‘Ami Jehovah Abasi Mbufo Ndi Edisana’
San̄a Kpere Abasi
‘Ami Jehovah Abasi Mbufo Ndi Edisana’
“EDISANA, edisana, edisana Jehovah Abasi.” (Ediyarade 4:8) Ikọ Bible emi anam ifiọk adan̄a nte Jehovah asanade. Emi owụt ke enye asana, eden̄i, onyụn̄ anana ndo. Abasi isan̄ake n̄kpọ ye idiọkn̄kpọ; idiọkn̄kpọ inyụn̄ ikemeke ndisabade enye ke usụn̄ ndomokiet. Ndi oro ọwọrọ ke tutu amama mme anana-mfọnmma owo ikemeke ndidi ufan ye Abasi emi asanade ama mi? Baba, iwọrọke ntre! Ẹyak ikere iban̄a ikọ oro ẹwetde ke Leviticus Ibuot 19, emi ọnọde nnyịn idotenyịn.
Enyene se Jehovah ọkọdọhọde Moses etịn̄ ọnọ “ofụri esop nditọ Israel.” Se Enye akafiakde etịn̄ ekebehe eyen Israel kiet kiet. Nso ke Abasi ọkọdọhọ Moses etịn̄ ọnọ mmọ? Enye ọkọdọhọ ete: “Mbufo ẹdi edisana: koro ami Jehovah Abasi mbufo ndide edisana.” (Ufan̄ikọ 2) Akana eyen Israel kiet kiet odu edisana uwem. Ikọ oro “mbufo ẹdi edisana” owụt ke idịghe nte Abasi ọkọdọhọ mmọ ‘ẹkpema mbufo ẹsana, mîmaha mbufo ẹkpọn̄,’ edi ekedi ewụhọ. Ndi Abasi ọkọdọhọ mmọ ẹnam se owo mîkemeke ndinam?
N̄kọ ọmọfiọk ke ikọ Jehovah ikọwọrọke ke mme owo ẹnyene ndisana ata ukem ukem nte imọ, edi enye eketịn̄ emi ndiwụt ntak oro imọ ikọnọde ewụhọ oro. Ke nditịn̄ ke usụn̄ efen, Jehovah ikọdọhọke mme anana-mfọnmma owo oro ẹketuakde ibuot ẹnọ enye ke Israel ẹsana ata ukem ukem nte imọ. Oro ikpekekemeke nditịbe. Jehovah, “ata Edisana Abasi,” enen̄ede asana akan kpukpru owo. (Mme N̄ke 30:3) Edi sia Jehovah edide edisana, enye oyom mme andituak ibuot nnọ imọ ẹsana—oro edi, ke udomo oro mme anana-mfọnmma owo ẹkemede ndisana. Didie ke mmọ ẹkeme ndiwụt ke imasana?
Ke Jehovah ama ọkọdọhọ idụt Israel ẹsana, enye ama ọdọhọ Moses asian mmọ nte iyomde mmọ ẹdu uwem. Akana eyen Israel kiet kiet enen̄ede okpono ete ye eka esie, okpono n̄kani owo (Ufan̄ikọ 3, 32); atua mme inan, nnan, ye ubuene mbọm (Ufan̄ikọ 9, 10, 14); anam akpanikọ, okûnyụn̄ asari owo ndomokiet (Ufan̄ikọ 11-13, 15, 35, 36); onyụn̄ ama mbon oro ẹtienede enye ẹtuak ibuot ẹnọ Abasi nte amade idemesie. (Ufan̄ikọ 18) Ke ini nditọ Israel ẹkenịmde edumbet emi ye mmọ eken, oro ama anam mmọ “ẹdi edisana ikọt Abasi [mmọ].”—Numbers 15:40.
Ewụhọ oro ọdọhọde idi edisana anam ifiọk nte Jehovah Abasi esikerede n̄kpọ ye nte enye esinamde n̄kpọ. Akpa kan̄a, imọfiọk ke edieke anade inen̄ede isan̄a ikpere enye, ke oyom isịn ofụri ukeme idu uwem ekekem ye mme edumbet edisana ido uwem emi enye ọnọde. (1 Peter 1:15, 16) Edieke ikade iso inịm mme edumbet emi, imekeme ndinen̄ede n̄kop inem uwem idahaemi.—Isaiah 48:17.
Ewụhọ oro ọdọhọde idi edisana owụt n̄ko ke Jehovah enyene mbuọtidem ke idem mme andituak ibuot nnọ enye. Jehovah idehedei idọhọ nnyịn inam n̄kpọ oro nnyịn mîkemeke ndinam. (Psalm 103:13, 14) Enye ọfiọk ke nnyịn emi enye okobotde ke mbiet esiemmọ imekeme ndisana nte owo. (Genesis 1:26) Ndi ọdọn̄ fi ndikpep n̄kpọ en̄wen mban̄a nte ekemede ndinen̄ede nsan̄a n̄kpere Jehovah, kpa edisana Abasi?
[Ndise ke page 9]
Kpukpru nnyịn imekeme ndisana