nsịn udọn̄ nnọ mmọ. Imekeme ndikpebe ifịk ifịk uwụtn̄kpọ mmọ n̄ko. Imonyụn̄ ikeme ndiyom “ifet” nda n̄kop mme ifiọkutom ye ikọ nsịnudọn̄ mmọ ebe ke ndikama mmọ esen, eyedi ke ndibuana udia ye mmọ.​—Phil. 4:10.

Dara ye Mmọ Eke Ẹsobode Idomo

Ndiyọ ukọbọ nnyụn̄ n̄kan idomo ama anam Paul enen̄ede ebiere ndika iso nnam akpanikọ nnọ Jehovah. (Col. 1:24; Jas. 1:2, 3) Sia enye ọkọfiọkde ke etie nte nditọete imọ ke Philippi ẹyesobo mme ukem idomo oro ndien ke nsọn̄ọnda imọ eyesịn udọn̄ ọnọ mmọ, emi ama ọnọ enye ntak ndidat esịt nnyụn̄ ndara ye mmọ. Ntem, enye ama ewet ete: “Ẹma ẹnọ mbufo akwa ifet ndibuọt idem ke Christ ndinyụn̄ n̄kụt ukụt ke ibuot esie. Koro mbufo ẹmen̄wana ukem en̄wan oro mbufo ẹkekụtde nte n̄n̄wanade, emi ẹnyụn̄ ẹkopde nte n̄n̄wanade ke emi.”​—Phil. 1:29, 30.

Kpasụk ntre mfịn, mme Christian ẹsisobo ubiọn̄ọ ke ntak edinọ ikọ ntiense. Ndusụk ini ubiọn̄ọ emi esitie afai afai, edi esiwak ndinen̄ede ndi n̄kari n̄kari. Ekeme ndidi edori ikọ mbon mfiakedem, usua mbonubon, nsahi mbonutom m̀mê nditọ ufọkn̄wed nnyịn. Jesus ama ọdọhọ ete ke mme idomo ikpenyeneke ndikpa nnyịn idem m̀mê ndinam idem emem nnyịn. Mmọ ẹkpekam ẹnanam nnyịn idara. Enye ọkọdọhọ ete: “Mbufo ẹkop inemesịt ke ini mme owo ẹsụn̄ide mbufo ẹnyụn̄ ẹkọbọde mbufo ẹnyụn̄ ẹtịn̄de kpukpru orụk idiọkn̄kpọ ke nsu ẹdian mbufo ke ntak mi. Ẹdara ẹnyụn̄ ẹfrọ ke idatesịt, koro utịp mbufo omokpon ke heaven.”​—Matt. 5:11, 12.

Nnyịn ikpenyeneke ndikop ndịk nnyụn̄ nnyek idem ke ini ikopde ke nditọete nnyịn ẹsobo ọkpọsọn̄ ukọbọ ke ndusụk idụt. Nnyịn ikpakam idadara ke ntak emi mmọ ẹyọde. Nnyịn imekeme ndibọn̄ akam mban̄a mmọ, iben̄e Jehovah ite anam mmọ ẹka iso ẹnyene mbuọtidem ye ime. (Phil. 1:3, 4) Okposụkedi emi mînyeneke akpan n̄kpọ en̄wen emi ikemede ndinam nnọ ndima nditọete oro, imekeme ndin̄wam mbon oro ẹdude ke esop nnyịn emi ẹsobode idomo. Imekeme ndikere mban̄a nnyụn̄ n̄n̄wam mmọ. Imekeme ndinam mme ifet ẹdu ndidara ye mmọ ke ndikot mmọ ke ini ke ini ẹtiene ẹdidụk mbubreyo Utuakibuot Ubon nnyịn, ke ndisan̄a ye mmọ ke utom ukwọrọikọ, ye ke nditie ọtọkiet ye mmọ nnọ idem inemesịt.

Imenyene ediwak ntak ndidara ọtọkiet! Ẹyak ibiọn̄ọ edu utie ikpọn̄ ererimbot emi inyụn̄ ika iso ibuana idatesịt nnyịn ye nditọete nnyịn. Ke ndinam ntre, nnyịn iyetịp isịn ke ima ye edidianakiet esop inyụn̄ ikop inem otu nditọete ọyọhọ ọyọhọ. (Phil. 2:1, 2) Ih, “ẹdat esịt ke Ọbọn̄ kpukpru ini,” koro Paul eketeme ete: “Nyọtọn̄ọ ntak ndọhọ, Ẹdat esịt!”​—Phil. 4:4.

[Ebiet Ẹdade Ndise Ẹto ke page 6]

Ekondo: Ẹbọ ẹto Replogle Globes