1, 2. Tịn̄ se Jesus akanamde ye mme anam-akpanikọ apostle esie ke mmọ ẹma ẹkekụre usọrọ Passover ke 33 E.N.

EKEDI okoneyo Nisan 14 ke isua 33 E.N. Jesus ye mme nsan̄a esie ndisụk n̄kụre usọrọ Passover ekedi oro. Usọrọ emi ama eti mmọ nte Abasi akanyan̄ade mme ete ete mmọ osio ke ufụn Egypt. Edi ikebịghike mme anam-akpanikọ mbet emi ẹma ẹkụt akakan “nsinsi edinyan̄a.” Ke ndan̄nsiere (kpa ke Nisan 14), mme asua ẹma ẹwot Adausụn̄ mmọ emi mînamke idiọkn̄kpọ. Edi edinam usua emi akakabade edi edidiọn̄. Iyịp Jesus oro ẹkeduọkde ayanam ẹnyan̄a ubonowo ẹsio ke idiọkn̄kpọ ye n̄kpa.—Heb. 9:10-14.

² Jesus ama ọtọn̄ọ obufa edinam emi akadade itie Passover eke isua ke isua mbak nnyịn idifre akakan enọ emi enye ọkọnọde nnyịn mi. Enye akanam emi ke ndibụn̄ uyo eke leaven mîdụhe nyak nnọ mme anam-akpanikọ apostle esie 11. Enye ọkọdọhọ mmọ ete: “Emi ada aban̄a idem mi eke ẹdinọde kaban̄a mbufo. Ẹka iso ẹnam emi nditi mi.” Enye ama anam kpasụk ntre ye cup ndatndat wine, onyụn̄ ọdọhọ mmọ ete: “Cup emi ada aban̄a obufa ediomi eke ẹnamde ẹbe ke iyịp mi, emi ẹdiduọkde kaban̄a mbufo.”—Luke 22:19, 20.

3. (a) Nso akwa ukpụhọde akada itie ke Jesus ama akakpa? (b) Mme mbụme ewe ke ikpobụp idem nnyịn iban̄a akam Jesus oro ẹwetde ke John ibuot 17?

³ Ibet ediomi oro Abasi okodụkde ye nditọ Israel ama ekpere utịt. Obufa ediomi emi Jehovah odụkde ye mme anditiene Jesus emi ẹyetde aran ekenyene ndida itie esie. Jesus ama enen̄ede ekere aban̄a nte n̄kpọ editiede ye obufa idụt eke spirit emi. Nditọ Israel ikadianake kiet ituak ibuot inọ Jehovah, ndien emi ama esuene edisana enyịn̄ Abasi. (John 7:45-49; Utom 23:6-9) Edi Jesus okoyom mme anditiene enye ẹka iso ẹdiana kiet man mmọ ẹkpeda esịt kiet ẹnọ enyịn̄ Abasi ubọn̄. Ntre nso ke Jesus akanam?  Enye ama ọbọn̄ ata edinem akam emi edide ata n̄kpọ ukpono ọnọ owo ekededi emi enyenede ifet ndikot. (John 17:1-26; se akpa ndise ibuotikọ emi.) Nte nnyịn inemede akam emi, yak ibụp idem nnyịn mme mbụme emi: “Ndi Abasi ọbọrọ akam Jesus? Ndi ami ke nnam n̄kpọ ekekem ye akam emi?”

4, 5. (a) Nso ke ikpep ito ntọn̄ọ akam Jesus? (b) Didie ke Jehovah akanam se Jesus ekeben̄ede ọnọ idemesie?

⁴ Jesus ama ekpep mbet esie n̄kpọ aban̄a Abasi tutu eyo ọsọn̄. Ekem enye emenede enyịn ese enyọn̄ onyụn̄ ọbọn̄ akam ete: “Ete, ini emedi; nọ eyen fo ubọn̄, man eyen fo ọkpọnọ fi ubọn̄, kpa nte afo ọnọde enye odudu ndikara kpukpru obụkidem, man, kaban̄a ofụri ibat owo emi afo ọnọde enye, enye ọkpọnọ mmọ nsinsi uwem. . . . Mmọnọ fi ubọn̄ ke isọn̄, sia mma n̄kokụre utom eke afo ọkọnọde mi nnam. Mmọdo ke emi afo, Ete, nọ mi ubọn̄ oro n̄kenyenede ye afo mbemiso ererimbot ekedide edidu.”—John 17:1-5.

