Mme Andikot N̄wed Nnyịn Ẹbụp Ẹte . . .

Paradise emi Bible Etịn̄de Aban̄a Edidu ke M̀mọ̀n̄?

▪ Jesus ama ọn̄wọn̄ọ ọnọ ete oro okoyomde ndikpa, emi okowụtde ke imọbuọt idem ye enye, ete: “Afo oyodu ye ami ke Paradise.” (Luke 23:43) Ete oro edidu ke m̀mọ̀n̄? Ndi Paradise edidu ke heaven, ke isọn̄, m̀mê ke ebiet oro mme owo ẹkade ẹkedu ẹbet ikpe?

Akpa ete ye eka nnyịn ẹma ẹdu ke Paradise ini kiet ko. Bible ọdọhọ nnyịn ete: “Jehovah Abasi ọtọ in̄wan̄ ke Eden, ke edem usiahautịn, onyụn̄ emen owo emi enye okobotde ekesịn do. . . . Ndien Jehovah Abasi ada owo oro edisịn ke in̄wan̄ Eden ete ọdiọn̄ onyụn̄ ekpeme enye.” (Genesis 2:8, 15) Ke ini ẹkekabarede ikọ oro ẹsịn ke usem Greek, ẹkekabade ikọ oro “in̄wan̄” nte pa·raʹdei·sos, emi ẹdade Ikọmbakara oro “paradise” ẹto.

Kpasụk nte ebe ye n̄wan ẹdinamde ufọk mmọ afiak okpon ke ini ẹnyenede ediwak nditọ, ntre ke akana akpa ete ye eka nnyịn ẹtat Paradise ẹbe adan̄a In̄wan̄ Eden nte mme owo ẹkekade iso ẹwak. Abasi ọkọdọhọ mmọ ete: “Ẹyọhọ ke isọn̄ ẹnyụn̄ ẹkan enye.”—Genesis 1:28.

Andibot nnyịn okoyom mme owo ẹdụn̄ ẹnyụn̄ ẹnyene nditọ ke Paradise mi ke isọn̄. Mmọ ẹkpekedụn̄ ke nsinsi ke in̄wan̄ oro ikpokonyụn̄ ikpaha. Isọn̄ ekpekedi ebietidụn̄ ubonowo ke nsinsi. Ntak edi oro mme n̄kpọ emi ẹdude ke ekondo nnyịn ẹsinemde nnyịn esịt! Ẹkebot nnyịn man idụn̄ ke ediye isọn̄.

Ndi uduak Abasi okpụhọde? Ihih, ikpụhọkede. Jehovah ọn̄wọn̄ọ ọnọ nnyịn ete: “Kpasụk ntre ke ikọ mi emi ọwọrọde mi ke inua editie. Enye idifiakke itiene mi ubọk ubọk, edi ayanam se mmade.” (Isaiah 55:11) Ke se ibede isua 3,000 tọn̄ọ nte Abasi okobot owo, Bible ama etịn̄ aban̄a “Andibot isọn̄ ye Andinam enye,” ete ke enye ‘ikobotke isọn̄ ke ikpîkpu, edi okobot enye man ẹdụn̄ ke esịt.’ (Isaiah 45:18) Uduak Abasi ikpụhọkede. Isọn̄ ayafiak edi Paradise.

Enem ndifiọk nte ke ediwak itie Bible ẹban̄ade Paradise ẹtịn̄ ẹban̄a nte uwem etiede ke isọn̄. Ke uwụtn̄kpọ, ntịn̄nnịm ikọ Isaiah kiet ọdọhọ ete: “Mmọ ẹyebọp ufọk ẹnyụn̄ ẹdụn̄ ke esịt; mmọ ẹyenyụn̄ ẹtọ in̄wan̄ vine ẹnyụn̄ ẹdia mbun̄wụm mmọ.” (Isaiah 65:21) M̀mọ̀n̄ ke ẹsibọp ufọk ẹnyụn̄ ẹtọ in̄wan̄ vine? M̀mọ̀n̄ ke ẹsidia mbun̄wụm? Mi ke isọn̄. Mme N̄ke 2:21 etịn̄ in̄wan̄-in̄wan̄ ete: “Ndinen owo ẹyedụn̄ ke isọn̄.”

Jesus n̄ko ama etịn̄ aban̄a Paradise isọn̄. Edi akpanikọ nte ke enye ama ọdọhọ ke paradise eke heaven oyodu n̄ko, edi ibat ibat owo ẹdika do. (Luke 12:32) Ke ini mmọ ẹkpade, ẹnam mmọ ẹset ẹka paradise eke heaven man ẹkediana ye Christ ẹnyụn̄ ẹkara paradise eke isọn̄. (Ediyarade 5:10; 14:1-3) Mme anditiene n̄kara ke heaven emi ẹyekụt nte ke ẹtịm ẹkara ẹnyụn̄ ẹse ẹban̄a paradise eke isọn̄ nte Abasi oyomde.

Jesus ama ọfiọk ke se Abasi akaduakde aban̄a isọn̄ edi emi. N̄kọ enye ama odu ke heaven ye Ete esie ke ini ẹkenamde In̄wan̄ Eden. Kpukpru mbon oro ẹnyenede mbuọtidem mfịn ẹkeme ndidu uwem ke paradise eke isọn̄ ke ini iso. (John 3:16) Jesus ọn̄wọn̄ọ ọnọ utọ mbon oro ete: “Afo oyodu ye ami ke Paradise.”—Luke 23:43.

[Ebiet ẹdade ndise ẹto ke page 25]

© FORGET Patrick/SAGAPHOTO.COM/Alamy