Ifiọkutom ifan̄ ke Britain ẹyenam fi okụt ntak emi mûkpuduọkke idotenyịn. Oyokụt n̄ko se akpanamde man “[ọduọk] uyo fo ke enyọn̄ mmọn̄” man akpan̄wam mbon oro mîbọhọ kan̄a akpanikọ.—Eccl. 11:1.

Akpan n̄kpọ kiet emi oyomde enyene edi ime. Sọn̄ọ du ke esop nyụn̄ yịre ye Jehovah. (Deut. 10:20) Se Georgina akanamde edi oro. Ke ini enye ọkọtọn̄ọde ndikpep Bible ye Mme Ntiense Jehovah ke 1970, Kyriacos ebe esie ama ayat esịt etieti. Ebe esie ama odomo nditre enye, iyakke Mme Ntiense ẹdụk ufọk mmọ, onyụn̄ otomo n̄wed Mme Ntiense Jehovah ekededi oro enye okokụtde ọduọn̄ọ.

Ke ini Georgina ọkọtọn̄ọde ndidụk mbono esop, esịt ama ọdọdiọn̄ ayat ebe esie. Usen kiet enye ama aka Ufọkmbono Obio Ubọn̄ ọkọtọn̄ọ utọk. Ke ini eyenete an̄wan kiet okokụtde ke enye ọfiọk usem Greek akan Ikọmbakara, enye ama ada telefon okot eyenete eren emi otode Greece ke esop en̄wen edi edin̄wam. Mfọnido eyenete oro ama anam esịt osụhọ Kyriacos, ndien ke ufan̄ ọfiọn̄ ifan̄, eyenete emi ama esikam ekpep enye Bible. Edi nte ini akade, Kyriacos ama etre.

Enye ama aka iso ọbiọn̄ọ Georgina ke isua ita. Enye ama ọdọhọ ke enye ekpededei ana baptism ke imọ iyosio enye ndọ. Ke usen emi Georgina okoyomde ndina baptism, enye ama ọbọn̄ akam ke ofụri esịt ọnọ Jehovah ete Kyriacos okûsio imọ ndọ. Ke ini Mme Ntiense ẹkedide ndida Georgina n̄ka mbono, ebe esie ama ọdọhọ mmọ ete: “Mbufo ẹsan̄. Iyasan̄a ke ubomisọn̄ nnyịn idi.” Enye ama odụk edinam usenubọk onyụn̄ okụt nte n̄wan esie anade baptism!

Ke oro ebede, ubiọn̄ọ esie ama etehede ube, ndien enye ama ọtọn̄ọ ndinam ukpụhọde sụn̄sụn̄. Ke n̄kpọ nte isua 40 tọn̄ọ akpa ini emi Georgina okosobode ye Mme Ntiense, ebe esie ama ana baptism! Nso ikan̄wam Kyriacos? Enye ọdọhọ ete: “Esịt ama enen̄ede enem mi aban̄a Georgina sia enye ikayakke n̄kpọ ndomokiet akpan enye ndituak ibuot nnọ Jehovah.” Georgina ọdọhọ ete: “Kpa ye oro ebe mi ọkọbiọn̄ọde mi, mma mbiere ke nditreke ndituak ibuot nnọ Abasi mi. Mma nsibọn̄ akam kpukpru ini nnọ Jehovah, ndien n̄kọduọkke idotenyịn.”

N̄kpọ en̄wen oro edinamde fi an̄wam nsan̄a ndọ fo edi ndinyene mme edu Christian. Apostle Peter eketeme Christian iban ete: “Ẹsụk ibuot ẹnọ mme ebe mbufo, man, edieke ndusụk mmọ mîsụkke ibuot inọ ikọ Abasi, ẹkpedụri mmọ ẹda itoho ke editịn̄ ikọ edi oto ke edu uwem iban mmọ.” (1 Pet. 3:1) Christine ama anam item oro, okposụkedi emi akadade ediwak isua mbemiso ebe esie ekenyịmede ndidụk esop. Ke ini enye akakabarede edi Ntiense ke se ikande isua 20 emi ẹkebede, John ebe esie ikenịmke ke Abasi do. Enye ikoyomke ndisịn idem ke ido ukpono, edi enye ama okụt ke obufa ido ukpono Christine ekedi ata akpan n̄kpọ ọnọ enye. Enye John ọdọhọ ete: “Mma n̄kụt ke ido ukpono esie anam esịt enem enye. Ama anam enye enen̄ede ọsọn̄ idem, ndien emi ama an̄wam mi nyọ ediwak afanikọn̄.”