⁵ Jesus ọkọtọn̄ọ akam esie ke ndisiak mme n̄kpọ emi enye adade nte ata akpan n̄kpọ. Ndinọ Ete esie eke heaven ubọn̄ ekenen̄ede ebehe enye kpa nte ikụtde ke akam emi enye ekekpepde mbet esie, ete: “Ete, yak ẹnam enyịn̄ fo asana.” (Luke 11:2) N̄kpọ en̄wen emi enye ekeben̄ede ekedi ke ufọn mbet esie; enye ọkọdọhọ Abasi ‘ọnọ mmọ nsinsi uwem.’ Ke oro ebede, Jesus ama eben̄e n̄kpọ ọnọ idemesie, ete: “Ete, nọ mi ubọn̄ oro n̄kenyenede ye afo mbemiso ererimbot ekedide edidu.” Jehovah ama ọnọ anam-akpanikọ Eyen esie utịp oro okponde akan se enye ekeben̄ede ke ndinọ enye “enyịn̄ oro enen̄erede ọfọn akan” eke mme angel.—Heb. 1:4.

6. Nso ke akana mme apostle ẹnam man ẹnyene nsinsi uwem, ndien isan̄a didie ifiọk ke mmọ ẹma ẹnam?

⁶ Jesus ama ọbọn̄ akam n̄ko aban̄a se anade nnyịn mme anamidiọk inam man ikeme ndibọ enọ nsinsi uwem oro owo mîdotke. (Kot John 17:3.) Enye ọkọdọhọ ke ana ika iso “ndikọ ifiọk” Abasi ye eke Christ. Usụn̄ kiet emi ikemede ndinam emi edi ndida enyịn ye utọn̄ nnyịn n̄kpep n̄kpọ adan̄a nte ikekeme mban̄a Jehovah ye Eyen esie. Akpan usụn̄ en̄wen emi ikemede ndinam emi edi ndinam se nnyịn ikpepde iban̄a enye. Mme apostle ẹma ẹnanam n̄kpọ iba emi, koro Jesus ama aka iso ke akam esie ete: “Mma nyak mme ikọ emi afo ọkọnọde mi nnọ mmọ, mmọ ẹnyụn̄ ẹbọ mmọ.” (John 17:8) Edi akana mmọ ẹka iso ẹtie ẹkere ikọ Abasi emi mmọ ẹkekopde mi ẹnyụn̄ ẹnam se mmọ ẹkopde emi kpukpru usen man ẹnyene nsinsi uwem. Ndi mme anam-akpanikọ apostle emi ẹma ẹnam emi tutu esịm utịt uwem mmọ ke isọn̄? Ke akpanikọ, ẹma ẹnam! Nnyịn ifiọk emi sia ẹwet enyịn̄ mmọ kiet kiet ke itiat idakisọn̄ 12 emi ẹdude ke Obufa Jerusalem, ndien owo idisọhike enyịn̄ mmọ ifep.—Edi. 21:14.

7. Nso ke ndifiọk Abasi ọwọrọ, ndien ntak emi edide akpan n̄kpọ?

⁷ Nta mme ekpep n̄kpọ n̄kpọ mban̄a usem Greek ẹdọhọ ke ẹkeme n̄ko ndikabade ikọ oro ẹkabarede “ndikọ ifiọk” nte “ẹkpenyene ndika iso mfiọk.” Ikọ iba emi ẹwọrọ ukem n̄kpọ. Ntem, “ndikọ ifiọk” Abasi ọwọrọ ndika iso n̄kpep ekese mban̄a enye. Edi emi iwọrọke ndifiọk mme edu ye uduak esie kpọt. Ana inen̄ede ima enye inyụn̄ idi ata ufan esie. Ana inyụn̄ ima nditọete nnyịn. Bible ọdọhọ ete: “Owo eke mîmaha ima ifiọkke  Abasi, koro Abasi edi ima.” (1 John 4:8) Ntem, ndifiọk Abasi abuana ndikop uyo esie. (Kot 1 John 2:3-5.) Nso akwa ifet ke edi ntem ndibat nnyịn nsịn ke otu mbon emi ẹfiọkde Jehovah! Edi imekeme nditaba ifet oro nte Judas Iscariot akatabade. Ntre, ẹyak inam ofụri se ikekeme man ika iso idi ufan Jehovah. Edieke inamde emi, Jehovah ọyọnọ nnyịn enọ nsinsi uwem oro owo mîdotke.—Matt. 24:13.

