Nte Mme Christian Eyo Mme Apostle Ẹkedude Uwem

“Ẹtie ke Ufọk Ẹnam N̄kpọ”

“Edikem nte mmọ ẹsan̄ade ẹka, enye odụk ke obio-in̄wan̄ kiet. Ndien n̄wan kiet emi ekerede Martha ada enye nte esenowo odụk ke ufọk. N̄wan emi n̄ko enyene eyeneka an̄wan emi ekerede Mary, emi, nte ededi, etiede ke isọn̄ ke ukot Ọbọn̄ onyụn̄ akpan̄de utọn̄ okop ikọ esie. Edi, ediwak utom eke Martha an̄wanade ndinam ẹwọn̄ọde enye ntịn̄enyịn. Ntre, enye edi edidọhọ ete: ‘Ọbọn̄, nte afo ukereke emi eyeneka mi ọkpọn̄de utom ọnọ mi ikpọn̄? Dọhọ enye edi edin̄wam mi nan̄a.’ Ọbọn̄ ọbọrọ enye ete: ‘Martha, Martha, afo ayak ediwak n̄kpọ ẹtịmede fi esịt ye ekikere. Ibat ibat n̄kpọ, m̀mê n̄kpọ kiet kpọt, ke ẹyom. Amaedi Mary, enye ememek eti udeme, eke owo mîdibọhọ enye.’”—LUKE 10:38-42.

MARTHA ama esisịn ifịk anam utom. Anaedi mbon en̄wen ẹma ẹnen̄ede ẹma enye. Mme Jew eyo mme apostle ẹkebat ke n̄wan emi esinen̄erede anam n̄kpọ ke ufọk onyụn̄ ọfiọkde ndikama ufọk ekedi eti an̄wan.

Ẹma ẹteme Christian iban n̄ko ẹte “ẹtie ke ufọk ẹnam n̄kpọ.” (Titus 2:5) Edi mmọ ẹma ẹnyene akwa ifet ye utom en̄wen emi edide ndikpep mbon en̄wen mban̄a Ido Ukpono Christ. (Matthew 28:19, 20; Utom 2:18) Nso ikedi ndusụk ke  otu “ediwak utom” oro n̄wan Jew emi okodude uwem ke eyo mme apostle ekenyenede ndinam? Ndien nso ke ikeme ndikpep nto se Jesus eketịn̄de aban̄a Mary?

‘Ndinam Ediwak Utom’ Etie nte n̄wan Jew ekesitọn̄ọ ndinam n̄kpọ tụhi-tụhi, mbemiso eyo asiahade. (Mme N̄ke 31:15) Ama ọnọ ubon mfefere udia emi ẹdade ibokpot ẹnam, enye ekeme ndida nditọiren esie n̄kayak ke ufọkn̄wed ke synagogue. Nditọiban ẹditie ke ufọk ikpep mme usọ oro ẹdinamde mmọ ẹdi nti ibanndọ.

Eka ye nditọiban esie ẹyetọn̄ọ utom usen ke ndinam mme utomufọk—ndisịn aran ke utuenikan̄ (1), ndikpọri isọn̄ (2), ndinyịmi mmọn̄eba ke ebot mmọ (3). Ekem, ẹsan̄ uyo emi ẹditade usen oro. Nditọiban ẹyeken̄ mbio ẹsion̄o ke ibokpot (4), ndien ekem ẹda itiat ẹkọk ibokpot oro etie n̄kpata n̄kpata (5). Eka ayabuak mmọn̄ ye leaven ke ndomuyo oro. Onyụn̄ anuak (6) ndien ekem ayak enịm man ofụt, adaha akanam n̄kpọ en̄wen. Nditọiban ẹkeme ndida ini oro nyụt obufa mmọn̄eba ebot oro man ẹnam cheese (7).

Ekem, ke usenubọk oro, eka ye nditọiban emi ẹkeme ndika urua. Do, ufuọn̄ nsio nsio ndunịm ẹyetọ enye ke ibuo, okop uyom unam, ye uyom mbon udep emi ẹkpede urua; enye eyedep mme n̄kpọ oro mmọ ẹyomde usen oro (8). Ikọn̄udia ye nsatiyak ẹkeme ndisịne ke udia usen oro. Edieke enye ekedide Christian, enye ekeme ndida ifet oro n̄ko n̄kwọrọ ikọ nnọ mme owo ke urua.—Utom 17:17.

Eka emi enen̄erede ama n̄kpọ Abasi ayada mme utọ ifet oro mmọ ẹsan̄ade ẹka ẹnyụn̄ ẹnyọn̄de urua ekpep nditọ esie mme edumbet N̄wed Abasi. (Deuteronomy 6:6, 7) Enye ekeme ndikpep nditọ esie n̄ko mme edumbet oro ẹdin̄wamde mmọ ẹnyene usọ udep urua.—Mme N̄ke 31:14, 18.

