Mme Owo Ẹdọhọ ke Armageddon Edi Nso?

“Ndien ẹtan̄ mmọ ẹbon ọtọkiet ke ebiet emi ẹkotde ke usem Hebrew, ete, Har–Magedon.”—EDIYARADE 16:16.

NSO ke esikere ke ini okopde ikọ oro, “Har–Magedon” m̀mê Armageddon? Anaedi esikere ke enye onyụn̄ etie nte unyekisọn̄ m̀mê ukwọ m̀mê mme unọmọ ntre. Okposụkedi emi ikọ emi odude ebiet kiet kpọt ke ofụri Bible, mme ọkọmbụk n̄kpọntịbe ye mme adaiso ido ukpono ẹsiwak nditịn̄ mban̄a Armageddon.

Ndi se mme owo ẹtịn̄de ẹban̄a Armageddon ẹkem ye se Bible ekpepde? Oyom idiọn̄ọ ibọrọ mbụme emi. Ntak-a? Koro edieke ọfiọkde se Armageddon edide, ududụhe uwem ke ndịk, edi eyenyene idotenyịn, onyụn̄ ọfiọk orụk owo emi Abasi edide.

Ọfọn, yak ibọrọ mbụme ita oro iyomde ndibụp mi inyụn̄ ise se ediwak owo ẹtịn̄de ẹban̄a Armageddon ye se Bible enen̄erede ekpep.

  1. NDI ARMAGEDDON EDI NSOBO UBỌKOWO?

Mme ọkọmbụk n̄kpọntịbe ye ndusụk ntaifiọk ẹsiwak ndikot nsobo ekededi emi owo edide ntak, “Armageddon.” Ke uwụtn̄kpọ, ẹsiwak ndikot akpa ye udiana ekọn̄ ererimbot “Armageddon.” Ke ẹma ẹken̄wana akpa ye udiana ekọn̄ ererimbot ẹma, ediwak owo ẹma ẹtọn̄ọ ndikere m̀mê United States ẹyekam ẹkeduọk bọmb usen kiet ke Soviet Union, ndusụk ẹkere m̀mê Soviet Union ẹdikam ikọduọk ke United States. Mme ọkọmbụk n̄kpọntịbe ẹkekot emi “Armageddon.” Mfịn, ntaifiọk ẹdọhọ ke nte ẹbiatde isọn̄ ekeme ndinam isọn̄ enen̄ede ofiop m̀mê ebịt akaha tutu idịghe aba se ẹdụn̄de. Mmọ ẹkot emi n̄ko “Armageddon.”

Se ikọ mmọ ọwọrọde: Ikọ mmọ ọwọrọ ke se iditịbede inọ isọn̄ emi ye kpukpru se idude ke esịt esịne owo ke ubọk. Edieke ukara mîsọpke-sọp inam n̄kpọ, ọwọrọ ke isọn̄ emi ayabiara tutu idịghe aba se ẹdụn̄de.

Se Bible ekpepde: Abasi idiyakke mme owo ẹsobo isọn̄ emi. Bible ọdọhọ ke Jehovah * ikobotde isọn̄ ‘ke ikpîkpu, edi ke okobot man ẹdụn̄ ke esịt.’ (Isaiah 45:18) Ntre, utu ke ndiyak mme owo ẹsobo isọn̄ emi, Abasi akam adaduak ndisobo “mbon oro ẹbiatde isọn̄” emi.—Ediyarade 11:18.

2. NDI ARMAGEDDON ONYỤN̄ ETIE NTE UNYEKISỌN̄ M̀MÊ UKWỌ?

Ndusụk ini, unyekisọn̄ m̀mê ukwọ m̀mê mme unọmọ ntre ẹma ẹtịbe, mme ọkọmbụk n̄kpọntịbe ẹsidọhọ ke “Armageddon” edi oro. Ke uwụtn̄kpọ, ke ini akwa unyekisọn̄ ọkọnọmọde Haiti ke 2010, ọkọmbụk n̄kpọntịbe kiet ọkọdọhọ ke “‘Armageddon’ etịbe ke Haiti.” Mme ọkọmbụk n̄kpọntịbe ye mme osio fim ẹkere n̄ko ke Armageddon edi akwa nsobo oro editịbede ke ini iso. Ke uwụtn̄kpọ, mmọ ẹkere ke usen kiet usen kiet, ke ikpọ itiat ke enyọn̄, emi ndusụk ẹkponide nte tọn̄ọ ke obio Efịk sịm Lagos, ẹyeduọ ẹtọ isọn̄ emi ẹwụri, ndien se mmọ ẹkotde “Armageddon” edi oro.

Se ikọ mmọ ọwọrọde: Ikọ mmọ ọwọrọ ke Armageddon onyụn̄ etie nte unyekisọn̄ m̀mê ukwọ m̀mê mme unọmọ ntre emi ẹkemede nditịbe ini kiet ekededi nnyụn̄ n̄wot mme owo ntịme ntịme. N̄ko ke inyeneke se owo ndomokiet ekemede ndinam nnyan̄a idem.

Se Bible ekpepde: Bible idọhọke ke Armageddon etie nte unyekisọn̄ m̀mê ukwọ m̀mê mme unọmọ ntre emi owotde mme owo ntịme ntịme. Utu ke oro, Bible ọdọhọ ke ndiọi owo kpọt ke ẹdisobo ke Armageddon. Psalm 37:10 ọsọn̄ọ emi ete: “Ayak esisịt, idiọkowo ididụhe aba; afo oyonyụn̄ etịn̄ enyịn ke ebiet esie, ndien enye ididụhe.”

3. NDI ABASI OYOSOBO ISỌN̄ EMI KE ARMAGEDDON?

Ediwak ido ukpono ẹdọhọ ke usen kiet usen kiet, ke Jesus ayasan̄a ye mme angel Abasi edin̄wana ye Satan ye mme demon esie, onyụn̄ osobo isọn̄ emi. Mbon itieutom kiet emi ẹsinamde ndụn̄ọde ke United  States ẹma ẹsan̄a ẹbụp se mme owo ẹkerede ẹban̄a Armageddon, ndien n̄kpọ nte owo 4 ke otu kpukpru owo 10 ẹkedọhọ ke ẹyesobo ererimbot emi “ke ekọn̄ Armageddon.”

Se ikọ mmọ ọwọrọde: Ikọ mmọ ọwọrọ ke Abasi ikoyomke isọn̄ emi odu ke nsinsi, ikonyụn̄ iyomke owo odụn̄ ke esịt ke nsinsi, edi ke enye okoyom owo odụn̄ isua ifan̄ ekem akpa.

Se Bible ekpepde: Bible etịn̄ in̄wan̄-in̄wan̄ nte ke Abasi ama “owụk isọn̄ ke itie esie,” ke enye “idisehekede tutu amama, m̀mê ke nsinsi.” (Psalm 104:5) Bible ọdọhọ n̄ko ke “ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29.

Omokụt do ke Bible inyịmeke ye se ediwak owo ẹtịn̄de ẹban̄a Armageddon. Nso ndien idi Armageddon?

[Ikọ Idakisọn̄]