8, 9. Nso ikenen̄ede ibehe Jesus ke ini utom ukwọrọikọ esie ke isọn̄, ndien ewe edinam ido ukpono ke enye akasua?

⁸ Ke ima ikokot akam Jesus oro ẹwetde ke John ibuot 17, imokụt ke Jesus ama enen̄ede ama mme apostle esie onyụn̄ ama nnyịn. (John 17:20) Edi akpana ifiọk ke idịghe edinyan̄a nnyịn ebehe Jesus akan. N̄kpọ emi ekenen̄erede ebehe enye toto ke ntọn̄ọ tutu esịm utịt utom ukwọrọikọ esie ke isọn̄ ekedi ndikụt nte ke ẹnam enyịn̄ Ete esie asana ẹnyụn̄ ẹnọ enyịn̄ oro ubọn̄. Ke uwụtn̄kpọ, ke akpa ini emi Jesus eketịn̄de ntak emi enye ekedide isọn̄, enye ama okot ikpan̄wed Isaiah, emi ọdọhọde ete: “Spirit Jehovah odoro mi ke idem, koro enye ama eyet mi aran enịm ete ntan̄a eti mbụk nnọ mme ubuene.” Imenịm ke ini Jesus okokotde itien̄wed oro, ke enye ama okot enyịn̄ Abasi in̄wan̄-in̄wan̄.—Luke 4:16-21.

⁹ Anyan ini mbemiso Jesus ekedide isọn̄, mme adaiso Ido Ukpono Mme Jew ikayakke mme owo ẹsikot enyịn̄ Abasi. Imọfiọk ke Jesus ama enen̄ede asua utọ edinam emi mîkemke ye N̄wed Abasi mi. Enye ọkọdọhọ mme andibiọn̄ọ enye ete: “Ami ndi ke enyịn̄ Ete mi, edi mbufo idarake mi; edieke owo efen edide ke enyịn̄ esiemmọ, mbufo ẹyedara enye.” (John 5:43) Ekem, usen ifan̄ mbemiso Jesus akakpade, enye ama etịn̄ n̄kpọ emi ekenen̄erede ebehe enye, ke ini enye ọkọbọn̄de akam ete: “Ete, nọ enyịn̄ fo ubọn̄.” (John 12:28) Ndien ke akam oro inemede mi, imokụt n̄ko ke ata akpan n̄kpọ ke uwem Jesus ekedi ndinọ enyịn̄ Ete esie ubọn̄.

10, 11. (a) Nso ke Jesus akanam man anam mme owo ẹfiọk enyịn̄ Ete esie? (b) Ntak emi mbet Jesus ẹnamde ẹfiọk enyịn̄ Jehovah?

 ¹⁰ Jesus ọkọbọn̄ akam ete: “Mmayarade enyịn̄ fo nnọ mme owo emi afo okosiode ke ererimbot ọnọ mi. Mmọ ẹkedi okwo, ndien afo akayak mmọ ọnọ mi, ndien mmọ ẹmenam ikọ fo. N̄ko, ami ndụhe aba ke ererimbot, edi mmọ ẹdu ke ererimbot ndien ami ke nnyọn̄ ntiene fi. Edisana Ete, da enyịn̄ fo kpeme mmọ emi afo ọkọnọde mi, man mmọ ẹkpedi kiet kpa nte nnyịn idide kiet.”—John 17:6, 11.

