Jesus ndikeset ke n̄kpa ama anam mme mbet esie ẹnen̄ede ẹbuọt idem ke Abasi ẹnyụn̄ ẹsịn idem ẹnam n̄kpọ esie. Apostle Paul ama asan̄a ke ofụri Asia Minor ye Mediterranean ọkwọrọ ikọ, asiak mme esop onyụn̄ ọsọn̄ọ mme Christian idem ete ẹka iso ẹnam n̄kpọ Abasi okposụkedi emi ererimbot ẹkọbọde mmọ. Mme Christian ẹkesụk ẹkaka iso ẹtọt kpa ye oro ẹkekọbọde mmọ.

Ekem ẹma ẹsịn Paul ke ufọk-n̄kpọkọbi. Kpa ye oro, enye ama etie do ewet leta ọnọ mme Christian man ọsọn̄ọ mmọ idem onyụn̄ ọnọ mmọ item. Enye ama ọdọhọ mmọ ke se ikam idiọkde ikan emi ke edi—oro edi, mfiakedem. Edisana spirit Abasi ama anam Paul ọdọhọ ke “ndiọi wolf” ẹyedụk otu mme Christian ẹnyụn̄ “ẹtịn̄ ukwan̄ ikọ man ẹdụri mme mbet ẹnọ idemmọ.”—Utom 20:29, 30.

Mfiakedem emi ama ọtọtọn̄ọ mbemiso mme apostle ẹkpan̄a ẹma. Ini oro ke Jesus okowụt apostle John se iditịbede ke ini iso, emi enye ekewetde ke n̄wed Ediyarade. John ọkọdọhọ ke mbon mfiakedem emi ye mme asua nnyịn eken idikemeke ndikpan Abasi ndinam isọn̄ emi ye mme owo ẹtie nte enye okoyomde. Enye ama ọdọhọ n̄ko ke ẹyekwọrọ eti mbụk Obio Ubọn̄ Abasi ẹnọ “kpukpru mme idụt ye esien ye usem ye obio.” (Ediyarade 14:6) Isọn̄ emi ayafiak edi Paradise, ndien owo ekededi emi amade ndinam uduak Abasi oyodu do.

Ndi amama “eti mbụk” emi? Edieke amade, ka iso kpep Bible man ọfiọk se Abasi aduakde ndinam nnọ owo, nyụn̄ se nte emi edifọnde ye afo idahaemi ye ke ini iso.

Afo emekeme ndikot Bible ke ikpehe Intanet emi, www.ps8318.com/efi Oyokụt mme n̄wed Ikọ Abasi emi: Nso Idi Etop Bible?, Eti Mbụk Emi Otode Abasi!, Nso ke Bible Enen̄ede Ekpep? ye mme n̄wed eken emi ẹtịn̄de ntak emi ikpenịmde ke Bible edi N̄wed Abasi. Mme n̄wed emi ẹtịn̄ n̄ko nte ikpadade item Bible idu uwem.

—Ẹda ẹto Utom, Ephesus, Philippi, Colossae, Philemon, 1 John, Ediyarade.