NTE ikosụk inemede ke ibuotikọ oro ekebede, Jesus ama okop inem uwem. Ntre edieke iyomde ndikop inem uwem n̄ko, inyene ndinam se Jesus akanamde nnyụn̄ n̄kop item esie.

Ke nditịn̄ akpanikọ, se Jehovah ọdọhọde inam edi oro nte itie Bible eke enyọn̄ emi owụtde. Ndisan̄a nte Jesus akasan̄ade ọwọrọ ndidu uwem nte enye okodude nnyụn̄ nnam se enye ekekpepde. Emi ayanam Abasi ama nnyịn onyụn̄ anam ikop inem uwem.

Jesus ama ekpep nte nnyịn ikpodude uwem nte imọ. Enye ekekpep emi ye mme n̄kpọ en̄wen ke ọwọrọetop Ukwọrọikọ esie oro ke Obot. Ẹyak ise ndusụk n̄kpọ oro enye ekekpepde ye nte ikemede ndida mmọ ndu uwem.

NTE UKPEPN̄KPỌ EMI ANAMDE OWO OKOP INEM UWEM:

Jesus okowụt ke Abasi okobot owo man ẹyom ẹnyụn̄ ẹfiọk imọ. Ntak edi oro esidọn̄de nnyịn ndifiọk ibọrọ mbụme emi: Ntak emi nnyịn idude uwem-e? Ntak emi ufen okponde ntem ke isọn̄? Ndi Abasi osụk ekere aban̄a nnyịn? Ndi owo ama akpa, esie okụre? Mbemiso uwem nnyịn enyenede se ọwọrọde, ana ifiọk mme ibọrọ mbụme emi. Jesus ama ọfiọk n̄kukụre ebiet emi idikụtde ibọrọ emi ikemede ndiberi edem—oro edi ke N̄wed Abasi. Enye ọkọbọn̄ akam ọnọ Abasi ete: “Ikọ fo edi akpanikọ.” (John 17:17) Ndi Bible ekeme ndinam nnyịn ifiọk Abasi inyụn̄ ikop inemesịt?

OWO EMI ANAMDE EMI:

Esa ekedi etubom ikwọ ke ọwọrọetop n̄kaikwọ kiet. Enye okoyom ndidi akwaikwọ emi ẹsidọn̄de uyom uyom n̄kukwak. Kpa ye oro, enye ikenen̄ekede ikop inemesịt. Enye ọdọhọ ete: “Okposụkedi emi esịt ekenemde mi ke ini n̄kwọde ikwọ ye n̄kaikwọ nnyịn, okosụk etie nte enyene se nnanade, ntre uwem ikenen̄ekede inem mi.” Edi nte ini akade, Esa ama okụt Ntiense Jehovah kiet. Enye ọdọhọ ete: “Mma mfak enye mbụme. Edi nte enye akadade Bible ọbọrọ mi kpukpru mbụme mi ama enen̄ede enem mi tutu nnyịme enye ekpep mi Bible.” Esa ama enen̄ede ama se enye ekekpepde ke Bible tutu enye ayak idem esie ọnọ Jehovah. Enye afiak ọdọhọ ete: “Akpa, ekesidi n̄kọmọde ke mfịna ye afanikọn̄ kiet n̄kọkọmọ ke en̄wen, edi idahaemi, mmenen̄ede n̄kop inem uwem.” *

NTE UKPEPN̄KPỌ EMI ANAMDE OWO OKOP INEM UWEM:

Owo emi atuade owo mbọm esifọn ido ye owo onyụn̄ anyan̄a owo emi n̄kpọ anamde. Jesus ama ọfọn ido ye mme owo. Mbọm ama anam enye anyan̄a mbon oro ẹkebọde ufen. (Matthew 14:14; 20:30-34) Edieke ituade owo mbọm nte Jesus akatuade, emi ayanam ikop inemesịt sia mme atua owo mbọm ẹsikop inemesịt. (Utom 20:35) Nnyịn imekeme nditua owo mbọm ke nditịn̄ ikọ ndọn̄ owo esịt nnyụn̄ n̄n̄wam mbon emi n̄kpọ anamde. Edi ndi nditua owo mbọm ekeme ndinam ikop inem uwem?

