Nditi Jesus Christ

“Ẹka iso ẹnam emi nditi mi.”—LUKE 22:19.

Ntak emi ndusụk owo ẹsidiade Christmas.

Ndusụk owo ẹdọhọ ke mmimọ isidia Christmas man iti usen emana Jesus.

Ntak emi ọsọn̄de nditi Jesus Christ?

Mme ọwọrọetop ikwọ Christmas ye ediwak n̄kpọ oro ẹsinamde ke ini Christmas inyeneke n̄kpọ ndomokiet ndinam ye Jesus Christ. Ata ediwak owo oro ẹsidiade usọrọ emi ibuọtke idem ye Jesus; ndusụk owo ikam inịmke-nịm ke Jesus ama odu. Mme anyamurua ẹsida ini Christmas ẹsuan etop n̄kpọurua mmọ utu ke ndida ini oro nti Jesus.

Mme edumbet Bible ewe ẹkeme ndin̄wam?

‘Eyen owo ekedi man ọnọ ukpọn̄ esie nte ufak ke ibuot ediwak owo.’ (Mark 10:45) Ana in̄wan̄-in̄wan̄ nte ke Jesus eketịn̄ ikọ emi odude ke Luke 22:19 ke okoneyo oro ekesierede usen oro ẹkewotde enye, idịghe ke usọrọ usen emana esie. Okoneyo oro ke enye ọkọtọn̄ọ edinam oro ẹdidade ẹti n̄kpa esie. Edi, ntak emi Jesus ọdọhọde mme mbet esie ẹti usen n̄kpa esie utu ke usen emana esie? Koro uwa ufak Jesus anam mbon oro ẹkopde uyo Abasi ẹnyene idotenyịn ndidu uwem ke nsinsi. Bible ọdọhọ ete: “N̄kpọ eyenutom idiọkn̄kpọ edi n̄kpa, edi enọ oro Abasi ọnọde edi nsinsi uwem ke Christ Jesus Ọbọn̄ nnyịn.” (Rome 6:23) Ke ntre, kpukpru isua oro mme mbet Jesus ẹtide n̄kpa esie, mmọ ẹsiti enye nte “andinyan̄a ererimbot” utu ke nditi enye nte nsekeyen.—John 4:42.

“Christ ama okụt ukụt ke ntak mbufo, onyụn̄ ọkpọn̄ uwụtn̄kpọ ọnọ mbufo man mbufo ẹkpetiene nde ikpat esie ketket.” (1 Peter 2:21) Edieke afo oyomde ndikpono nnyụn̄ nti Jesus, oyom ekpep nte enye okodude uwem nte mfọnmma owo. Tie n̄ko kere nte Jesus ekesituade owo mbọm, eme ime, enyene uko ndinam se inende, nyụn̄ yom mme ifet ndikpebe enye.

“Obio ubọn̄ ererimbot emi amakabade edi obio ubọn̄ Ọbọn̄ nnyịn ye eke Christ esie, ndien enye ayakara nte edidem ke nsinsi nsinsi.” (Ediyarade 11:15) Ke ini etide Jesus Christ, kere ban̄a se enye anamde idahaemi. Jesus ke akara nte Edidem ke heaven. Ikọ Abasi etịn̄ se Jesus edinamde ete: “Enye eyekpe ikpe mme ubuene ke edinen ido, onyụn̄ ọnọ mme owo nsuannọ ke eti ido ke ufọn sụn̄sụn̄ mbon isọn̄.” (Isaiah 11:4) Okopodudu Andikara ekeme ndinam emi, idịghe nsekeyen.