Mbụme Oro Mme Andikot Ẹbụpde

Didie ke Jesus ye Ete Esie Ẹdi Kiet?

Jesus ọkọdọhọ ete: “Ami ye Ete idi kiet.” (John 10:30) Ndusụk owo ẹsikot itien̄wed emi ndida nsọn̄ọ ke Jesus ye Ete esie ẹdi ubak Abasi-Ita-ke-Kiet. Ndi se ikọ Jesus ọkọwọrọde edi oro?

Ẹyak ise se ikanamde ẹtịn̄ ikọ oro. Jesus ọkọdọhọ ke ufan̄ikọ 25 ete ke imọ ida enyịn̄ Ete imọ inam utom. Enye ama etịn̄ aban̄a ndamban̄a erọn̄ oro Ete imọ ọkọnọde imọ ke ufan̄ikọ 27 esịm 29. Ikọ iba oro Jesus eketịn̄de do ikpekenyeneke se ọwọrọde inọ mbon oro enye eketịn̄de ikọ ọnọ edieke enye ye Ete esie ẹkpedide owo kiet. Utu ke oro, se Jesus eketịn̄de ọwọrọ ntem, ‘Ami ye Ete idi itai ye aban̄, ndien emi iyakke owo ndomokiet ekeme ndiwamade mme erọn̄ nsio mi ke ubọk, ukem nte owo mîkemeke ndiwamade mmọ nsio Ete mi ke ubọk.’ Etie ukem ukem nte eyen ndidọhọ asua ete esie ete, ‘Ama an̄wana ye Ete mi, ọwọrọ an̄wana ye ami.’ Owo ndomokiet ikpekereke ke eyen emi ye ete esie ẹdi owo kiet. Edi kpukpru owo ẹkpefiọk ke mmọ ẹdi itai ye aban̄.

Jesus ye Jehovah Abasi Ete esie ẹdi “kiet” n̄ko koro mmọ ẹnyene ukem uduak ye edumbet. Jesus ibietke Satan ye Adam ye Eve, sia akanam enye iyomke ndida ke idem n̄kpọn̄ Abasi. Jesus ọkọdọhọ ete: “Eyen ikemeke ndinam baba n̄kpọ kiet ke odudu idemesie, ke mîbọhọke se enye okụtde nte Ete anamde. Koro se ededi oro Enye emi anamde, kpa mme n̄kpọ emi n̄ko ke Eyen anam.”—John 5:19, 14:10; 17:8.

Edi Abasi ye Jesus Eyen esie ndinen̄ede ndiana kiet ntem inamke mmọ ẹdi owo kiet. Mmọ ẹdi owo iba. Owo mmọ kiet kiet enyene ọkpọkpọ edu esiemmọ. Jesus enyene ntụk, ekikere, mbufiọk esiemmọ ye ifụre ndimek se enye amade. Kpa ye oro, enye emek ndinam uduak Ete esie. Jesus ọkọdọhọ ke Luke 22:42 ete: “Edi, okûdi ke uduak mi, edi yak uduak fo ada itie.” Ikọ emi ikpenyeneke se ọwọrọde edieke enye mîkpekemeke ndinam ubiere idemesie. Edieke Jesus ye Ete esie ẹkpenen̄erede ẹdi owo kiet, ntak emi Jesus ọkọbọn̄de akam ọnọ Abasi onyụn̄ osụhọrede idem enyịme ke enyene n̄kpọ oro imọ mîfiọkke, emi Ete imọ ikpọn̄ ọfiọkde?—Matthew 24:36.

Mme owo ke ediwak ido ukpono ẹtuak ibuot ẹnọ mme abasi emi ẹwụtde nte ẹtọhọde ẹnyụn̄ ẹn̄wanade ye mbonubon mmọ. Ke uwụtn̄kpọ, ke n̄ke mbon Greece, Cronus ama akan Uranus ete esie, onyụn̄ ata nditọ esiemmọ. Emi edi ata isio ye ata edidianakiet emi Jehovah Abasi ye Jesus Eyen esie ẹnyenede ke ntak ima. Utọ edidianakiet emi anam nnyịn inen̄ede ima mmọ! Ke akpanikọ, nnyịn imenyene ata akwa ifet ndidiana kiet ye akakan Owo iba emi ke ofụri ekondo. Jesus ọkọbọn̄ akam ntem aban̄a mme mbet esie, ete: “Mben̄e . . . kpukpru mmọ ẹkpedi kiet, kpa nte afo Ete, odude ke ebuana ye ami, ami nnyụn̄ ndude ke ebuana ye afo, man mmọ n̄ko ẹkpedu ke ebuana ye nnyịn.”—John 17:20, 21.

Ntem, ke ini Jesus ọkọdọhọde ete, “Ami ye Ete idi kiet,” enye iketịn̄ke iban̄a ndịben̄kpọ Abasi-Ita-ke-Kiet, edi eketịn̄ aban̄a ata eti edidianakiet—oro edi, owo iba oro ẹnen̄erede ẹdiana kiet.