OWO EMI ANAMDE EMI:

Maria ye Carlos ebe esie ẹsitua owo mbọm etieti. Eka Maria ama akpa ọkpọn̄ ete esie, ndien idahaemi ete Maria ana ke nna udọn̄ọ. Maria ye ebe esie ẹma ẹmen enye edidụn̄ ye mmimọ ẹnyụn̄ ẹse ẹban̄a enye. Udọn̄ọ esie isiyakke mmọ ẹde idap ediwak ini, mmọ ẹsikam  ẹmen enye ẹka ufọkibọk ndusụk okoneyo ke ini idem enen̄erede afịna enye. Mmọ ẹdọhọ ke idem esimem mmimọ ndusụk ini. Edi nte Jesus eketịn̄de, esịt esinen̄ede enem mmọ ndise mban̄a ete Maria.

NTE UKPEPN̄KPỌ EMI ANAMDE OWO OKOP INEM UWEM:

Didie ke ndidi anam emem ekeme ndinam uwem enem owo? Emi esinam nnyịn inem itie, onyụn̄ anam mme owo ẹma ndidu ye nnyịn. Ntak edi oro ikpanamde item Bible emi: “Edieke usụn̄ odude, adan̄a nte mbufo ẹkekeme, ẹtie ke emem ye kpukpru owo.” (Rome 12:18) “Kpukpru owo” emi ẹsiakde ke itie Bible emi esịne mme iman nnyịn ye mbon en̄wen emi mîtieneke idụk ido ukpono nnyịn. Ndi ndidu ke emem “ye kpukpru owo” ekeme ndinam inen̄ede ikop inem uwem?

OWO EMI ANAMDE EMI:

Kere ban̄a mma kiet emi ekerede Nair. Nsio nsio afanikọn̄ emi enye okosobode, akpan akpan ke ufọk esie, ama afịna enye etieti. Ebe ama ọkpọn̄ enye isua 15 emi ẹkebede, ndien enye ikpọn̄ akatan̄ nditọ akama. Eyen esie kiet ama ọtọn̄ọ ndida n̄kpọsọn̄ ibọk, anam n̄kpọ afai afai, esinyụn̄ edịghe eka ye adiahaeka esie uwem. Kpukpru emi ẹkeme ndinam owo edue Abasi, edi Nair ọdọhọ ke se ikpepde ke Bible an̄wam imọ ndimụm idem n̄kama nnyụn̄ ntie ke emem. Enye isitọhọke inyụn̄ iyatke esịt, edi esifọn ido onyụn̄ atua owo mbọm. (Ephesus 4:31, 32) Enye ọdọhọ ke ndikpep nditie ke emem anam uwem enem imọ ye ofụri ubon imọ, onyụn̄ anam mbon en̄wen ẹkeme ndisan̄a n̄kpere mmọ.

Edieke inamde nti item oro Jesus ọkọnọde, nnyịn iyokop inem uwem. Edi se idinamde uwem etetịm enem nnyịn edi ndifiọk n̄ko se iditịbede ke ini iso. Nso ikpedi ufọn uwem emi edieke nnyịn mîkpenyeneke idotenyịn ke n̄kpọ ọyọfọn akan emi ke ini iso? Edi kan̄a ke emi, usọn̄, udọn̄ọ, ye n̄kpa iyakke ikop inem uwem nte ikpokopde.

Edi n̄kpọ ọmọn̄ okpokpụhọde. Jehovah eyenen̄ede ọdiọn̄ kpukpru mbon oro ẹdomode ndidu uwem nte Jesus okodude. Jehovah ọn̄wọn̄ọ ke imọn̄ idada edinen obufa ererimbot idi, emi ndinen owo ẹdidude uwem ke nsinsi nte imọ ikaduakde. Mmọ idinyụn̄ idọn̄ọke. Bible ọdọhọ ete: “Sese! Ebietidụn̄ Abasi omodu ye owo, enye oyonyụn̄ odụn̄ ye mmọ, ndien mmọ ẹyedi ikọt esie. Abasi ke idemesie oyonyụn̄ odu ye mmọ. Ndien enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.”—Ediyarade 21:3, 4.

Maria oro iketịn̄de iban̄a ke akpa ibuotikọ magazine emi, oro ekedide isua 84 do, odori enyịn ndikụt ini emi un̄wọn̄ọ Abasi emi edisude. Afo ndien-e? Ndi akpama ndidiọn̄ọ n̄kpọ efen mban̄a “ata uwem” emi ididude ke ini Obio Ubọn̄ Abasi edikarade isọn̄ emi? (1 Timothy 6:19) Edieke edide ntre, mbọk nyene nneme ye Mme Ntiense Jehovah ke edem mbufo, mîdịghe wet mme andimịn̄ magazine emi. *