“ABASI edi Spirit,” owo inyụn̄ ikemeke ndikụt enye. (John 4:24) Edi Bible ọdọhọ ke enyene nte ndusụk owo ẹkekụtde Abasi. (Mme Hebrew 11:27) Ẹkesan̄a didie ẹkụt? Ndi afo emekeme ndikụt Abasi emi Bible ọdọhọde ke ‘enyịn ikemeke ndikụt’?—Colossae 1:15.

Nnyịn itie nte owo emi akamanade nnan. Ndi owo ndidi nnan akpan enye ndifiọk se ikade iso ke ererimbot? Ikpanke! Enyene nsio nsio n̄kpọ emi ẹsinamde nnan ọdiọn̄ọ ebiet emi enye odude, mbon emi ẹdude ye enye, se ẹnamde do, ye mme n̄kpọ emi ẹdude do. Ete kiet emi edide nnan ọdọhọ ke idịghe enyịn ke ẹsida ẹkụt n̄kpọ, ke ẹsida ekikere.

Kpasụk ntre, okposụkedi emi mûkemeke ndida ata enyịn fo n̄kụt Abasi, emekeme ndida “enyịn esịt” fo n̄kụt enye. (Ephesus 1:18) Yak ineme usụn̄ ita emi ekemede ndinam emi.

Owo emi edide nnan esinen̄ede okop n̄kpọ, ndien enye ekeme ndifiọn̄ọ ubọk ntụk n̄kpọ nnyụn̄ nda nte n̄kpọ oro etiede ndiọn̄ọ se enye otụkde. Kpasụk ntre, emekeme ndida se okụtde onyụn̄ okopde n̄kpep n̄kpọ mban̄a mme n̄kpọ emi Abasi okobotde onyụn̄ ada oro ọfiọk nte Abasi etiede. Bible ọdọhọ ete: “Tọn̄ọ nte ẹkebot ererimbot, ẹtịm ẹkụt mme edu esie oro enyịn mîkwe, . . . koro ẹkụt mmọ ebe ke mme n̄kpọ oro enye anamde.”—Rome 1:20.

Ke uwụtn̄kpọ, kere ban̄a isọn̄ nnyịn emi. Enye etie nte ata ufọk. Nte ẹkenamde isọn̄ emi anam uwem enen̄ede enem. Ke ini ibọde ofụm, idiade edinem mfri, ikopde nte inuen ọkwọde ikwọ, m̀mê ikụtde ndiye flawa, esinem nnyịn etieti. Ndi emi iwụtke ke Andibot ama nnyịn, ọfọn ido, onyụn̄ atat ubọk?

Se okụtde ke ekondo ekpep fi nso aban̄a Abasi? Mme n̄kpọ oro okụtde ke ikpaenyọn̄ ẹwụt ke Abasi enyene odudu. Ndien se ntaifiọk ẹkụtde ndondo emi owụt ke ekondo nnyịn emi ke okpon akan nte ekedide. Ke ini esede ikpaenyọn̄ okoneyo, bụp idemfo ete: Odudu emi anamde ekondo nnyịn aka iso okpon oto m̀mọ̀n̄? Oto Abasi sia Bible ọdọhọ ke Andibot nnyịn ‘ọsọn̄ odudu.’ (Isaiah 40:26) Mme n̄kpọ emi Abasi okobotde ẹwụt nnyịn ke enye edi “Ata Ọkpọsọn̄” onyụn̄ “okpon ke odudu.”—Job 37:23.

Mma kiet emi enyenede nditọ iba emi ẹdide nnan ọdọhọ ete: “Se isinen̄erede in̄wam mme nnan edi se ẹtịn̄de ẹnọ mmọ. Tin̄ kpukpru se okụtde onyụn̄ okopde nọ mmọ, sia afo edi enyịn ọnọ mmọ.” Kpasụk ntre, okposụkedi emi ‘akananam owo mîkwe Abasi,’ Jesus Eyen Abasi “emi odude ke ikpanesịt Ete anam ẹdiọn̄ọ enye.” (John 1:18) Sia Jesus edide akpa owo emi Abasi okobotde ye ikpọn̄-ikpọn̄ edibon Eyen esie, enye edi akpan owo emi ekemede nditịn̄ se itịbede ke heaven nnọ nnyịn. Enye onyụn̄ ekeme ndinam nnyịn ifiọk Abasi.

Se n̄kpọ ifan̄ oro Jesus, emi okodude ye Ete esie ke anana-ibat isua, eketịn̄de aban̄a Abasi mi:

• Abasi esịn idem anam utom. “Ete mi ke ananam utom tutu esịm emi.”—John 5:17.

