Eti Mbụk Oro Ẹnọde Mme Ubuene

IKỌ ABASI ọnọ nnyịn nsọn̄ọ ete: “Owo [idifreke] mme ubuene kpukpru ini.” (Psalm 9:18) Kop n̄ko se Bible etịn̄de aban̄a Andibot: “Afo amatat ubọk fo onyụn̄ oyụhọ udọn̄ kpukpru mme odu-uwem n̄kpọ.” (Psalm 145:16) Se Bible etịn̄de emi idịghe n̄kpọ ndap. Ata Ọkpọsọn̄ Abasi enyene odudu ndinam se anade ẹnam man ẹtre ubuene. Nso idi oro?

Eyen Africa kiet emi ekpepde n̄kpọ aban̄a uforo obio ọdọhọ ke mme idụt emi ẹbuenede ẹyom “okopodudu andikara emi ọfọnde ido.” Ikọ esie ọwọrọ ke okopodudu andikara emi ọfọnde ido kpọt ekeme nditre ubuene. Imekeme ndidian do n̄ko nte ke ana andikara emi akara ofụri ererimbot man enye ekeme nditre se isinamde ndusụk idụt ẹnen̄ede ẹbuene—oro edi, idụt kiet ndinyene n̄kpọ emi mmọ eken mînyeneke. Ke adianade do, ana andikara emi ekemede nditre ubuene ekeme n̄ko nditre ata akpan n̄kpọ emi adade ubuene edi, oro edi, ibụk. Nnyịn idida m̀mọ̀n̄ utọ andikara oro?

Abasi ama ọdọn̄ Jesus ada eti mbụk ọsọk mme ubuene. Ke ini Jesus akadahade ada okot n̄wed Isaiah ndiwụt se Abasi ọkọdọn̄de imọ, enye ọkọdọhọ ete: “Spirit Jehovah odoro mi ke idem, koro enye ama eyet mi aran enịm ete ntan̄a eti mbụk nnọ mme ubuene.”—Luke 4:16-18.

Nso Idi Eti Mbụk Emi?

Abasi emek Jesus Edidem. Ata eti mbụk edi emi! Enye edi nnennen Andikara emi editrede ubuene koro (1) enye edikara ofụri isọn̄ ndien enye enen̄ede enyene odudu; (2) enye esitua mme ubuene mbọm onyụn̄ ekpep mme anditiene enye ndin̄wam mmọ; ndien (3) enye ekeme ndisio ata akpan n̄kpọ emi adade ubuene edi, kpa ibụk emi ikadade-da imana. Ẹyak idụn̄ọde n̄kpọ ita emi ẹsịnede ke eti mbụk emi.

1. Jesus enyene odudu ndikara ofụri isọn̄: Ikọ Abasi etịn̄ ntem aban̄a Jesus ete: “Ẹnọ enye ukara . . . ẹte kpukpru owo ye mme idụt ye usem ẹnam n̄kpọ ẹnọ enye.” (Daniel 7:14) Ndi ọmọdiọn̄ọ ufọn emi ididiade ke ini idinyenede ukara kiet kpọt ke ofụri isọn̄? Owo idisin̄wanake en̄wan isọn̄ aba ke ntak aranisọn̄ ye mme n̄kpọ ntre. Owo iditụkke owo ndomokiet. Jesus ke idemesie ama ọdọhọ ke Abasi ọnọ imọ odudu ndikara ofụri isọn̄. Enye ọkọdọhọ ete: “Ẹnọ mi ofụri odudu ke heaven ye ke isọn̄.”—Matthew 28:18.

2. Jesus ama esitua mme ubuene mbọm: Jesus ama esitua mme ubuene mbọm ofụri ini oro enye akanamde utom Abasi ke isọn̄. Ke uwụtn̄kpọ, mma kiet oro ama akabiat kpukpru se enye ekenyenede ada ọsọbọ idem ama otụk ọfọn̄idem Jesus man okop nsọn̄idem. Enye ọkọdọn̄ọ uwọrọiyịp ke ofụri isua 12 ndien enyene ndidi iyịp ama ekpere ndikụre enye ke idem. Ibet ọkọdọhọ ke owo ekededi emi enye otụkde edehe. Edi Jesus ama okop enye mbọm onyụn̄ ọdọhọ enye ete: “Eyenan̄wan, mbuọtidem fo amanam idem ọsọn̄ fi. Nyọn̄ ke emem, bọhọ idiọk udọn̄ọ fo nyụn̄ kop nsọn̄idem.”—Mark 5:25-34.

Se Jesus ekekpepde ama anam mme owo ẹkpụhọde ẹnyụn̄ ẹtọn̄ọ nditua ekemmọ owo mbọm. Ke uwụtn̄kpọ, idịghe emeti se Jesus ọkọbọrọde ọbọn̄ oro okoyomde ndifiọk se ikpanamde man Abasi enem esịt. Enye ama ọfiọk ke Abasi oyom nnyịn ima mbọhọidụn̄ nnyịn, edi enye ama obụp Jesus ete: “Anie edi mbọhọidụn̄ mi nan̄a?”