¹¹ Ndinam mbet esie ẹfiọk enyịn̄ Ete esie ikokụreke ke ndikokot enyịn̄ oro kpọt. Jesus ama anam mmọ ẹfiọk owo emi Jehovah edide. Enye ama ekpep mmọ aban̄a nti edu Jehovah ye nte enye esinamde n̄kpọ ye nnyịn. (Ex. 34:5-7) Akan oro, Jesus etie ke ebekpo esie ke heaven aka iso ndin̄wam mbet esie ẹnam mme owo ke ofụri isọn̄ ẹfiọk enyịn̄ Jehovah. Ntak emi mmọ ẹnamde emi? Man ẹn̄wam ata ediwak owo ẹkabade ẹdi mbet mbemiso utịt idiọk editịm n̄kpọ emi. Ndien ini oro ama ekem, Jehovah ayanyan̄a mme asan̄autom esie oro ẹsọn̄ọde ẹda, kpukpru owo ẹyenyụn̄ ẹfiọk akwa enyịn̄ Jehovah.—Ezek. 36:23.

12. Siak akpan n̄kpọ ita emi anade inam man ikeme ndinam utom unyan̄a uwem.

¹² Ke ini Jesus okodude ke isọn̄, enye ama esịn ifịk an̄wam mbet esie ẹkan mmeme mmọ. Ama oyom mmọ ẹnam emi man ẹkpekeme ndikụre utom oro Jesus ọkọtọn̄ọde. Enye ọkọbọn̄ akam ete: “Kpa nte afo okosiode mi ọdọn̄ ke ererimbot, kpa ntre ke ami nsio mmọ ndọn̄ ke ererimbot.” Jesus ama etịn̄ akpan n̄kpọ ita emi anade mmọ ẹnam man ẹkeme ndinam utom unyan̄a uwem emi. Akpa, enye ekeben̄e ete mbet esie ẹkûdi ubak idiọk ererimbot Satan. Udiana, enye ekeben̄e ete Abasi anam mmọ ẹsana ebe ke ndida akpanikọ Bible ndu uwem. Ọyọhọ ita, Jesus ama eben̄e ediwak ini ete ẹnam mbet imọ ẹdiana kiet ẹnyụn̄ ẹma kiet eken nte imọ ye Ete imọ. Emi oyom idụn̄ọde idem nnyịn. Nnyịn kiet kiet ikpenyene ndibụp idem nnyịn ite, ‘Ndi ke nnam n̄kpọ ekekem ye n̄kpọ ita emi Jesus ekeben̄ede?’ Jesus ama enịm ke edieke mbet esie ẹnamde mme n̄kpọ emi, ke ediwak owo ẹyenyịme etop mmọ.—Kot John 17:15-21.

13. Didie ke Abasi ọkọbọrọ akam Jesus ke eyo mme apostle?

¹³ Ima ikot n̄wed Utom Mme Apostle, emi etienede Gospel mbinan̄, iyokụt ke ẹma ẹbọrọ akam Jesus. Kere nte ubahade okpokodude ke otu mme Christian eyo mme apostle ke ntak emi mmọ ẹkedide mme Jew ye Gentile, imọ ye ubuene, ifịn ye mme eteufọk. Edi, kpukpru mmọ ẹma ẹnen̄ede ẹdiana kiet tutu edi se ẹmende mmọ ẹdomo ye nsio nsio ndido idem owo, emi Jesus edide ibuot. (Eph. 4:15, 16) Emi ekedi ata utịben̄kpọ ke ererimbot Satan emi mîdianake kiet mi! Itoro enyene Jehovah emi adade okopodudu edisana spirit esie anam emi!—1 Cor. 3:5-7.