Christine ikenyịkke-nyịk ebe esie odụk ido ukpono esie, ndien ebe esie ọdọhọ ete: “Toto ke tọn̄ọ, n̄wan mi ama ọfiọk ke ufọn idụhe ndikwọrọ ido ukpono esie nnọ mi, onyụn̄ enyene ime ayak mi n̄kpep nte n̄kemede ye nte mmade.” Ekedi Christine ama okụt ibuotikọ ke Enyọn̄-Ukpeme m̀mê Ẹdemede! emi enye ọfiọkde ke ebe esie ayama, utọ nte mbon oro ẹban̄ade ifiọk ntaifiọk ye n̄kpọ-obot, enye eyemen owụt enye, onyụn̄ ọdọhọ ete, “Mmenịm ke ayama ndikot ibuotikọ emi.”

Nte ini akakade, ebe esie ama ọkpọn̄ utom onyụn̄ ọtọn̄ọ utom in̄wan̄ mbenufọk. Sia ekenyenede ini idahaemi ndikere mban̄a mme akpan mbụme oro ẹban̄ade uwem, enye ama ọtọn̄ọ ndikere nte, ‘Ndi owo okofoforo m̀mê ẹkebobot owo ye akpan uduak?’ Usen kiet, eyenete emi John ekenyenede nneme ama obụp enye ete, “Ndi akpama ndikpep n̄kpọ?” John ọdọhọ ete: “Idahaemi sia mma n̄kọtọn̄ọ ndinịm ke Abasi do, mma nnyịme.”

Ama ọfọn etieti sia Christine mîkọduọkke idotenyịn. Ke enye ama ọkọbọn̄ akam ke isua 20 ete Abasi anam ebe imọ ọbọ akpanikọ, ebe esie ama ana baptism. Idahaemi mmọ ẹdiana kiet ẹnam n̄kpọ Jehovah ifịk ifịk. John ọdọhọ ete: “N̄kpọ iba ẹkenen̄ede ẹnam mi mbọ akpanikọ—mfọnido ye ima Mme Ntiense. Ndien edieke nsan̄a ndọ fo edide Ntiense Jehovah, ọwọrọ emenyene eti nsan̄a emi ẹkemede ndiberi edem, emi mînyụn̄ ikereke iban̄a idemesie kpọt.”  Se idude edi ke Christine ama anam item emi ẹnọde ke 1 Peter 3:1, ndien emi ama enyene ufọn.

Nso kaban̄a nditọ ukpepn̄kpọ Bible emi n̄kpọ anamde mmọ ẹtre ndikpep n̄kpọ? Edidem Solomon ekewet ete: “Suan n̄kpasịp fo ke usenubọk ndien kûyak ubọk fo ọduọk odudu tutu esịm mbubreyo; koro afo mûfiọkke ebiet oro emi edikụtde unen, edide mi m̀mê ko, m̀mê mmọ mbiba ẹdifọn ukem ukem.” (Eccl. 11:6) Ndusụk ini esida ediwak isua mbemiso n̄kpasịp akpanikọ oro itọde ke esịt mme owo ọkọri. Kpa ye oro, nte ini akade, owo ekeme ndidi ndifiọk ufọn edisan̄a n̄kpere Abasi. (Jas. 4:8) Usen kiet, emekeme ndikụt enye ọkọride ke n̄kan̄ eke spirit.

Kere ban̄a se iketịbede inọ Alice emi ọkọwọrọde ke India okodụn̄ ke England. Enye ama ọtọn̄ọ ndikpep Bible ke 1974. Enye ekesisem usem Hindi, edi ama oyom nditịn̄ Ikọmbakara ọfọn. Alice ama aka iso ekpep n̄kpọ isua ifan̄ onyụn̄ odụk mbono esop ifan̄ ke esop Ikọmbakara. Enye ama ọfiọk ke se imọ ikpepde edi akpanikọ, edi enye ikadaha ukpepn̄kpọ emi nte akpan n̄kpọ. Akan oro, enye ama enen̄ede oyom okụk onyụn̄ ama ndisika usọrọ. Nte ini akakade, enye ama etre ndikpep n̄kpọ.

