Kpep Nditọ Fo

Idiọkitọn̄ Anam Gehazi Edue Abasi

NDI akanam emenen̄ede oyom n̄kpọ?— * Edieke edide ntre, ọwọrọ onyụn̄ etie nte ediwak owo. Edi ndi ekpenyene ndisu nsu man enyene se oyomde?— Ihih. Owo emi anamde utọ n̄kpọ emi edi owo idiọkitọn̄. Ẹyak ise nte idiọkitọn̄ akanamde Gehazi edue Abasi. Gehazi ekedi asan̄autom Elisha, prọfet Jehovah Abasi.

Elisha ye Gehazi ẹkedu uwem n̄kpọ nte tọsịn isua kiet mbemiso Eyen Abasi edide isọn̄. Jehovah ama ada Elisha anam ikpọ utịben̄kpọ. Ke uwụtn̄kpọ, Bible etịn̄ aban̄a etubom mbonekọn̄ Syria emi ọkọdọn̄ọde ata idiọk udọn̄ọ emi ẹkotde akpamfia. Idụhe owo emi ekekemede ndikọk enye, edi Elisha ama ọkọk.

Elisha isibọhọ okụk ini ekededi emi enye adade odudu Abasi ọkọk mme owo udọn̄ọ. Ndi ọmọfiọk ntak?— Ntak edi koro Elisha ọfiọk ke Jehovah esikọk mme owo udọn̄ọ oro, idịghe imọ. Ke Elisha ama akada odudu Abasi ọkọk Naaman udọn̄ọ, esịt enem Naaman tutu enye ọnọ Elisha gold, silver, ye ndiye ọfọn̄. Elisha esịn kpukpru oro, edi Gehazi ọdiọk itọn̄ oyom mme n̄kpọ emi.

Ke Naaman ama ọkọnyọn̄, Gehazi ebịne enye edi itịn̄ke inọ Elisha. Ke ini enye esịmde Naaman, ndi ọmọfiọk se enye ọdọhọde Naaman?— Enye ọdọhọ ete: ‘Elisha ọdọhọ ndidọhọ fi ke isenowo iba ẹbuat imọ. Enye  ete ọnọ mi ọfọn̄ iba nda nsọk imọ man inọ mmọ.’

Gehazi ososu. Elisha inyeneke esenowo ndomokiet, inyụn̄ idọn̄ke enye utom. Gehazi osu nsu emi man ọbọ ọfọn̄ emi Naaman okoyomde ndinọ Elisha. Edi Naaman ifiọkke ke enye ososu. Ntre, esịt enenem enye ndinọ Gehazi mme n̄kpọ emi. Enye akam ọnọ Gehazi akan se enye ọdọhọde. Ndi ọmọfiọk se itịbede ke oro ebede?—

Ke ini Gehazi esịmde ufọk, Elisha okot enye obụp m̀mê enye akaka m̀mọ̀n̄.

Gehazi ọdọhọ ke imọ ikakaha n̄kpọ ndomokiet. Edi Jehovah anam Elisha ọfiọk se Gehazi anamde. Ntre Elisha ọdọhọ enye ete: ‘Owo isibọhọ okụk ye ọfọn̄ ke n̄kpọ Abasi.’

Gehazi ọbọ okụk ye ọfọn̄ owo. Ntre Abasi anam akpamfia Naaman ebe enye. Nso ke emi ekpep nnyịn?— N̄kpọ kiet emi ikpepde edi ke nnyịn ikpedehedei isu nsu.

Nso ikanam Gehazi osu nsu?— Idiọkitọn̄. Enye okoyom n̄kpọ owo, ntre enye ama osu nsu man ọbọ n̄kpọ emi. Se ikanamde enye ọdọn̄ọ akpamfia edi emi tutu enye akpa.

Edi enyene n̄kpọ en̄wen emi idiọkitọn̄ akanamde Gehazi, emi akakam ọdiọkde akan akpamfia. Nso idi oro?— Idiọkitọn̄ esie ama anam enye edue Abasi. Nnyịn ikpedehedei inam n̄kpọ emi edinamde idue Abasi. Utu ke oro, ẹyak isifọn ido isinyụn̄ inọ mme owo n̄kpọ.

Kot ke Bible fo

2 Ndidem 5:5, 20-27; Jude 21

John 15:10

[Ikọ Idakisọn̄]