Jesus ọkọbọrọ mbụme emi ke ndinọ ọwọrọetop mbụk emi aban̄ade owo emi okotode Jerusalem aka Jericho, emi mbon n̄wo ẹkewode ẹnyụn̄ ẹtịm ẹkpere ndiwot. Oku ama edisan̄a ebe aka mbubehe esie, in̄wamke enye. Eyen  Levi onyụn̄ anam kpa ntre. “Edi owo Samaria kiet emi asan̄ade ke usụn̄ oro edisịm ebiet emi enye odude, okụt enye, mbọm onyụn̄ anam enye.” Ntre enye asan̄a ekpere, ọkwọhọde iyịp ke enyịn unan owo oro, ada enye aka ufọkisen onyụn̄ ekpe enyene ufọkisen oro okụk ete ese aban̄a enye. Jesus ama obụp ọbọn̄ oro ete: “‘Anie . . . ke afo ekere ke edi mbọhọidụn̄ owo emi ọkọduọde ke ubọk mbon n̄wo?’ Enye ọbọrọ ete: ‘Owo emi akatuade enye mbọm.’ Jesus ndien ọdọhọ enye ete: ‘Afo ka kanam kpasụk ntre.’”—Luke 10:25-37.

Utọ ukpepn̄kpọ Jesus emi ke Mme Ntiense Jehovah ẹsikpep, ndien emi esinam mmọ ẹfọn ido ẹnyụn̄ ẹn̄wam mme owo. Ke uwụtn̄kpọ, mma kiet ke Latvia ama etịn̄ ke n̄wed esie emi Women in Soviet Prisons nte idem ọkọdiọkde imọ ke ini ikanamde utom ke ufọk-n̄kpọkọbi Potma ke ufọt ufọt iduọk isua 1960. Enye ọdọhọ ete: “[Mme Ntiense Jehovah] ẹma ẹnen̄ede ẹse mi enyịn ke ofụri ini oro n̄kọdọn̄ọde. Idụhe mbon emi ẹkpesede mi enyịn ntre.” Enye ama ọdọhọ n̄ko ete: “Mme Ntiense Jehovah ẹkeda nte utom mmimọ ndin̄wam kpukpru owo, inamke n̄kpọ m̀mê ewe ido ukpono ke owo esika, m̀mê enye onyụn̄ oto m̀mọ̀n̄.”

Ke ini n̄kpọ ekenen̄erede ọsọn̄ ke Ancón ke Ecuador tutu ndusụk Mme Ntiense Jehovah inyeneke aba utom, Mme Ntiense eken ẹma ẹbiere se idinamde man in̄wam mmọ. Mmọ ẹma ẹsitem udia ẹnyam ẹnọ mme ọkọiyak oro ẹkenyọn̄de ọkọ okoneyo (se ndise ke ubọk nnasia). Kpukpru owo, idem ye nditọwọn̄, ke esop Mme Ntiense Jehovah ẹkenam emi. Mmọ ẹma ẹsibak ẹdemede ke n̄kanika kiet okoneyo kpukpru usen ẹtem udia man ẹkpenyam ẹnọ mme ọkọiyak ke n̄kanika inan̄ usiere oro mmọ ẹdibehede. Ekem ẹdeme okụk emi ẹnọ Mme Ntiense kiet kiet nte ekemde ye mfịna mmọ.

Utọ n̄kpọ emi owụt ke se Jesus akanamde onyụn̄ ekpepde enen̄ede ekeme ndikpụhọde mme owo nnyụn̄ nnam mmọ ẹn̄wam ekemmọ owo.

3. Jesus enyene odudu ndisio idiọkn̄kpọ oro ikadade imana ke esịt nnyịn mfep: Kpukpru owo ẹfiọk ke idiọkitọn̄ esesịne owo ke idem. Bible ọdọhọ ke idiọkitọn̄ edi idiọkn̄kpọ. Idem apostle Paul ekewet ete: “N̄kụt, ndien, ibet emi mban̄a idem mi: nte ke ini nyomde ndinam se inende, se idiọkde odu ye ami.” Ekem enye ama adian do ete: “Anie edinyan̄a mi osio ke ikpọkidem n̄kpa emi? Mmọkọm Abasi ke Jesus Christ Ọbọn̄ nnyịn!” (Rome 7:21-25) Mi, Paul eketịn̄ nte Abasi edidade Jesus isio mbon oro ẹkponode imọ ke esịt akpanikọ ke ufụn idiọkn̄kpọ oro mmọ ẹkedade-da ẹmana, ndien ibụk emi edide ntak ubuene esịne do. Emi edisan̄a didie etịbe?

John Andinịm Owo Baptism ọkọdọhọ mme owo esisịt ini ke Jesus ama akana baptism ete: “Sese, Eyenerọn̄ Abasi oro emende idiọkn̄kpọ ererimbot efep!” (John 1:29) Ibịghike, n̄kukụre mbon oro ẹdidude ke isọn̄ edidi mbon oro ẹsiode ke ufụn idiọkn̄kpọ oro mmọ ẹkedade-da ẹmana, ndien emi esịne ibụk. (Isaiah 11:9) Ntre ke Jesus edisio se isidade ubuene idi ke isọn̄ emi.

Enem didie ntem ndikere nte n̄kpọ editiede ke ini kpukpru owo ẹdinyenede se mmọ ẹyomde! Ikọ Abasi ọdọhọ ete: “Mmọ ẹyetie ke idak vine mmọ ye ke idak eto fig mmọ, ndien ididụhe owo eke edinamde mmọ ẹdịghe.” (Micah 4:4) Ikọ itien̄wed emi aban̄a ererimbot emi Jehovah edikụtde ete ke owo ndomokiet ibueneke, ini emi kpukpru owo ẹdinyenede eti utom oro ọnọde mmọ inemesịt, ikopke ndịk m̀mê ẹmọn̄ ẹsio mmimọ ke utom.