Ke ini ekekperede ndisịm isua 30 tọn̄ọ ke ini oro, Alice ama ewet leta ọnọ ẹsọk Stella emi ekesikpepde enye n̄kpọ. Enye ekewet ete: “Mmọfiọk ke esịt eyenen̄ede enem fi ndikop ke owo emi afo ekesikpepde n̄kpọ toto ke 1974 ama ana baptism ke mbono district ndondo emi. Afo ama enen̄ede an̄wam mi. Ama ọtọ n̄kpasịp akpanikọ ke esịt mi, ndien okposụkedi emi mmen̄keben̄eke idem ini oro ndiyak idem nnọ Abasi, mma nyak n̄kpasịp oro aka iso odu mi ke ekikere ye esịt.”

Nso iketịbe? Alice ọdọhọ ke imọ ima inen̄ede ifụhọ ke ini ebe imọ akakpade ke 1997. Enye ama ọbọn̄ akam ọnọ Abasi. Ke n̄kpọ nte minit duop ke oro ebede, Mme Ntiense iba emi ẹsemde usem Punjabi ẹma ẹdi ufọk esie ẹnyụn̄ ẹnọ enye tract oro Nso Idotenyịn Idu Inọ Mbonima Ẹmi Ẹkpade? Alice ekekere ke Abasi eyere akam imọ onyụn̄ ebiere ndibuana ye Mme Ntiense Jehovah. Edi m̀mọ̀n̄ ke enye edikụt mmọ? Enye ama okụt akani n̄wed emi enye ekewetde adres nditọete ke esop usem Punjabi, emi Stella ọkọnọde enye. Alice ama odụk mbono esop ndien nditọete emi ẹsemde usem Punjabi ẹma ẹnen̄ede ẹdara enye. Enye ọdọhọ ete: “Nte nditọete oro ẹkedarade mi ama enem mi ebịghi onyụn̄ an̄wam mi nyọ ọkpọsọn̄ mfụhọ.”

Enye ama ọtọn̄ọ ndisidụk mbono esop kpukpru ini onyụn̄ afiak ọtọn̄ọ ndikpep Bible, ekpep ndisem nnyụn̄ n̄kot usem Punjabi udọn udọn. Enye ama ana baptism ke 2003. Enye akada leta oro enye ekewetde Stella ekeberi ntem: “Ama anam etieti nditọ n̄kpasịp akpanikọ ke esịt mi ke isua 29 emi ẹkebede ye ke ndinịm eti uwụtn̄kpọ nnọ mi man n̄kpekpebe.”

“Ama anam etieti nditọ n̄kpasịp akpanikọ ke esịt mi ke isua 29 emi ẹkebede ye ke ndinịm eti uwụtn̄kpọ nnọ mi man n̄kpetiene.”—Alice

Nso ke ekeme ndikpep nto mme ifiọkutom emi? Ekeme ndibịghi n̄kan nte afo ekekerede, edi edieke owo amade n̄kpọ eke spirit, enyenede esịt akpanikọ, onyụn̄ osụhọrede idem, Jehovah ayayak akpanikọ ọkọri ke esịt esie. Ti se Jesus eketịn̄de ke uwụtn̄kpọ emi: “N̄kpasịp etịbe onyụn̄ ọkọri, ọniọn̄, edi enye ifiọkke nte asan̄ade. Isọn̄ osion̄o mfri ke idemesie sụn̄sụn̄, ebem iso osion̄o ikọn̄, ndien editop idem, ekem edidian n̄kpasịp ọyọhọ.” (Mark 4:27, 28) Enye esikọri sụn̄sụn̄, “ke idemesie.” Se idude edi ke anditan̄a etop Obio Ubọn̄ ifiọkke nte n̄kpasịp emi asan̄ade ọkọri. Ntre ka iso tọ ke ntatubọk. Ndien emekeme ndidọk uwak uwak nte ini akade.

Kûnyụn̄ ufre nte akam edide akpan n̄kpọ. Georgina ye Christine ẹma ẹka iso ẹbọn̄ akam ẹnọ Jehovah. Edieke afo ‘ọkọbọde ke akam,’ mûnyụn̄ uduọkke idotenyịn, “ke ediwak usen ẹbede” afo emekeme ndifiak n̄kụt “uyo” oro ọkọduọkde ke enyọn̄ mmọn̄.—Rome 12:12; Eccl. 11:1.