Mme Andikot N̄wed Nnyịn Ẹbụp Ẹte . . .

Ndi Abasi Enyene Ntọn̄ọ?

▪ Bible ọdọhọ ke Abasi inyeneke ntọn̄ọ. Abasi ododu kpukpru ini. Kpa ye oro mîn̄wan̄ake nnyịn nte Abasi odude ke nsinsi, nnyịn ikemeke ndidọhọ ke idịghe ntre sia mîn̄wan̄ake nnyịn.

Ndi enen̄ede owụt ifiọk ndikere ke imekeme ndifiọk ofụri usụn̄ Abasi? Apostle Paul ọkọdọhọ ete: “Inyene ye ọniọn̄ ye ifiọk Abasi ẹtụn̄ọ adan̄a didie! Mme ikpe esie ẹkak owo ndidụn̄ọde adan̄a didie onyụn̄ ayan̄a owo ndifiọk mme usụn̄ esie didie ntem!” (Rome 11:33) Nnyịn ikemeke ndinen̄ede mfiọk adan̄a nte ọniọn̄ ye ifiọk Abasi ẹtụn̄ọde, ukem nte nsekeyen mîkemeke ndifiọk kpukpru n̄kpọ mban̄a ete ye eka esie. Okposụkedi emi ikọ emi Paul akadade odudu spirit ewet mi enen̄erede aban̄a nte ọniọn̄ ye mbọm Abasi ẹnanade mbiet, emi owụt ke enyene mme n̄kpọ emi ẹban̄ade Jehovah Abasi ye nte enye esinamde n̄kpọ emi ẹtụn̄ọde ẹkan nnyịn ndifiọk. Kiet ke otu emi edi ke Abasi inyeneke ntọn̄ọ. Kpa ye oro, nnyịn imekeme ndinen̄ede mbuọt idem ke se Bible ekpepde aban̄a Abasi. Jesus Christ eketịn̄ ntem aban̄a ndisana uwetn̄kpọ ete: “Ikọ fo edi akpanikọ.”—John 17:17.

Moses ọkọdọhọ ke akam oro enye ọkọbọn̄de ọnọ Jehovah ete: “Afo odudu kpukpru ini, edinyụn̄ ododu kpukpru ini.” (Psalm 90:2, The Holy Bible, New Century Version) Ikọ Moses emi owụt ke Abasi odu ke n̄kan̄ mbiba. N̄kan̄ kiet edi ini iso. Jehovah edi “Enye emi odude uwem ke nsinsi nsinsi.” (Ediyarade 4:10) Ntem, Abasi edisụk ododu ke nsinsi nsinsi. N̄kan̄ eken aban̄a ini edem. Ke nditịn̄ ke usụn̄ efen, owo ikobotke-bot Abasi, enye inyụn̄ inyeneke ntọn̄ọ. Utu ke oro, Abasi ama ododu toto ko ke nsinsi.

N̄kpọ oro ẹkerede-kere isisọpke in̄wan̄a ata ediwak nnyịn. Edi enyene ndusụk n̄kpọ emi ẹsọn̄de ndifiọk emi nnyịn isinyịmede ndusụk ini, utọ nte edibat ibat n̄ka iso m̀mê edem. Ẹkeme ndibat ibat n̄ka iso m̀mê edem, edi utịt idụhe. Nte nnyịn ikemeke ndida uwụtn̄kpọ emi n̄kere mban̄a mme isua emi Andibot nnyịn odude?

Mmọdo, odot Abasi ikpọn̄ enyene san̄asan̄a udorienyịn̄ emi, “nsinsi Edidem.” (1 Timothy 1:17) Kere ban̄a emi ise: Jesus Christ, akwa udịm mme angel ke heaven, ye mme owo ke isọn̄ ẹnyene ntọn̄ọ sia ẹkebobot mmọ. (Colossae 1:15, 16) Edi idịghe ntre ye Abasi. Ndisọn̄ọ nyịre ke ana edi ẹkebobot Abasi anam owo enyene ikpîkpu ekikere oro mînyeneke ibuot aban̄a enye emi okobotde Andibot. Jehovah ikpọn̄ odu “to ke nsinsi sịm nsinsi.” (Psalm 90:2, The New American Bible) Ke ikọ en̄wen, Jehovah ododu “ke ofụri eyo.”—Jude 25.

Ti ete ke ndidọhọ ke Abasi odu ke nsinsi nsinsi iwọrọke ke emi edi ikpîkpu ekikere. Edieke itịmde idụn̄ọde akam oro Moses ọkọbọn̄de, iyokụt ke Abasi ndidu ke nsinsi nsinsi ọsọn̄ọ ima ima un̄wọn̄ọ oro enye ọn̄wọn̄ọde ndinọ nnyịn nsinsi uwem. Ke edide isio ye uwem ibio ini oro idude mfịn, ẹdọhọ ke Abasi edi “ebiet idụn̄ nnyịn ke ofụri emana.” Jehovah emi edide edima Ete ama esikere aban̄a ikọt esie, osụk ekekere aban̄a, oyonyụn̄ aka iso ekere aban̄a mmọ. Utịbe utịbe akpanikọ emi akpakam ọdọn̄ fi esịt!—Psalm 90:1.