Anie Ekedi Abraham?
Anie Ekedi Abraham?
IWAKKE owo emi ẹnen̄erede ẹdiọn̄ọ ke nsio nsio ido ukpono nte Abraham. * Mme Jew, mme Muslim, ye mme Christian ẹnen̄ede ẹkpono Abraham tutu mme owo ẹkot enye “ata akpan owo ke N̄wed Abasi” ye “ata uwụtn̄kpọ mbuọtidem.” Bible okot enye, “ete kpukpru mmọ oro ẹnyenede mbuọtidem.”—Rome 4:11.
Nso inam ẹnen̄ede ẹkpono Abraham ntem? Akpan ntak kiet edi ke enye ikpọn̄ ke Bible okot ufan Abasi.—Isaiah 41:8; James 2:23.
Edi Abraham ekedi owo nte nnyịn. Enye ama osobo ndusụk mfịna emi nnyịn isisobode, onyụn̄ ọyọ mmọ. Ndi akpama ndidiọn̄ọ nte enye akasan̄ade anam emi? Kop se Bible etịn̄de aban̄a enye mi.
Ebiet Emi Enye Okotode
Enye akamana ke isua 2018 M.E.N., onyụn̄ okpon ke Ur. (Genesis 11:27-31) Ur ekedi akwa obio emi ẹnyenede n̄kpọ etieti. Edi ukpono ndem ama okpon do n̄ko. Anaedi Terah ete Abraham ama etiene mbon obio emi okpono ndem. (Joshua 24:2) Abraham okokpono Jehovah * ikpọn̄-ikpọn̄, enye ikokponoke mme abasi ubọkowo.
Nso ikanam Abraham okûtiene okpono ndem obio mmọ? Abraham ama odu uwem okụt Shem eyen Noah ke n̄kpọ nte isua 150 mbemiso Shem akpade. Edieke edide enye ama anam ufan ye Shem emi edide ama enen̄ede ọsọn̄ọ enye, didie ke oro akan̄wam enye? Anaedi Shem ama anam enye ọfiọk nte mmimọ ikasan̄ade ibọhọ Ukwọ. Enyene ndidi enye ama onyụn̄ ekpep ufọn edituak ibuot nnọ Jehovah, kpa Abasi emi akanamde Shem ye ufọk mmọ ẹbọhọ Ukwọ.
Nnyịn ifiọkke m̀mê Shem m̀mê owo en̄wen ekekpep Abraham n̄kpọ aban̄a Abasi. Edi se ifiọkde edi ke Abraham ama ada se enye ekekpepde aban̄a ata Abasi odu uwem. Ke ini Jehovah emi edide “andidụn̄ọde esịt” okokụtde ukeme oro Abraham esịnde ndikpono imọ, enye ama an̄wam enye ọdọdiọn̄ anam emi.—Mme N̄ke 17:3; 2 Chronicle 16:9.
Uwem Abraham
Abraham ama okop inem uwem onyụn̄ odu uwem ebịghi kpa ye oro mîkesimemke inọ enye ndusụk ini. Ẹyak ise ndusụk n̄kpọ emi ẹketịbede ẹnọ Abraham.
▪ Abasi ama ọdọhọ Abraham ọkpọn̄ Ur—obio emana esie—aka obio emi imọ idiwụtde enye. Okposụkedi emi Abraham ye Sarah mîkọfiọkke ebiet emi Abasi ọdọhọde mmọ ẹka ye ntak emi Abasi ọdọhọde mmọ ẹka do, mmọ ẹma ẹnam se Abasi ọkọdọhọde. Abraham ye Sarah ẹma ẹka ẹkedụn̄ọ ke tent ke ofụri eyo uwem mmọ nte isenowo ke obio Canaan.—Utom 7:2, 3; Mme Hebrew 11:8, 9, 13.
▪ Ke ini Sarah mîkamanke kan̄a eyen inọ Abraham, Jehovah ama ọn̄wọn̄ọ ke iyanam Abraham akabade akamba idụt onyụn̄ ọdọhọ ke iyọdiọn̄ ofụri ubonowo ke ntak Abraham. (Genesis 11:30; 12:1-3) Jehovah ama afiak ọsọn̄ọ un̄wọn̄ọ oro. Enye ama ọdọhọ Abraham ke nditọ esie ẹyewak nte ntantaọfiọn̄ ke ikpaenyọn̄.—Genesis 15:5, 6.
