N̄kamana ke ekpri obio kiet ke Poland. Obio nnyịn iyomke usụn̄ ikpọn̄ adan̄a Poland ye Germany. Sia ikodụn̄de ke obio in̄wan̄, uwem iketiehe itọk itọk. Ete ye eka mi ẹma ẹsidọhọ mi ndu eti uwem, nsịn idem n̄kpep n̄wed, nnyụn̄ nnam se n̄kekeme man ndi ọwọrọiso owo.

Mfịna mi ọkọtọn̄ọ ke ini n̄kakade n̄kekpep ibet ke ufọkn̄wed ntaifiọk ke Wrocław. Sia mmen̄kodụn̄ke aba ye ete ye eka mi, mma ntọn̄ọ ndidụk idiọk nsan̄a. Mma mma bọl etieti, ntre mbufa ufan mi ẹma ẹnam nnen̄ede nsua mbon oro mîmaha mbon n̄ka bọl nnyịn. Mbon n̄ka bọl nnyịn ẹketo Warsaw, ndien mma nsitiene mmọ ke utịturua n̄ka ebiet ekededi emi mmọ ẹkade ẹkebre bọl. Ima isin̄wọn̄ mmịn etieti, ida n̄kpọsọn̄ ibọk, inyụn̄ in̄wana ye mbon oro mîdaha ye n̄ka bọl nnyịn. Mme ini oro n̄kesitienede mmọ n̄wọrọ do ama esinem mi etieti sia ama esinam mfre uwa. Edi mma ndiọn̄ọ ke edieke bodisi ẹmụmde mi, ke emi ekeme ndinam n̄kûdi aba ekpeibet oro n̄koyomde ndidi.

Ami ye mme ufan mi ima isima ndika nsio nsio itie udia-uwem. Ima isin̄wana ye mme owo ke efak. Bodisi ẹma ẹsimụm mi ediwak ini, edi mma nsitịn̄ ikọ mîdịghe ntịbi n̄kpọ nnam man ẹsana mi ẹyak. Ndusụk ini mma nsinọ mmọ ubọkedem. N̄kekere ke ndu ata uwem. Edi ke isọn̄ esịt mi mma ndiọn̄ọ ke se nsinamde ifọnke. Ntre, mma nsika ufọkabasi kpukpru Sunday mbak esịt edifịna mi.

Ke 2004, Mme Ntiense Jehovah ẹma ẹdi ufọk mi, ndien mma nnyịme ndikpep Bible ye mmọ. Nte n̄kekpepde se ndidi ata Christian ọwọrọde, esịt ama ọtọn̄ọ ndifịna mi. Mma ndiọn̄ọ ke akpana ntre ndin̄wọn̄ mmịn mbe ubọk, ndida n̄kpọsọn̄ ibọk, ndinyụn̄ ndụk nsan̄a ye mbon emi mîdụhe uwem nte Bible ọdọhọde. Mma n̄kụt n̄ko ke akpana n̄kpep ndisimụm idem n̄kama ke ini n̄kpọ abiakde mi. Okposụkedi emi n̄kọdiọn̄ọde ke akpana n̄kpụhọde, n̄kokpụhọkede.

Uwem mi ama okpụhọde okoneyo usen kiet ke ini n̄kan̄wanade ye owo itiaita. Ke nteti nte ẹketịghade mi ẹnyụn̄ ẹtọde mi ita tutu nduọ nna ke isọn̄. Mma n̄kụt n̄kpa ke enyịn. Mma mbọn̄ akam nte: “Jehovah, mbọk kûyat esịt. Fen nọ mi nte mmen̄kadaha Ikọ fo ke akpan n̄kpọ. Edieke mbọhọde, nditreke ndikpep Bible ye Mme Ntiense Jehovah nnyụn̄ n̄kpụhọde nte ndude uwem.” Mma mbọhọ nnyụn̄ ntọn̄ọ ndikpep Bible nte n̄kọn̄wọn̄ọde.

 Ke 2006, mma n̄wọrọ n̄ka England. N̄kaka England man n̄kpenyene okụk mfiak ndika n̄wed ke Poland sia n̄koyomde akamba n̄weditoro ke ibet. Nte n̄kosụk n̄kpepde Bible, enyene itie N̄wed Abasi kiet emi ekenen̄erede otụk mi. Apostle Paul ọkọdọhọ ete: “Ami mbat kpukpru n̄kpọ ke ntakurua ke ntak akakan ifiọk Christ Jesus Ọbọn̄ mi. Ke ntak esie mmenyịme kpukpru n̄kpọ ẹtak nnyụn̄ mbat mmọ ke mbio, man n̄kpenyene Christ.” (Philippi 3:8) Ukem nte ami, apostle Paul ekekpep ibet ke ufọkn̄wed okonyụn̄ edi owo afai. (Utom 8:3) Edi enye ama edikụt ke enyene n̄kpọ en̄wen emi enye akpakam adade uwem esie anam, oro edi ndinam n̄kpọ Abasi nnyụn̄ nsịn ofụri ukeme n̄kpebe Jesus. Ke ini nketiede n̄kere mban̄a Paul, mma ndikụt ke uwọrọiso ye afai inamke owo okop inemesịt. Mma ndọhọ ke edieke Paul okokpụhọrede, ke ami n̄ko mmekeme ndikpụhọde. Ntre, mma mbiere ndika iso ndu ke England utu ke ndinyọn̄ Poland n̄kaka n̄wed.

Nte n̄kekpepde n̄kpọ mban̄a Jehovah, ntre n̄ko ke n̄kenen̄ede mma enye. Mma nnen̄ede mma nte enye ọdọhọde ke iyefen inọ mbon oro ẹkabarede esịt. (Utom 2:38) Ke ini n̄ketiede n̄kere se idude ke 1 John 4:16, mma ntọn̄ọ ndikụt ntak emi Abasi asuade afai. Itien̄wed oro ọdọhọ ke “Abasi edi ima.”

Mma nnyụn̄ mma nte Mme Ntiense Jehovah ẹdude uwem. Mma n̄kụt ke mmọ ẹdomo ndidu uwem nte Bible ọdọhọde. Ama ọdọn̄ mi nditiene nsịne ke otu Mme Ntiense Jehovah sia mmọ ẹtie nte nditọeka. Mma n̄kpụhọde nte ndude uwem, kpa ye oro mîkememke. Ke 2008, mma nna baptism n̄kabade ndi Ntiense Jehovah.

Bible okpụhọde uwem mi. Nyomke aba uwọrọiso, nnamke aba afai, ndaha n̄kpọsọn̄ ibọk, n̄n̄wọn̄ke mmịn mbe ubọk, nnyụn̄ ndaha bọl nte ebeiso n̄kpọ. Idahaemi ndidi asan̄autom Abasi emi amade ndikpep mme owo Bible. Nsụk mmama ndise bọl, edi nyakke enye adia mi idem.

Esịt enem mi ndidọ ediye an̄wan emi adianade ye ami okpono Jehovah. Enye ekere Esther. Esinen̄ede enem nnyịn ndikwọrọ ikọ nnọ mbon emi ẹsemde usem Polish mi ke England. Ata akpa ini emi nnen̄erede n̄kop inemesịt edi emi. Esịt ifịnake mi aba ndien uwem enen̄ede enem mi idahaemi.