Ndi Okụk Esinam Owo Enen̄ede Okop Inemesịt?

SONIA akamana ke Spain. Enye ama esitiene eka esie aka mbono esop Mme Ntiense Jehovah ke ini ekedide eyenọwọn̄. Edi ke ini enye ọkọwọrọde akwa an̄wan, enye ama ọwọrọ aka London ke England, ndien nte ini akakade, enye ama anam utom ke itieutom emi ẹsibọde owo okụk ẹsịn ke mbubehe.

Sonia ama ama utom esie. Enye ama anam ekese okụk onyụn̄ esinam ata ikpọ mbubehe ọnọ mme owo. Utom oro ama enen̄ede enem enye, enye onyụn̄ enen̄ede ọfiọk ndinam. Sonia ekesinam utom hour 18 ke usen, ndien ndusụk usen, enye ekeside idap hour 2 m̀mê 3 kpọt. N̄kukụre se enye ọkọfiọkde ekedi utom esie. Etise, kpukpru n̄kpọ ẹma ẹkpụhọde. Sonia ama ọduọ ata idiọk akpauben̄, emi etiede nte ekedi ke ntak emi enye mîkesiduọkke odudu. Enye ekedi isua 30 kpọt.

Idem Sonia n̄kan̄ kiet ama akpa, ndien mbiausọbọ ikọfiọkke m̀mê enye ayafiak etịn̄ ikọ tutu amama. Eka esie ama ọsọsọp aka England man ekese aban̄a enye. Ke ini Sonia akafiakde ọtọn̄ọ ndisan̄a isan̄, eka esie ama ọdọhọ enye ete, “Mmọn̄ n̄ka mbono esop, ndien nyom etiene edi sia nyomke ndiyak fi etie ikpọn̄.” Sonia ama enyịme nditiene n̄ka. Nso iketịbe?

Sonia ọkọdọhọ ete, “Kpukpru se n̄kokopde ẹkebiet akpanikọ. Ekedi ata utịben̄kpọ. Ekenenem mi ndinyịme kiet ke otu ediwak mbon oro ẹkekọmde mi ke akpa ini oro n̄kakade Ufọkmbono Obio Ubọn̄, ekpep mi Bible. N̄kani ọdiọn̄ọ mi ikesidịghe aba idise mi, edi mbufa ufan mi ẹma ẹnem itie ẹnyụn̄ ẹkere ẹban̄a mi.”

Sonia ama afiak ọtọn̄ọ nditịn̄ ikọ nsịtnsịt onyụn̄ anam usọp usọp n̄kọri ke ukpepn̄kpọ Bible esie. Enye ama ana baptism ke ufan̄ isua kiet. Ediwak ke otu mbufa ufan esie ẹkeda utom ukwọrọikọ nte ubọkọkọ, ndien enye ama okụt nte mmọ ẹkekopde inemesịt. Sonia ama ekere ete, ‘Nyom ndikop inemesịt ntre. Nyom ndinam ofụri se n̄kemede nnọ Jehovah Abasi!’ Idahaemi, Sonia ada utom ukwọrọikọ nte ubọkọkọ.

Nso ke Sonia ekpep oto se ikọwọrọde enye? Enye ọdọhọ ete, “Okposụkedi oro n̄kesidiade ekese okụk, mfịghe ye mfịna utom oro ẹma ẹsinam esịt etịmede mi inyụn̄ iyakke n̄kop inemesịt. Idahaemi mmọfiọk ke se idide ata akpan n̄kpọ ke uwem edi ndinam ufan ye Jehovah Ete mi eke heaven. Mmonyụn̄ nnen̄ede n̄kop inemesịt.”

Apostle Paul ekewet ete: “Ima okụk edi orụn̄ kpukpru orụk idiọkn̄kpọ, ndien ke edinyanade mbịne ima emi, ndusụk owo ẹma ẹtụn usụn̄ ẹkpọn̄ mbuọtidem ẹnyụn̄ ẹkịm ofụri idem mmọ ẹnọ ediwak unan.” (1 Timothy 6:10) Sonia ekeme ndida se ikọwọrọde enye nsọn̄ọ ke ikọ emi edi akpanikọ.