▪ Ke ini Abraham ekedide isua 99, Sarah onyụn̄ edi 90, Jehovah ama ọn̄wọn̄ọ ke iyanam mmọ ẹnyene eyeneren. Utọ n̄kpọ oro eketie nte se mîkemeke nditịbe, edi Abraham ye Sarah ẹma ẹdifiọk ke ‘idụhe se isọn̄de ikan Jehovah.’ (Genesis 18:14) Ke Abraham ama ọkọyọhọ isua 100, enye ama obon eyeneren, onyụn̄ osio enye Isaac. (Genesis 17:21; 21:1-5) Abasi ama ọn̄wọn̄ọ do nnennen nnennen ete ke ubon Isaac edida edidiọn̄ isọk ubonowo.
▪ Edi ke ediwak isua ẹma ẹkebe, Jehovah ama ọdọhọ Abraham anam ata esen esen n̄kpọ, oro edi, awa Isaac edima eyen esie emi mîkọdọhọ kan̄a n̄wan inyụn̄ inyene nditọ. * Kpa ye emi enyenede ndidi ama enen̄ede abiak Abraham ndifiọk ke imọn̄ itaba edima eyen imọ, enye ama eben̄e idem ndiwa Isaac nte Abasi ọkọdọhọde. Abraham ama enen̄ede enịm ke edieke iwotde Isaac, ke Abasi ekeme ndinam enye eset man un̄wọn̄ọ Esie osu. (Mme Hebrew 11:19) Edi ke ndondo oro Abraham ekemenerede ubọk oyom ndiwot eyen esie, Abasi ama akpan enye, onyụn̄ anyan̄a Isaac. Abasi ama otoro Abraham ke n̄wọrọnda n̄kopitem esie. Do ke Jehovah akafiak eti Abraham se ikọn̄wọn̄ọde inọ enye.—Genesis 22:1-18.
▪ Abraham ama akpa ke ama ekesịm isua 175. Bible ọdọhọ ke enye ‘ama ọsọn̄ onyụn̄ oyụhọ usen.’ (Genesis 25:7, 8) Abraham ama okụt nte un̄wọn̄ọ efen emi Abasi ọkọn̄wọn̄ọde ọnọ enye osude—oro edi, ndinam enye odu uwem ebịghi onyụn̄ akpa ke emem.—Genesis 15:15.
Se Ẹdade Ẹti Enye
Abraham idịghe owo emi ẹsitịn̄de ẹban̄a ke mme ido ukpono ye ke mbụkeset kpọt, enye akam edi owo emi ikemede ndikpep ekese nto. (Mme Hebrew 11:8-10, 17-19) Ẹyak ise nti edu inan̄ ke otu mme edu oro Abraham ekenyenede, edi iyom nditọn̄ọ ye enye emi mme owo ẹnen̄erede ẹdiọn̄ọ—oro edi, mbuọtidem.
[Mme Ikọ Idakisọn̄]
^ ikp. 2 Abraham ekesikere Abram ndien n̄wan esie ekere Sarai. Edi Abasi ama okpụhọ mmọ enyịn̄, okot Abram, Abraham, emi ọwọrọde “Ete ediwak idụt,” onyụn̄ okot Sarai, Sarah, emi ọwọrọde “Ọbọn̄ an̄wan.” (Genesis 17:5, 15) Edi man nneme emi ediniọn̄ akaha, idikot mmọ Abraham ye Sarah ke ibuotikọ emi.
^ ikp. 6 Bible ọdọhọ ke Abasi ekere Jehovah.
^ ikp. 14 Mbọk kot “Mme Andikot N̄wed Nnyịn Ẹbụp Ẹte . . . Ntak Emi Abasi Ọkọdọhọde Abraham Awa Eyen Esie?” ke page 23 ke magazine emi.
[Ekebe ke page 4]
Ata Akpan Owo ke Bible
Akpa ibuot duop ke Genesis etịn̄ n̄kpọ aban̄a ediwak mbon oro ẹkebuọtde idem ke Abasi, emi esịnede Abel, Enoch, ye Noah. Edi ibuot 11 esịm 25 enen̄ede etịn̄ aban̄a owo kiet kpọt—oro edi, Abraham.
Ke adianade do, ke mbụk Abraham ke ẹbem iso ẹsiak ndusụk ọkpọikọ Bible. Ke uwụtn̄kpọ, . . .
▪ akpa ini oro Bible okotde Abasi Otuekọn̄, m̀mê Andikpeme, mme asan̄autom esie edi ke mbụk Abraham.—Genesis 15:1; kot Deuteronomy 33:29; Psalm 115:9; Mme N̄ke 30:5.
▪ akpa ini oro Bible etịn̄de n̄kpọ aban̄a edibuọt idem ke Abasi edi ke mbụk Abraham.—Genesis 15:6.
▪ akpa ini oro Bible etịn̄de n̄kpọ aban̄a prọfet edi kpa ke mbụk Abraham.—Genesis 20:7.
▪ akpa ini oro Bible etịn̄de n̄kpọ aban̄a ima emi ete amade eyen edi n̄ko ke mbụk Abraham.—Genesis 22:2.