• Abasi ọfiọk se inanade nnyịn. “Ete mbufo ọfiọk mme n̄kpọ emi mbufo ẹyomde idem mbemiso mbufo ẹben̄ede enye.”—Matthew 6:8.

•  Abasi ọfọfọn ido ye kpukpru owo. ‘Ete mbufo emi odude ke heaven anam utịn esie asiaha ọnọ mme idiọkowo ye nti owo onyụn̄ anam edịm edep ọnọ ndinen owo ye mme anam ukwan̄ido.’—Matthew 5:45.

• Nnyịn owo kiet kiet imọsọn̄ urua ke enyịn Abasi. “Nte owo inyamke akadan̄abasi iba ke okudọk okụk kiet? Edi baba kiet ke otu mmọ iduọhọ ke isọn̄ ke Ete mbufo mîfiọkke. Edi ẹbat kpa kpukpru idet ibuot mbufo. Ke ntre ẹkûfehe ndịk: Mbufo ẹmesọn̄ urua ẹkan ediwak akadan̄abasi.”—Matthew 10:29-31.

Nte n̄kpọ esin̄wan̄ade owo emi edide nnan okpụhọde ye nte esin̄wan̄ade owo emi okụtde usụn̄. Ke uwụtn̄kpọ, nnan ikemeke ndikụt mfụt, edi enye ekeme ndida nte itie ebịtde ndiọn̄ọ ke mfụt do, sia eyo mîdụkke itie oro. Kpa nte owo emi edide nnan mîkemeke ndikụt mfụt m̀mê un̄wana, nnyịn ikemeke nditịm mfiọk Jehovah ke idem nnyịn. Ntak edi oro Jehovah ọkọnọde nnyịn owo emi okodude uwem nte enye.

Owo oro ekedi Jesus. (Philippi 2:7) Jesus ama esitịn̄ aban̄a Ete esie onyụn̄ owowụt nnyịn utọ Abasi emi enye edide. Philip emi ekedide mbet Jesus ama ọdọhọ enye ete: “Ọbọn̄, wụt nnyịn Ete.” Jesus ama ọbọrọ enye ete: “Owo eke okụtde mi okụt Ete n̄ko.” (John 14:8, 9) Didie ke se Jesus akanamde ekeme ndin̄wam fi okụt Ete?

Jesus ama ọfọn ido, osụhọde idem, onyụn̄ enem itie. (Matthew 11:28-30) Nte enye okodude uwem ama anam mme owo ẹkpere enye ẹnyụn̄ ẹma enye. Jesus ama esifụhọ ke ini mme owo ẹfụhọde, onyụn̄ adara ke ini mmọ ẹdarade. (Luke 10:17, 21; John 11:32-35) Ke ini okotde m̀mê okopde mme mbụk Bible emi ẹban̄ade Jesus, nam nte ke etiene odu ke ebiet emi n̄kpọ emi eketịbede. Edieke etiede ekere nte Jesus ekesinamde n̄kpọ ye mme owo, eyenen̄ede ọdiọn̄ọ nte Abasi etiede onyụn̄ ekpere Enye.

Mma kiet emi edide ewetn̄wed ama etịn̄ nte nnan esisan̄ade ọfiọk se ikade iso. Enye ọkọdọhọ ke owo emi edide nnan esisọp okop utebe, okop se ẹtịn̄de, ọfiọn̄ọ ubọk otụk n̄kpọ onyụn̄ ada nte n̄kpọ oro etiede odiọn̄ọ se enye otụkde. Kpasụk ntre, nte okụtde mme n̄kpọ emi Abasi okobotde, okotde se Jesus eketịn̄de aban̄a Ete esie, onyụn̄ etịmde ese nte Jesus okodude uwem, editie nte okụt Jehovah iso ye iso.

Se iketịbede inọ Job edi oro. Enyene ini emi enye eketịn̄de ikọ, edi ifiọkke se enye etịn̄de. (Job 42:3) Edi ke enye ama ekese nsio nsio n̄kpọ emi Abasi obotde, onyụn̄ okụt nte mmọ ẹnyenede ndyọ, enye ama ọdọhọ ete: “N̄kokokop mban̄a fi, edi, ke emi, enyịn mi okụt fi.”—Job 42:5.

Afo n̄ko emekeme ndikụt ata Abasi nte Job okokụtde. “Edieke afo oyomde [Jehovah], enye ayayak fi okụt enye.” (1 Chronicle 28:9) Mme Ntiense Jehovah ẹyema ndin̄wam fi oyom onyụn̄ okụt Abasi.