4 Abasi Inamke N̄kpọ Ọfọn​—Ndi Emi Edi Akpanikọ?

Ekeme ndidi emesikop ẹdọhọde ẹte: “Abasi akara ererimbot emi; kpukpru se itịbede ke ererimbot ẹdi uduak esie. Sia ererimbot emi ọyọhọde ye asari ye idiọkido ye ufịk, ọwọrọ ke Abasi edi ntak ofụri mfịna ererimbot.”

Se Bible Ekpepde: Idịghe Jehovah Abasi edi ntak mfịna ererimbot emi. Bible ọdọhọ ke “utom esie ọfọn ama, koro kpukpru usụn̄ esie ẹnende.” —Deuteronomy 32:4.

Abasi ọfọfọn ye kpukpru owo, idem ye mme idiọkowo. Ke uwụtn̄kpọ, “enye [esinam] utịn esie asiaha ọnọ mme idiọkowo ye nti owo onyụn̄ [anam] edịm edep ọnọ ndinen owo ye mme anam ukwan̄ido.” (Matthew 5:45) N̄wed Utom 10:34, 35 owụt ke enye ọfọfọn ye kpukpru owo, isarike owo ndomokiet. Itien̄wed oro ọdọhọ ete: “Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.”

Anie ndien idi ntak mfịna ererimbot emi? Ediwak owo ẹma ndinam idiọk, imaha ndikpebe Abasi emi esinamde eti n̄kpọ kpukpru ini. (Deuteronomy 32:5) Bible owụt n̄ko ke Abasi ayak Devil emi edide asua esie akara ererimbot emi. * (1 John 5:19) Edi, Abasi ọmọn̄ ọsọsọp emen idiọk ukara Satan emi efep. Enye ananam ndutịm “man abiat utom Devil.”—1 John 3:8.

Nte ndifiọk akpanikọ an̄wamde nnyịn: Anaedi ibuot esiyon̄ fi ndikop ndiọi mbụk aban̄ade n̄wo, utụk, ye ufịk kpukpru usen. Ndifiọk ntak mfịna ererimbot emi ayanam okụt ntak emi n̄kpọ ọdiọkde ntem ke ererimbot onyụn̄ okụt ntak emi ofụri ukeme oro mme owo ẹsịnde ndinam ererimbot emi ọfọn esiwọrọde ikpîkpu. (Psalm 146:3) Utu ke ndibiat ini ndomo ndinam ukpụhọde emi mûdukemeke ke ererimbot emi, afo akpakam odori enyịn ke se Abasi ọn̄wọn̄ọde ndinam ke ini iso.—Ediyarade 21:3, 4.

Ndifiọk ntak mfịna ererimbot emi ekeme ndinen̄ede n̄n̄wam fi ke ini ukụt. Ke ini ẹnamde n̄kpọ ye nnyịn ke idiọk usụn̄, nnyịn imekeme ndiseme nte prọfet Habakkuk ekesemede ete: “Ibet omokpu, unenikpe inyụn̄ idụhe.” (Habakkuk 1:4) Abasi ikasuaha inọ prọfet emi ke ndiketịn̄ ikọ ntem. Utu ke oro, Abasi akakam ọsọsọn̄ọ enye idem ete ke imọ iyenen̄ede mme n̄kpọ ke edikem ini onyụn̄ anam enye okop idatesịt kpa ye afanikọn̄ emi enye okosobode. (Habakkuk 2:2-4; 3:17, 18) Kpasụk ntre, ndinịm ke Abasi oyosio idiọkn̄kpọ efep ke ererimbot emi nte enye ọn̄wọn̄ọde ekeme ndinam esịt fo ana sụn̄-n̄ ke idiọk ererimbot emi.

[Ikọ Idakisọn̄]

[Se ẹwetde ke ikpọ abisi ke page 7]

Ndi Abasi enen̄ede edi ntak ufen ye ufịk ke ererimbot emi?

[Ebiet Ẹdade Ndise Ẹto ke page 7]

© Sven Torfinn/Panos Pictures