14. Didie ke ẹbọrọ akam Jesus ke eyo nnyịn?

¹⁴ Ọdiọk tutu sia utịbe utịbe edidianakiet emi ikodụhe aba ke mme apostle ẹma ẹkekpan̄a. Utu ke oro, nte ẹkebemde iso ẹtịn̄, akwa mfiakedem ama ọtọn̄ọ, emi akanamde nsio nsio n̄ka Christendom ẹwọrọ ẹdi. (Utom 20:29, 30) Edi ke 1919, Jesus ama osio mme anditiene enye oro ẹyetde aran ke ufụn nsunsu ido ukpono onyụn̄ adian mmọ ọtọkiet ke “mfọnmma mbọbọ  edidianakiet.” (Col. 3:14) Nso utịp ke utom ukwọrọikọ mmọ enyene ke ererimbot? Se ibede “mme erọn̄ en̄wen” miliọn itiaba emi ẹtode “kpukpru idụt ye esien ye obio ye usem” ẹdi ẹdidiana kiet ye ikọt Abasi oro ẹyetde aran ẹnam otuerọn̄ kiet. (John 10:16; Edi. 7:9) Emi edi ata n̄wọrọnda ibọrọ akam emi Jesus ọkọbọn̄de ete: “Man ererimbot ọkpọfiọk ete ke afo [Jehovah] okosio mi ọdọn̄ ye nte ke afo amama mmọ kpa nte afo akamade mi.”—John 17:23.

15. Ewe akam ke Jesus ọkọbọn̄ san̄asan̄a aban̄a mbet esie oro ẹyetde aran?

¹⁵ Ke mbubreyo Nisan 14, Jesus ama ọnọ mme apostle esie ubọn̄, m̀mê ukpono, ke ndidụk ediomi ye mmọ man mmọ ẹkpetiene enye ẹkara ke Obio Ubọn̄ esie. (Luke 22:28-30; John 17:22) Ntem, Jesus ama ọbọn̄ akam aban̄a kpukpru mbon oro ẹdikabarede idi mme anditiene enye oro ẹyetde aran, ete: “Ete, amaedi se afo ọkọnọde mi, n̄kpama nte, ke ebiet eke ndude, mmọ ẹdu do n̄ko ye ami, man mmọ ẹkpekụt ubọn̄ oro afo ọkọnọde mi, koro afo akamade mi mbemiso ntọn̄ọ ererimbot.” (John 17:24) Emi akam ananam mme erọn̄ en̄wen ẹkop idatesịt utu ke ndifịbe mbon oro ẹyetde aran, ndien emi aka iso owụt edidianakiet emi odude ke ufọt kpukpru ata mme Christian oro ẹdude mfịn ke isọn̄.

16, 17. (a) Jesus ekebiere ndinam nso ke utịt akam esie? (b) Nso ke nnyịn ikpebiere ndinam?

¹⁶ Mme adaiso ido ukpono iyakke ata ediwak owo ke ererimbot ẹkụt in̄wan̄-in̄wan̄ uyarade oro owụtde ke Jehovah enyene mme asan̄autom emi ẹdianade kiet ẹnyụn̄ ẹnen̄erede ẹfiọk enye. Kpa ntre ke ekedi ke eyo Jesus. Ntem enye akada akam esie ekeberi edinem edinem ntem: “Edinen Ete, ererimbot ifiọkke fi; edi ami mmọfiọk fi, mmọ emi ẹnyụn̄ ẹfiọk ẹte ke afo okosio mi ọdọn̄. Ami mmonyụn̄ nnam mmọ ẹfiọk enyịn̄ fo nyonyụn̄ nnam mmọ ẹfiọk, man ima oro afo akamade mi okpodu ye mmọ, ami n̄kponyụn̄ mbuana n̄kpọ ye mmọ.”—John 17:25, 26.

¹⁷ Ndi odu owo oro ekemede ndidọhọ ke Jesus inamke n̄kpọ ikekem ye akam esie? Sia enye edide Ibuot esop, enye aka iso ndin̄wam nnyịn inam ẹfiọk enyịn̄ ye uduak Ete esie. Nnyịn ikpakam ika iso isụk ibuot inọ enye ke ndisịn ifịk nnam ewụhọ esie emi ọdọhọde ikwọrọ ikọ inyụn̄ inam mbet. (Matt. 28:19, 20; Utom 10:42) Nnyịn ikpakam inam ofụri se ikekeme n̄ko man ika iso idiana kiet. Edieke inamde mme n̄kpọ emi, ediwọrọ ke imanam n̄kpọ ikekem ye akam Jesus, ndien emi ọyọnọ enyịn̄ Jehovah ubọn̄ onyụn̄ ọnọ nnyịn nsinsi inemesịt.