IBUOTIKỌ IKPAEDEM: NDI ESIDI ABASI ANAM ETI ANAM IDIỌK?
Nso Inam Mme Owo Ẹkere ke Esidi Abasi Anam Eti Anam Idiọk?
NDI ibuotikọ emi odude ke edem magazine emi akpa fi idem? Enye akpa ndusụk owo idem, edi ata ediwak owo idiọn̄ọke m̀mê Abasi esidi anam eti anam idiọk, ke ini ndusụk owo ẹkerede ke enye esinam. Ntak-a?
Ndusụk mbon oro ẹbọhọde oto-obot afanikọn̄ ẹsibụp ẹte: “Ntak emi Abasi ayakde utọ n̄kpọ emi etịbe? Ndi enye idọn̄ke enyịn ke se itịbede inọ nnyịn? Ndi idịghe ibak edi oro?”
Se idude ke Bible anam ndusụk owo ẹkere ke esidi Abasi anam eti anam idiọk. Mmọ ẹsibụp ke ini ẹkotde nte Abasi akadade mmọn̄ ukwọ osobo mme owo ke eyo Noah, ẹte, ‘Ntak emi Abasi ima okpowotde utọ akpakịp owo oro? Ndi idịghe ibak edi oro?’
Ndi emesibụp utọ mbụme emi ndusụk ini? Mîdịghe, ndi akanam owo obụp fi ndien ufiọkke se ọkpọbọrọde? Ọfọn, yak ise n̄kpọ emi ekemede ndin̄wam fi.
NTAK EMI IBAK ESIBIAKDE NNYỊN-E?
Ke nditịn̄ ibio ibio, esibiak nnyịn ndikụt nte owo anamde ekemmọ owo ibak sia Abasi anam ifiọk se inende ye se ikwan̄ade. Nnyịn itiehe nte mme unam, edi Abasi okobot nnyịn ke “mbiet esie.” (Genesis 1:27) Nso ke emi ọwọrọ? Enye okobot nnyịn man ikeme ndinyene mme edu esie nnyụn̄ mfiọk se inende ye se ikwan̄ade. Kere ise: Edieke ibak esibiakde nnyịn sia Abasi okobotde nnyịn ke mbiet esie, anam idiọn̄ọ se inende ye se ikwan̄ade, ndi oro iwụtke ke ibak esinyụn̄ abiak Abasi emi okobotde nnyịn ke mbiet esie?
Bible owụt ke esibiak enye. Abasi ọdọhọ ke ‘usụn̄ imọ okon̄ akan̄ usụn̄ nnyịn, ekikere imọ onyụn̄ okon̄ akan ekikere nnyịn.’ (Isaiah 55:9) Owo ekededi emi ekerede ke Abasi ekeme ndinam ibak ekere ke imọ imọdiọn̄ọ idem ikan Abasi. Idụhe ọdiọn̄ọ-idem-owo emi ekpekerede n̄kpọ ntem. Utu ke ndibụp m̀mê Abasi esikam anam ibak, ikpakam ibụp ntak emi ndusụk n̄kpọ emi enye esinamde etiede ntre. Man ibọrọ mbụme emi, ọkpọfọn ifiọk kan̄a se “ibak” enen̄erede edi.
Edieke idọhọde ke owo abak ibak, emi ọwọrọ ke se enye anamde oro ọdiọk etieti. Owo ibak esinenem esịt ndikụt mbon en̄wen ẹbọde ufen, mîdịghe ikereke iban̄a ufen emi mme owo ẹbọde. Ntem, edieke ete amiade eyen sia esinemde-nem enye ndikụt eyen oro atuade, ibak edi oro. Edi edieke ete amiade eyen esie man enen̄ede enye mîdịghe anam enye odu eti uwem, enye oro idịghe ibak. Mme owo ẹsikere ke owo edi idiọkowo sia esịt mîfiọkke se esịt ekerede. Ekeme ndidi emi etịbe ọnọ fi.
Ẹyak ise n̄kpọ iba emi anamde ndusụk owo ẹkere ke esidi Abasi anam eti anam idiọk. Akpa, edi ke ini oto-obot afanikọn̄ etịbede. Ọyọhọ iba edi ke ini mmọ ẹkotde nte Abasi okosobode mme idiọk owo ke Bible. Ndi ndomokiet ke otu emi owụt ke esidi Abasi anam eti anam idiọk? Yak ise ise.
