ỌYỌHỌ isua 100 edi emi tọn̄ọ ẹkesio “Photo-Drama of Creation,” kpa enyene-ndyọ fim emi ẹkesiode man ẹn̄wam mme owo ẹnịm ke Bible edi Ikọ Abasi. “Photo-Drama” ama enen̄ede owụt ke Jehovah edi Andibot, kpa ye oro mbon eyo oro ẹkenịmde ke n̄kpọ okofoforo, ẹkemade ndidụn̄ọde n̄kpọ nyom ndudue, mîkonyụn̄ isọpke inịm se mbon en̄wen ẹtịn̄de.

Charles T. Russell oro akadade Nditọ Ukpepn̄kpọ Bible usụn̄ ini oro ama esidomo nsio nsio usụn̄ ndinam ẹsọsọp ẹkwọrọ etop Bible ẹnọ adan̄a ediwak owo nte ẹkekeme. Ke se ibede isua 30 mbemiso ini oro, Nditọ Ukpepn̄kpọ Bible ẹma ẹsosion̄o ediwak n̄wed ẹda ẹkwọrọ ikọ. Edi mmọ ẹma ẹkụt n̄kpọ en̄wen emi mmọ ẹkemede ndida n̄kwọrọ ikọ, oro edi, fim.

Ke iduọk isua 1890, ẹma ẹsio fim ẹdi, edi fim ini oro ikenyeneke uyo, ekesidi ndise ndise kpọt. Ke 1903, ẹma ẹbre fim ufọkabasi ẹwụt mme owo ke ufọkabasi kiet ke New York City. Ntem, ke ini mme anam a-fim ẹketọn̄ọde-tọn̄ọ ndikpep nte ẹkpenamde fim ke 1912, Brọda Russell ama ọtọn̄ọ ndutịm ndisio “Photo-Drama.” Enye ama ọfiọk ke fim emi eyekpep mme owo akpanikọ Bible ke usụn̄ oro n̄wed ikpọn̄ mîkemeke ndikpep.

“Photo-Drama” ekenyene ikpehe inan̄, ndien ẹkesisio enye ke hour itiaita. Ẹma ẹnam eyenete emi ẹkenen̄erede ẹdiọn̄ọ ini oro, emi okonyụn̄ enyenede ata eti uyo, ọnọ mbio mbio utịn̄ikọ Bible 96. Ẹma ẹbre ikwọ ke ediwak ikpehe Drama emi. Ẹma ẹnam ikwọ, uyo owo, ndiye ndise slide, ye mme mbụk Bible oro ẹnamde-nam ẹwụt, ẹsan̄a kiet.

Ẹkebọ mme anam-mbubehe fim ediwak mbio mbio fim ye ediwak ndise slide ẹdep. Nta mme ewet ndise ke Philadelphia, New York, Paris, ye London ẹkedrọ ediwak n̄kpọ oro ẹwụtde ke ndise slide oro. Mme anamutom ke Itieutom Uwet Ndise Bethel  ẹma ẹtiene ẹdrọ, ẹma ẹsinyụn̄ ẹfiak ẹdrọ mme ndise oro ẹbiarade. Ke adianade ye fim oro ẹkedepde-dep, mbonubon Bethel ẹma ẹka Yonkers ke New York, oro mîkoyomke usụn̄ ikpọn̄ Bethel, ẹkenam fim. Ndusụk mmọ ẹkenam nte idi Abraham, Isaac, ye angel oro mîkayakke Abraham awa eyen esie.—Gen. 22:9-12.

Ufan Brọda Russell kiet ọkọdọhọ mme ọkọmbụk n̄kpọntịbe ke fim oro “ayanam ata ediwak owo ẹma N̄wed Abasi ye nte ke idụhe n̄kpọ ndomokiet emi ufọkabasi ẹkenamde oro ekemede ndinam mme owo ẹma N̄wed Abasi ntre.” Ndi mme ọkwọrọ ederi ẹma ẹma n̄kpọ oro ẹkesiode ẹdi do man ẹn̄wam ata ediwak mbon oro ẹkeyomde-yom ndifiọk Abasi? Mme ọkwọrọ ederi Christendom ẹkekam ẹtetịn̄ n̄kpọ ẹbiat “Photo-Drama.” Ndusụk mmọ ẹma ẹda n̄kari ẹnam mme owo ẹkûse; ndusụk ẹsọn̄ esịt ẹkpan mme owo ndika n̄kese fim oro. Ke ebiet kiet oro ẹkeyomde ndisio fim oro n̄wụt mme owo, mme ọkwọrọ ederi ẹma ẹnam ẹsịbe ikan̄ ilektrik ẹfep.

Kpa ye oro, mme owo ẹma ẹsiwọn̄ọ ọkwọkudịm ẹkeyọhọ ufọkmbre ẹse “Photo-Drama” ke mfọn. Ke United States, idụhe usen emi mme owo ke ikpọ obio 80 mîkesehe “Photo-Drama.” Akpa ini emi ediwak mmọ ẹkekụtde fim emi ẹtịn̄de ikọ ekedi oro. Ẹma ẹwụt nte unen obotde ọwọrọ ke nsen ye nte n̄kpọ etịbede ọwọrọ ke isọn̄. Ẹma ẹda se ntaifiọk ẹkediọn̄ọde ini oro ẹwụt ke Jehovah enen̄ede enyene ọniọn̄. Nte iketịn̄de ke ntọn̄ọ, owo kiet emi ekesede “Photo-Drama” onyụn̄ okụt ini emi Brọda Russell etịn̄de ntọn̄ọikọ, ọkọdọhọ ke ‘etie nte Brọda Russell odu do ye mmimọ etịn̄ ikọ.’

Tim Dirks emi esiwetde mbụkeset oro aban̄ade fim ọdọhọ ke “Photo-Drama” ekedi “ata akpa fim emi ẹkenamde uyo owo, ndiye ndise slide, ye ndise oro owụtde nte mme owo ẹnamde nsio nsio n̄kpọ, asan̄a kiet.” Idụhe fim ndomokiet oro ẹkesiode mbemiso “Photo-Drama” emi eketiede ntre, akpan akpan enye oro aban̄ade Bible. Inyụn̄ idụhe fim oro mme owo ẹkesede ntre—n̄kpọ nte owo miliọn usụkkiet ke Edem Edere America, Europe, Australia, ye New Zealand ẹkese ke akpa isua kpọt!

Ata akpa ini oro ẹkesiode “Photo-Drama” ekedi ke January 11, 1914, ke New York City. Ke ọfiọn̄ itiaba ẹma ẹkebe, akpa ekọn̄ ererimbot ama asiaha. Edi ediwak owo ke ererimbot ẹma ẹsitie kiet ẹse “Photo-Drama,” ndien ndiye ndise Obio Ubọn̄ Abasi oro ẹkewụtde ke fim oro ama ọdọn̄ mmọ esịt. Idụhe fim en̄wen emi ẹkesiode ke 1914 emi ẹkemede ndimen ndomo ye “Photo-Drama.”