Utomufọk en̄wen oro iban ẹkesinamde ekedi ndika obube mmọn̄ (9). Mmọ ẹma ẹsikoi mmọn̄ do ẹkedọn̄ ke n̄kpọ ke ufọk, onyụn̄ ekeme ndidi ẹma ẹsineme nneme ye iban en̄wen emi ẹtienede ẹkoi mmọn̄. Ẹma ẹto ẹdi, eka ye nditọiban oro ẹyesan̄ uyo. Mmọ ẹyebem iso ẹnam ndomuyo oro etie mbatmbat mbatmbat, ndien ekem ẹsịn ke usan̄uyo emi ẹma ẹkenanam ofiop (10), emi ekesiwakde ndidu ke an̄wa. Mmọ ẹyekop ufuọn̄ uyo oro ẹnyụn̄ ẹneme nneme ke adan̄aemi ẹtiede ẹse nte enye ebietde.

Ekem mmọ ẹyeka idịm man ẹkeyet ọfọn̄ (11). Iban emi ẹkenyene ndibem iso ntịn̄ enyịn nda suọp emi ẹdade ọtọn̄ ikọn̄ ẹnam nyet ọfọn̄. Ẹma ẹdarade ẹnyụn̄ ẹnyịmi  mmọn̄ ẹsio, mmọ ẹyen̄wan ọfọn̄ emi ke mbiet ye ke enyọn̄ itiat.

Ẹma ẹtan̄ ọfọn̄ emi ẹnyọn̄ ẹdi ufọk, eka ye nditọiban ẹkeme ndidọk ẹnyọn̄ mbatmbat ọkọm ufọk mmọ man ẹketie ẹkịm (12) ọfọn̄ ekededi oro akawahade mbemiso ẹtan̄de ẹkebon ke ubet. Ekem, ẹkeme ndikpep nditọ oro nte ẹsịnde fansi ke ọfọn̄ m̀mê nte ẹdọkde n̄kpọ (13). Ikebịghike, ini ama ekem nditem udia mbubreyo (14). Ukama isen ekedi ido mme owo eyo mme apostle, ntre ubon ama esiben̄e idem ndibuana udia mmọ emi ekedide uyo, ikọn̄udia, cheese, nsatiyak, ye mbịtmbịt mmọn̄ ye isenowo ekededi.

Ke ini nditọwọn̄ ẹyomde ndidụk idap, ekeme ndidi ẹma ẹsiyet mmọ aran ke unan oro ẹkedade ke edọn̄. Ekem ete ye eka ẹkeme nditie ke un̄wana ikan̄ emi ofụm emende ẹnọ mbụk N̄wed Abasi ẹnyụn̄ ẹbọn̄ akam ye nditọ mmọ. Ke ufọk ama okodobo, ebe oyokụt ke odot itịn̄ ikọ emi ẹtịmde ẹfiọk mi inọ n̄wan imọ, oro edi: “Anie edikụt enyene-ido an̄wan? N̄kọm ekọm-urua esie akan pearl anyan usụn̄.”—Mme N̄ke 31:10.

Ndimek “Eti Udeme” Ana in̄wan̄-in̄wan̄ ke nti iban emi ẹkedude uwem ke eyo mme apostle ẹma ẹsisịn ifịk ẹnam “ediwak utom.” (Luke 10:40) Kpasụk ntre, iban mfịn, akpan akpan eka nditọ, ẹnyene ekese ndinam. Mme ukwakutom eyomfịn ẹmenam ndusụk utomufọk ẹfere. Edi nte n̄kpọ ọsọn̄de iyakke ediwak eka nditọ ẹkama ufọk kpọt, edi anam mmọ ẹnam utom n̄ko.

Kpa ye ekese n̄kpọ oro mmọ ẹnyenede ndinam, ediwak iban mfịn emi ẹdide Christian ẹkpebe uwụtn̄kpọ Mary, emi iketịn̄de iban̄a ke ntọn̄ọ ibuotikọ emi. Mmọ ẹnen̄ede ẹma mme n̄kpọ eke spirit. (Matthew 5:3) Mmọ ẹnen̄ede ẹse ẹban̄a ubon mmọ, nte N̄wed Abasi etemede mmọ ete ẹnam. (Mme N̄ke 31:11-31) Mmọ ẹsinyụn̄ ẹda mme edumbet oro Jesus eketịn̄de ọnọ Martha ẹdu uwem. Sia Martha ekedide n̄wan emi akamade Abasi, enye ama anam item oro ẹkenọde enye do. Christian iban isiyakke mme utomufọk ẹbọ mmọ ifet ndikpep n̄kpọ mban̄a Abasi (15) m̀mê ndikwọrọ ikọ nnọ mme owo. (Matthew 24:14; Mme Hebrew 10:24, 25) Emi anam mmọ ẹmek “eti udeme.” (Luke 10:42) Emi anam Abasi, Christ, ye ubon mmọ ẹnen̄ede ẹma mmọ.—Mme N̄ke 18:22.